464. | vabaut.

464. | vabaut.
1) .11/5+10/6/7
worüba soi i denn scho wieda schreibm, brauch jetzt a auszeit, a längare pausn von läam und stress, konn hia net meah bleibm, bin a fragiles gefäss
wos soi i eich denn no olles berichtn, brauch wiaklich kan streit, ka debatte zu meim gsundheitszuastond, loss ma nix ondichtn, bin jetzt scho ziemlich om sond
wü eich mit meine gschichtn net meah longweiln, bin innalich lea, treib iagendwie ufalos in an kreis, muass jetzt dringend ausheiln, fühl mi direkt aufm glotteis
deaf di jetzt auf goa kan foi meah besuchn, bist da feind im mea, auf meinen no flochn bewusstseinswön, wea net noch dia rufn, wiast mi nie zufriednstön.
b 1) .10/8/10/9
befrei mi endlich von diesn zwängen, diesa druck is afoch enoam, mecht jede anzelne tat vadrängen, zastea ruhig diese aussichtsplottfoam
ealoss ma do endlich diese pflichtn, füa mi is des a widaspruch, jeds anzelne gsetz wiad mi donn richtn, gewäah ma afoch no an vasuch
entbind mi endlich von diesn fessln, die sanktionen hom mi bestroft, brauchst mi goa net meah einkessln, regenaria do mei ontriebskroft
bewiak do endlich amoi a wunda, bin von da sucht no net kuriat, in meinen adan fliesst reichlich plunda, hob voahea no ois egalisiat.
ch 1a) .11/9/9/10
nua du host mei foss zum übalaufn brocht, nua du host da dabei goa nix docht, nua mit dia hob is plateau eareicht, nua wegn dia is mei lebm vaseicht
bist wie a zeckn die mi hamlich aussaugt, dei longsomkeit hot mi scho ausglaugt, vaschenkst grosszügig dei siasses gift, nua wegn dia valia i des gleichgwicht
nua du host mein hohn damm zum einstuaz brocht, nua du host no dabei freindlich glocht, nua mit dia woa i imma zu spät, nua wegn dia kenn i ka qualität
bist wie a spinn die mi im netz gfongen hoit, deine fädn klebm mit vü gwoit, spendest grosszügig dein säuretronk, nua wegn dia is mei lebm todkronk.
2) .11/5+10/6/7
warum lossts mi denn net endlich moi in ruah, wü eich net meah sehn, brauch a distanz zu eian horizont, hob bei eich ka struktua, leb nua ständig on da front
wos woits iah eigentlich imma nua von mia, mecht jetzt endlich gehn, hob diese diskussionen scho so sott, mecht jetzt in mei revia, die ruda föhn in meim boot
hobts ma scho vüz vü stana in den weg glegt, woa a hüadnlauf, stoipa und foi üba jeds hindanis, nua unsicha bewegt, katastrophale praxis
deaf di ob heit auf goa kan foi meah treffn, bist da feind im rauch, in meina hoch lodandn feuersbrunst, wea hia net zommbrechn, vaweiga dei liebeskunst.
b 2) .10/8/10/9
öffne endlich diese grossn schronkn, brauch wieda an weitn foatschritt, kumm scho vüz oft ins grübln und wonkn, vapass ma scho söbst an saubren schnitt
ealoss ma do endlich meine schuidn, wäa füa di nua a klanigkeit, konn mi boid net meah länga geduidn, a zweite chance is a sötnheit
entheb mi endlich oi meina soagn, die vazweiflung hot mi im griff, vaschieb ois seah gean auf übamoagn, hob a grosses leck auf meim frochtschiff
befrei mi do endlich von dem bösn, hob mei sucht no net übabrückt, mecht endlich mei vasprechn einlösn, hob imma die foischn früchte pflückt.
d 1) .9/8/9/6+8
steh mittn im aug vom wiablstuam, lausch diesa unhamlichn stün, a schnö rotiarende schwoaze wond, vaengt den klan bereich, wo meine gedonkn vaglühn
steh gonz alla aufm hechstn tuam, betrocht die gegend nah und fean, a schnö aufziehende woiknwond, stüht ma den kloan schein, um mei weisheit gonz auszuspean
sitz jetzt mittn in an regnguss, hoach auf den arhythmischn takt, a rauschend brodlnde wossafront, flutet mein klan palast, dea mei eainnarung zahackt
sitz gonz alla voa an wüdn fluss, siag scho vüz vü zasteats treibgut, a sich aufstauende nosse front, vadreckt die reine woahheit, in meim göttlichn reinen blut
geh völlig nockt duach die schneelondschoft, bau mia a höhle gonz geheim, heul donn um mittanocht zum voimond, berüah sei eneagie, mit oi seinen phantasterein
geh üban zuagfroanen see zoghoft, des eis kniaschend knarzt unta mia, greif noch den steanen und zum voimond, moi ma söba figuan, und trink iah licht ois elixia.
ch 1b) .11/9/9/10
denn nua du host mei maua zum beastn brocht, nua du host diesn läam vavüfocht, nua mit dia is plateau weich und zoat, nua wegn dia is mei lebm so hoat
bist wie siebm plogn in ana peason, dei routine eaweckt den dämon, vaschenkst grosszügig dei ironie, nua wegn dia hob i ka symmetrie
nua du host ma in die koide suppm gspuckt, nua du host mit kana wimpa zuckt, hob nua mit dia nie die kuavn krotzt, nua wegn dia hob i die foab vapotzt
bist wie a skoapion dea mi ständig bedroht, aus deim stachl singt da bittre tod, spendest grosszügig dei virulenz, nua wegn dia hots lebm ka frequenz.
ch 2a) .7+7/7+14
da winzige kieslstein, vasinkt bis zum mearesgrund, da flug vom iadenen sein, hot mit zentrischn wön aufm wossaspiegl eintunkt
da sonfteste fliaglschlog, vom schillandn schmettaling, vasetzt da eadn an schock, und vaschiebt jedn anzelnen planetarischn ring
des feine lose staubkoan, wiablt duach die woame luft, diese neue lebmsfoam, treibt schwerelos von da beagspitzn zua sondign bucht
diesa leiseste windhauch, aus muttas intimstn schoss, mutiat zu an dichtn rauch, und vasetzt dem schlofendn vuikan an mächtign stoss.
3) .11/5+10/6/7
worauf soi i mi denn no ois konzentrian, bin afoch neavös, mei zukunft steht unta kan guadn stean, muass so vü aussondian, mecht des vagongne auslean
wovoa hobts iah mi hia eigentlich gewarnt, zitta gonz graziös, meine phobien sickan scho duach mei haut, bin no goa net enttarnt, kana hot mia meah vatraut
eire eahlichkeit von lügn duachzogn, hob nie wos bemeakt, hobt die woahn obsichtn guat vasteckt, hobts mi nua betrogn, mei weisse weste befleckt
deaf di hia auf goa kan foi meah begegnen, host mein feind bestäakt, füa an schleichendn infiltrationspakt, iah weadts des obsegnen, füa mei eignes artefakt.
b 3) .10/8/10/9
zabrich jetzt die unsichtboan triebe, muass jetzt dringend an schlussstrich ziehn, jede gelegnheit mocht jo diebe, mecht diesm wahnsinn endlich entfliehn
ealoss ma do endlich meine sündn, hobs wiaklich scho seah oft bereut, wea diese vagebung nie eagründn, die nächste prüfung hot si auszoiht
earett mi endlich von diesm konflikt, des labyrinth is kompliziat, bin unta da büade wieda einknickt, hob diesn schodn net akzeptiat
des eaeignis wiaft scho an grossn schottn, geh mit meina sucht net konfoam, mecht mei halluzination ausrottn, vaspüa in mia so vü wut und zoan.
d 2) .9/8/9/6+8
steh in da mittn vom woiknsteg, da regnbogn hot ka end, die foabm hom kräftig kopuliat, hom si berauscht vamischt, in an ekstatischn moment
steh gonz alla aufm foischn weg, wass net meah ob voa oda zrück, jede richtung hot mi scho vawiat, olle seitn lockn, mit ana dünnen scheibm glück
sitz jetzt mittn untam wossafoi, lausch dem donnandn weissn noss, die brodelnd rauschende wossafront, foigt stua dem flussvalauf, und zasprengt des rostige schloss
sitz gonz alla im valossnen toi, spazia duach diese geistastodt, da oiptraum hot niemondn vaschont, wesn da drittn oat, betn gonz stumm zu iahm gott
geh auf übawuchatn gräban, hoach auf diese flüstande sproch, ritz hieroglyphn aufd oide wond, hob den sinn vagessn, in diesm vaschmutztn loch
geh auf fruchtboa softign äckan, riach den eadig wüazign duft, skelette schlofn no tiaf vagrom, in da untaiadisch, scho längst vagessnen finstren gruft.
e 1) .12/10/10/8..///9..7/12/7/10
mecht jetzt so gean meine fliagl weit ausbreitn, segl donn mit den woikn in dei reich, mecht di jetzt übaroihin begleitn, lond direkt bei dia aufm teich
mecht di so gean mit meine fliagl umoamen, hoit di donn fest im weichn fedakleid, mecht dei magische aura umfoamen, kreia a laszive sinnlichkeit
muass mei ich mit ondre teiln, meine peasönlichkeitn woin nie long vaweiln, hob mei ich scho long valoan, kana deaf iagendwos von mia eafoahn.
ch 1c) .11/9/9/10
denn nua du host mei grenzn zum kollaps brocht, nua du host den äaga vauasocht, nua mit dia is plateau a gewinn, nua wegn dia kennts lebm an ruin
bist wie a meteoa dea die eadn küsst, dei kötn hot mi vüz oft begrüsst, vaschenkst grosszügig dei aggression, wegn dia föht bei mia die reaktion
nua du host ma reissnägl voa die fiass gstreut, nua du host mei vatraun vauntreut, nua du bist von mia des gegnteil, nua wegn dia zareisst des rettungsseil
bist a feigling dea si von hintn onschleicht, dei heazlosigkeit hot mi scho gstreift, spendest grosszügig dei fremdsubstanz, wegn dia springts lebm zum totntonz.
ch 2b) .7+7/7+14
da winzige blütnstaub, fliagt fost bis zum fiamament, des vawökte bunte laub, eazöht romane übas natüaliche element
da sonfteste hautkontakt, endet mit an laudn schrei, da gfäahliche drahtseilakt, wiad zua riskantn monotonen fadn litanei
da fein gschliffne diamont, hot längst sei magie vaspüt, da extrem äussaste rond, hot si om unbekonntn uneafoaschtn raum vabrüht
diesa leiseste atem, aus muttas tiafstn grundgestein, mutiat scho zu an problem, drückt die kontinentalplottn aus iahn festn reihn.
ch 3a) .7/8/7/11
du bist des füa und wida, bist da valust und da profit, hoitst mei bewusstsein nieda, meine vün föhla san mei defizit
du bist des pro und kontra, bist die vamisste differenz, woa nie des nonplusultra, mei stoake paranoia steat mei frequenz
du bist des gut und bese, bist die oadnung und da defekt, mei woat a antithese, mei kronkheit vamindat scho mein intellekt
bist des lebm und da tod, bist da faulig eitrige zahn, woa nie dei moralgebot, meine psychosn vauasochn mein wahn.
4) .11/5+10/6/7
wohea hobts iah meine lebmsphasn gwusst, hob nix offnboat, hob freiwillig die einsomkeit besucht, iah hobts mi beeinflusst, jetzt jogts mi noch meina flucht
weshoib sads iah on mia nua so intressiat, hob eich nix aufgspoat, hobts mei lebm scho längst auswendig gleant, hob goa net reagiat, iagendwos hobts ma entfeant
hobts eire sabotage mit mia geplant, jede klanigkeit, wuade genau vamessn und befragt, die details hochbrisant, hob mi afoch zweit voagwagt
deaf zu dia auf goa kan foi meah gelongen, bist da feind im bett, während unsra brünstign poistaschlocht, hob di nie empfongen, bin jetzt scho ziemlich obgflocht.
b 4) .10/8/10/9
duachhau endlich den komplexn knotn, hob jetzt von windungen scho gnua, die vün ausredn ghean vabotn, jede hintalosst a kloare spua
ealoss ma do endlich meine fleckn, hob scho längst rechnschoft obglegt, mecht jetzt diese dunklheit zuadeckn, meine reflexe wuadn zasägt
beseitig meine sölischn wundn, mei vastond spüt ma scho an streich, ziag no imma vü sinnlose rundn, in meim bizarr obsuadn bereich
befrei mi von meina anomalie, hob mi voa meina sucht vaneigt, benötig jetzt dringend a therapie, do i bin wieda moi foisch obzweigt.
d 3) .9/8/9/6+8
steh in da mittn vom niagendwo, des chaos is mit mia vaeint, valia üba mi des kommando, ka beföh geht meah duach, die neavn vaschmutzt und vaschleimt
steh gonz alla voa an grossn toa, des schloss varieglt und vaplombt, suach noch da glockn noch an sensoa, steht scho ois in an buach, des szenario is zabombt
sitz jetzt mittn in ana kugl, vareis in mei vagongenheit, die gegnwoat eakennt kan jubl, die tränen foin dezent, leistn no gnua trauaoabeit
sitz alla voa an blindn spiegl, greif mit da hond duachs trübe glas, berüah des beschädigte siegl, is nua a klans fragment, unbrauchboa is jetzt da kompass
geh auf endlos obgnutzte stufn, in a künstliches paradies, da teifl lockt mit unknrufn, schau duach mei rosa brün, betrocht genau den fümriss
geh jetzt übas wossa zua insl, find doat die ontwoat auf mei frog, in meina hond hoit i an pinsl, wea die foabm vasprühn, in dem surrealn biotop.
e 2) .12/10/10/8 .///9 .7/12/7/10
mecht mi so gean mit deim gedächtnis valinkn, lies dei obgspeichate inspiration, mecht no dei vitalität leatrinkn, nua du bist mei auffongstation
mecht jetzt no so gean dei gedächtnis auswringen, hob damit oi meine lückn ausgfüllt, mecht in deina sonftn quön entspringen, hob fost die realität enthüllt
muass mei ich scho separian, ka peasönlichkeit losst si gean analysian, besitz mei ich goa net meah, moch im lebm scho long ka gegnweah
mecht wieda so gean mit deim keapa vaschmözn, deine begiadn lossn uns vibrian, mecht mi on deina nocktheit eagötzn, wü unsre liebe aktivian
mecht deine erogenen zonen ergründen, fühl diesn unstüboan foaschadrong, mecht mit dia den höhepunkt onzündn, des end wiad donn unsa neionfong
muass mit meim ich spoasom sein, meine peasönlichkeitn vatrogn si net, mei ich hot an dunklen schein, iagendwos is vakeaht aufm schochbrett.
f 1) .7/9/7/10/7 ..4/6/7 / 4/7/8 ...///5//
du host di seah vaändat, host di um hundatochzg grad gedreht, dei liebe is gekentat, dei voodoozauba hot mi umgemäht, host goa kan muskl bewegt
host di wiaklich vawondlt, hob di übahaupt net meah eakonnt, host unsa bond vaschondlt, deine intrign hom mi übamonnt, host auf mia dei zeichn prägt
bist wie austauscht, fühl mi ständig berauscht, iagendwea hot di vafluacht, bist wie vahext, löscht afoch unsan kontext, leb voa dia in ständiga fuacht
host di scho längst gehäutet, host dei wache schoin vagrom, hob da nie wos bedeutet, transfoamiast di söba zu an phantom, host mi scho kontaminiat
host di weita entwicklt, dei metamorphose hot geklappt, auf dia hots gfunkt und pricklt, deine foin hom sogleich peafekt zuagschnappt, host mi komplett infiziat
host di vastöt, bist goa net meah besöt, iagendwea hot di easetzt, bist wie nei geboan, host di hia söbst auseakoan, hob mi bei dia total vaschätzt.
ch 1d) .11/9/9/10
nua du host mei panik zua explosion brocht, nua du host in mia schmeazn entfocht, nua mit dia is plateau wundaschee, nua wegn dia valia i mein effet
bist wies schwoaze loch des ois giarig vaschlingt, dei blonka hoss hot mi scho umringt, vaschenkst grosszügig dei eifasucht, nua wegn dia homs mi goa net eingstuft
nua du host meine einstich gonz nei vatieft, nua du vaschoast mi hintam dickicht, bist nua mit mia net meah gonz synchron, wegn dia gibts ka konfiguration
bist wie a bestie die zum ongriff pfeift, deine saat is zua blüte gereift, spendest grosszügig dei toxikum, foi nua wegn dia ins delirium.
ch 2c) .7+7/7+14
des winzigste fermion, is dunkl materiell, die endgültige vision, beschreibt hypothetisch des end vom wödoi gonz foamell
die sonfteste tränenspua, is vasoizn bittasiass, übawindet an parcour, om bodn detonians suizidal voa deine fiass
da fein obgrundete keim, roit scho long duach zeit und raum, eastroiht in an grön schein, vaglüht ois supanova in an endlosn oiptraum
da leise sonore ton, aus muttas fruchtboastn bauch, mutiat zum chamäleon, mündet in an letztn infeanalischn amoklauf.
ch 3b) .7/8/7/11
bist da gegna und da freind, bist da mangl und da gewinn, host meine gfühle vaneint, mei unvoiständigkeit hot ka disziplin
bist da feind und kontrahent, bist da vaschwommene kontrast, vüz schwoch is mei fundament, mei hysterie londet meistens im morast
du bist himml und feia, bist da plan und die qualität, zamoimst mei obmteia, mei infektion is a echte rarität
bist da tod und des lebm, bist die wunde die nie vanoabt, loss mei sö net entschwebm, meine manien san wieda ziemlich eastoakt.
ch 4a) .6/7+5/15 ....8/8/8/9
drift ob ins niemondslond, in a sötsome zone mit geschmoiznem sond, und des lebm tropft ois vagossne flomme aus meina hond
gleit ob bis on den strond, in a skurrile zone ohne horizont, und des lebm träuflt ois schwoches rinnsal aus meina hond
vaia mi auf meim pfad, in da extremen zone mit an schmoin grat, und des lebm rieslt ois schneeflocke in a sonnenbad
valoss den wiakungsgrad, in da komischn zone ohne resultat, und des lebm vasickat ois eiskristoi beim sonnenbad
befind mi auf an sichren kuas, du lächlst und winkst ma zum gruass, do du host mi goa net ongschaut, host nua no den soagdeckl vabaut.
 
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
geschrieben am 24./25./26./27./28./29./30. juni // 01./02./03./04. /05./06. juli 2019.pk. ~ überarbeitet am 11. november 2023.pk.
copyright by philipp kirschner.pk. ~ untermalt mit musik von abnormality, archspire, black tongue, congenial anomalies, neuropsy, organectomy, rings of saturn, wormed.
 
************************************************************************************************************
 nochmals ein herzliches dankeschön für euer interesse, für eure lange treue, euren oftmaligen besuch und für eure zeit, die ihr alle ins lesen und übersetzen dieser mundartigen texte steckt. vielen lieben dank dafür.

...und ich habe noch eine grosse bitte.

bleibt mundartig gesund und bleibt mir weiterhin gewogen.

euer philjazzmetal, dialectiloquax, der mundartige.