Samstag, 27. April 2019

266. | festgnoglt und zasägt.


liebe mundartige gemeinde, danke für deinen besuch und dass du dir meine texte auf diesem wege interessieren. ich will euch gar nicht zu lang auf die folter spannen, hier ist der nächste text aus nebelberggräber auch schon.
wünsche euch ein spannendes leseabenteuer:

>>>>>>>>>>>>>>>>>>>>>>>>>>>><<<<<<<<<<<<<<<<<<<<<<<<<<<<

266. | Festgnoglt und zasägt.

Tiaf in mia spia i an leisn zoatn tiafn ton, muass die augn schliessn, damit si die musik entfoitn konn
Tiaf in mia spia i a harmonisch sonftes vibrian, muass die augn schliessn, damit die trommln rhythmisch applaudian
Tiaf in mia spia i a wohlig woame müde glut, muass die augn schliessn, damit wean die flommen zu ana flut
Tiaf in mia spia i a univeasale freiheit, muass die augn schliessn, damit si die toleranz söbst einreiht.

Tiaf in mia spia i a weiches zahmes sochtes schnuan, muass die augn schliessn, damit kummts endlich auf temperatuan
Tiaf in mia spia i a behutsames mildes ziehn, muass die augn schliessn, damit konn des zwickn-zwackn entfliehn
Tiaf in mia spia i an monoton juckendn stich, muass die augn schliessn, damit wiads zu an einschneidendn strich
Tiaf in mia spia i gewoitig stoake höllnquoin, reiss wüd die augn auf, mei dröhnenda schrei is ungehöat zafoin.

      Diese explosion von extrem rasenda pein, foaht ma blitzschnö ins hian und eastoat zu an gestein
      Diese explosion von immens stechenda quoi, rast duach mein keapa und is vü schnölla ois da schoi
      Diese explosion von enoam brutala gwoit, krocht mit volla wucht in mei uaoide knochngstoit
      Diese explosion hot nua an schoita umglegt, und scho wiad des lebm und die sö festgnoglt und zasägt.

Tiaf in mia hea i a unhamlich quietschendn laut, muass die augn schliessn, damit mocht die ongst a eiskoide haut
Tiaf in mia hea i a sötsames tiafes gebrumm, muass die augn schliessn, damit wea i net blind, bleib net taubstumm
Tiaf in mia hea i a dumpf dröhnendes donnagroin, muass die augn schliessn, damits net meah auf mei lebm zuaroin
Tiaf in mia hea i a fremdoatig bizarrs geräusch, muass die augn schliessn, damit lieg i wieda moi völlig foisch.

Tiaf in mia hea i an füachtalich ualaudn kroch, muass die augn schliessn, damit wiad da fluss zu an zahmen boch
Tiaf in mia hea i an oahnbetäubendn knoi, muass die augn schliessn, damit provozia i kan wutanfoi
Tiaf in mia hea i an infeanalisch wüdn läam, muass die augn schliessn, damit si die nochboan net meah beschwean
Tiaf in mia hea i gellend schoafes höllengeschrei, reiss wüd meine augn auf, des bluad rinnt aus den oahn friedlich frei.

      Diese explosion von sadistisch koida mocht, zasetzt jede meina zön, sät giftige zwietrocht
      Diese explosion von bestialischa wucht, losst innarein wegfliagn und treibt an zua sucht
      Diese explosion von koitblütig hoata kroft, toapetiat mein vastond und kocht mein rodn lebmssoft
      Diese explosion hot nua a radl bewegt, und scho wiad des lebm und die sö festgnoglt und zasägt.

            Die nägl san varostet, und die sog is stumpf, des hoiz is scho moasch, und i steh mittn im sumpf
            Die nägl san vabogn, die sog hot an sprung, des hoiz is voigsogn, hob wossa in da lung
            Die nägl san brüchig, und die sog is zahnlos, des hoiz is zafressn, woat auf mein todesstoss
            Die nägl und die sog wuadn vom gschrei geweckt, mei lebm und mei sö wean festgnoglt und zasägt.

Tiaf in mia siag i an spiegl dämonisch vahext, muass die augn schliessn, les diesn diabolischn quellntext
Tiaf in mia siag i meine gesomte lebmsgschicht, muass die augn schliessn, damit hob i donn wieda freie sicht
Tiaf in mia siag i meine föhla, von leicht bis schwea, muass die augn schliessn, donn eakenn i east mei feige obweah
Tiaf in mia siag i meine vün sündn unvahüllt, muass die augn schliessn, damit hom si olle oiptraim erfüllt.

Tiaf in mia siag i mei gwissn, rein weiss stroihts heavoa, muass die augn schliessn, die valogne woahheit wiad zum tumoa
Tiaf in mia siag i mein obgrund meina phantasie, muass die augn schliessn, damit zabricht die bruckn in agonie
Tiaf in mia siag i mei innre uah wies longsom schmüzt, muass die augn schliessn, die zeiga hom si mit den zoihn vafüzt
Tiaf in mia siag i mei uaongst in oi iahn foam, muass die augn schliessn, die schweissausbrüch hintalossn gnua noam.

Tiaf in mia siag i des bese, nimmt von mia besitz, muass die augn schliessn, in mein vastond foahn bluadigrode blitz
Tiaf in mia siag i mei eiskoide brutalität, muass die augn schliessn, damit die bestie in mia ois vasteht
Tiaf in mia siag i jede gräueltat im detail, muass die augn schliessen, hoit eam fest, mein bluadrünstig giarign pfeil
Tiaf in mia siag i wie mei hoss höllisch explodiat, reiss wüd meine augn auf, damit mei gesomte kroft expandiat.

      Diese explosion von präzisa obscheulichkeit, vabrennt jedn geringstn funkn zäatlichkeit
      Diese explosion von eisig hoata willküa, befreit donn endlich des eitrig giftige geschwüa
      Diese explosion von exzessiva moadlust, wütet unschuidig, hot ois vagessen, nix meah gwusst
      Diese explosion hot nua an hebl obdeckt, und scho wiad des lebm und die sö festgnoglt und zasägt.

            Die nägl san föhlahoft, dea sog föht biss, des hoiz hot vü lecha, mei lebmsfüm hot an riss
            Die nägl san gebraucht, die sog a beweisstück, des hoiz faulig mit schimml, hob afoch ka glück
            Die nägl san zabrochn, die sog is zasteat, des hoiz is vabronnt, und mei gsicht is schmeazvazeat
            Die nägl und die sog hom des uateil voistreckt, mei lebm und mei sö wean festgnoglt und zasägt.

                  Frisch geschmiedete nägl treibm vaspüt, duach knochn, fleisch und haut
                  Die fabriksneie sog hot wiaklich guad züt, hot jedn neav duachschaut
                  Lieg jetzt aufm kreuz festgnoglt und zasägt, die foita is vatraut
                  Die nägl, die sog und des hoiz san earegt, hom iah genie ausbaut.

Tiaf in mia riach i die ongst, edl, rein, pua und nockt, muass die augn schliessn, damit mi da uainstinkt wieda pockt
Tiaf in mia riach i die seuche, die mi vü quöt, muass die augn schliessn, damit mi da tod do no net auszöht
Tiaf in mia riach i an wollüstign höhepunkt, muass die augn schliessn, damit hot mi da freie schuss ongfunkt
Tiaf in mia riach i die ausgebuat kronka geist, muass die augn schliessn, damit is endgültig mei lebm entgleist.

Tiaf in mia riach i an hauch von toiwütigm hoss, muass die augn schliessn, i gewäah dem fanatismus einloss
Tiaf in mia riach i an höllischn giftign duft, muass die augn schliessn, a vawesenda wind weht aus da gruft
Tiaf in mia riach i an bestialisch geiln gstonk, muass die augn schliessn, sunst vadichtet da nebl mein vastond
Tiaf in mia riach i den woahn teifl in peason, muass die augn schliessn, sunst eawocht in mia da kronke dämon.

      Diese explosion von sönlosa grausamkeit, beschönigt bedenknlos die unboamheazigkeit
      Diese explosion von widawäatigem druck, zaquetscht ois zu an bluadign brei mit rotem schmuck
      Diese explosion von radikala eifasucht, tötet freindlich ohne mitgfüh jede liebesfrucht
      Diese explosion hot nua den schlüssl umdreht, und scho wiad des lebm und die sö festgnoglt und zasägt.

            Die nägl san uaoid, die sog a unikat, des hoiz hot si von söbst auf amoi vasteinat
            Die nägl san vü weat, die sog is a magnet, des hoiz is bereits ausgstoam, stommt von an komet
            Die nägl san heilig, die sog aus reinstem goid, des hoiz is luxus pua, längst gerodet is da woid
            Die nägl und die sog, hom die woahheit vasteckt, mei lebm und mei sö wean festgnoglt und zasägt.

                  Archaische nägl ungezähmt und wüd, vastroihn göttliche kroft
                  Die wissende sog is a oida schutzschüd, trogt in sich a botschoft
                  Lieg jetzt aufm kreuz festgnoglt und zasägt, wea jetzt wieda bestroft
                  Die nägl, die sog und des hoiz wean belebt, füa iahre letzte schlocht.

                        Zasägt und festgnoglt, festgnoglt und zasägt, fost hätt is übalebt
                        Zasägt und festgnoglt, festgnoglt und zasägt, mei lebm hat gebebt
                        Zasägt und festgnoglt, festgnoglt und zasägt, bin mit an fluach belegt
                        Zasägt und festgnoglt, festgnoglt und zasägt, mei lebm woa scho befleckt.

Tiaf in mia spia i an leisn zoatn tiafn ton, muass die augn schliessn, damit si die musik entfoitn konn
Tiaf in mia spia i a harmonisch sonftes vibrian, muass die augn schliessn, damit die trommln rhythmisch applaudian
Tiaf in mia spia i a wohlig woame müde glut, muass die augn schliessn, damit wean die flommen zu ana flut
Tiaf in mia spia i a univeasale freiheit, muass die augn schliessn, damit si die toleranz söbst einreiht.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 03./04./05. dezember 2014.pk.
Überarbeitet am 04. Jänner 2017.pk. – copyright by philipp kirschner.pk.

******************************************************

nochmals ein herzliches dankeschön für euer interesse, für eure lange treue, euren mehrmaligen besuch und für eure investierte zeit, die ihr alle ins lesen und übersetzen dieser mundartigen texte steckt. vielen lieben dank dafür.
und hier wieder die üblichen links:


danke für alles. und ich habe noch eine grosse bitte.
bleibt mundartig gesund und bleibt mir weiterhin gewogen.
euer philjazzmetal, dialectiloquax, der mundartige.