304. | olle sinne.

liebe treuen leserinnen und leser, liebe textmaniacs.
wie versprochen, darf ich euch wieder den nächsten text in der reihenfolge präsentieren. diesmal kein langer prolog. ihr dürft sofort mit dem lesen beginnen.

~~~~~~~~~~~~~~~~~~~~~~~~~~~~~~

304.     Olle sinne.

Bist scho seit vün longen togn untawegs, bist bereits tausende kilometa von mia entfeant

Mei einsome sö vatauscht konkav und konvex, mei valossnes heaz hot die scheene zweisomkeit valeant

Leid scho unta an mindaweatigkeitskomplex, oi meine gefühle hom si scho söbstständig entkeant

Bei deim büd reagia i mit goa kan reflex, meine eiskoidn gedonkn ghean wieda mit liebe aufgwäamt.

Bist scho seit vün longen wochn so weit foat, ka anzige nochricht von dia hot mi bis jetzt eareicht

Mei einsome sö sehnt si noch an liebm woat, mei valossnes heaz hot die eainnarungen vascheicht

Hob mei giarigs valongen scho längst tiaf vaschoat, hob meine wollüstign gefühle scho längst obgstreift

Hob dei büd ohne eainnrung geistlos ongstoat, meine gedonkn schwian zülos umhea, san hohl, floch, mott und

seicht.

      Hob vagessn, wos liebe is, hobs aus meim gedächtnis valoan, da fümriss woa gewoitig long

      Hob vagessn, wie liebe wiakt, mei keapa is scho hoib eafroan, steh stoak zittand voa an obhong

      Hob vagessn, wie liebe locht, olle sinne san kahl geschoan, eakenn ka licht, kan gschmock, kan klong

      Hob vagessn, wie liebe wäamt, von innen gänzlich ohne noam, steh jetzt wieda voam onfong.

Bist scho seit vün longen monatn vaschoin, dei obmteialust kennt kane grenzn und ka end

Meina einsomen sö homs die menschlichkeit gstoihn, mei valossnes heaz wiad schee longsom vawiat und dement

Meine augn san von den tränen scho gonz gschwoin, meine erotischn gefühle brauchn an dirigent

Unta deim büd muass i mi jedesmoi zommroin, meine gedonkn wuadn ausgleat und vom lebmswün obtrennt.

Du gütst seit vün longen joahn ois vamisst, denn auf kan kontinent homs a lebmszeichn entdeckt

Mei einsome sö hot die weisse fahne ghisst, mei valossnes heaz hot si mit panischa ongst ongsteckt

Entwickl mi imma meah zu an masochist, hob meine intimstn gefühle wieda moi befleckt

Dei büd vawondlt mi scho in an nihilist, meine geheimstn gedonkn hob i im stün wieda aufgweckt.

Sie hom di scho seit joahzehntn füa tot eakläat, ka anzige spua, kane knochn wuadn aufgespüat

Mei einsome sö is von da traua aufzeaht, mei valossnes heaz hot si voa sehnsucht söbst fest vaschnüat

Hob mei aufgstaute wut auf di schuidig entleat, meine animalischn gefühle hom di vafüaht

Hob dei büd endgültig tiaf vagrom, weit weggspeat, meine heulendn gedonkn hom die scheenstn tränen geküat.

      Hob vagessn, wos liebe is, wuade aus meim gedächtnis gstoihn, jeds klanste detail is vanicht

      Hob vagessn, wie liebe singt, vagiss beim stöhnen zum luft hoin, unta mia da bodn zabricht

      Hob vagessn, wie liebe lockt, olle sinne san vüz tiaf gfoin, eakenn kan gschmock, kan klong, ka licht

      Hob vagessn, wie liebe tonzt, fedaleicht zwischn liebesboin, da onfong valiat des gleichgwicht.

            Olle sinne san iahra bestimmung beraubt, olle sinne san om lebmshoiz fest ongschraubt

            Olle sinne san im lebm net meah ealaubt, olle sinne hom si im kollektiv entlaubt

            Olle sinne hom des recht auf liebe vaspüt, olle sinne san im schwäazestn loch vaglüht

            Olle sinne wuadn vom dichtn nebl vahüt, olle sinne san beim letztn hauch koid vablüht.

Ea is scho seit vün longen togn vareist, hot bereits tausende kilometa hinta si brocht

Iah einsome sö is wieda moi hoat entgleist, iah valossnes heaz hot scho long net meah voa freude glocht

Iahre tränen hom die reine woahheit einkreist, iahre gefühle übawötign die schwoaze nocht

Sei büd wiad beschützt vom uaoidn wossageist, iahre gedonkn wean von scheenen eainnarungen bewocht.

Ea is scho voa vün longen wochn entflohn, ka hinweis füaht zu sein jetzign aufenthoitsoat

Iah einsome sö wiad iahre neavn bedrohn, iah valossnes heaz wiad von vün ongstzuaständ duachboaht

Sie fühlt si mit iahm lebm net meah synchron, iahre gefühle bekommen afoch goa ka ontwoat

Sei büd vastaubt im uawoid wies chamäleon, iahre gedonkn träumen no imma, san oba längst vaschoat.

Ea is seit vün monatn scho auf da flucht, hintalosst kane spuan, wie vom eadbodn vaschluckt

Iah einsome sö hot vazweiflt noch eam gsucht, iah valossnes heaz is füa so vü hoate schmeazn net befugt

Halluziniat von ana endlos tiafn schlucht, iahre gefühle hom oba net amoi mit da wimpa zuckt

Sei büd vawittat in ana fösign bucht, iahre gedonkn san von da melancholie unbeeindruckt. 

      Hot vagessn, wos liebe is, iah gedächtnis wuade vauntreut, zruck bleibt nua a hoata fösblock

      Hot vagessn, wie liebe geht, da klanste keim wuade vastreut, guad vaschnüat in an engen sock

      Hot vagessn, wie liebe schmeckt, olle sinne homs vaobscheut, eakennt ka licht, kan klong, kan gschmock

      Hot vagessn, wie liebe glüht, die wäame wiad scho longsom koid, da onfong eatrinkt in an trog.

            Olle sinne wuadn jetzt zua gänze ausgräumt, und olle sinne wuadn vom nix eingezäunt

            Olle sinne san jetzt im lebm untasogt, olle sinne wuadn ausm goatn vajogt

            Olle sinne deafn die liebe net meah spüan, olle sinne miassn iah erotik entfüahn

            Olle sinne wuadn brutal gfoitat und quöt, olle sinne wuadn gehäutet und entstöt.

                  Sonfte düfte eafülln die lüfte, beim blitzlichtzuckn und donnagroin

                  Olle sinne mit vü routine, wuadn von da unvanunft bestoihn

                  Hoate stüame umtosn tüame, die füa liebe und harmonie stehn

                  Olle sinne mit lauta stimme, deafn in den sonnenuntagong gehn.

Ea is seit vün longen joahn unauffindboa, gibt kane stichhoitign beweise, doss a no lebt

Iah einsome sö steckt im engen korridoa, iah valossnes heaz is mit soizign tränen zuaklebt

Varostet is scho iah eigna oida motoa, iahre gefühle wean net übaschwemmt, hom net gebebt

Sei büd zafoit schimmlnd im vagessnen tresoa, iahre gedonkn san zaronnen, findn ka eignes konzept.

Ea is bestimmt voa joahzehntn zu staub zafoin, iagendwo guad vasteckt steht übawuchat a grobstein

Iah einsome sö vaschmözt mit den sonnenstroihn, iah valossnes heaz eastroiht nua im voin mondesschein

Zwecklose suche noch rituelln symboin, iahre gefühle bestehn aus schwoazweisse molarein

Sei vablosstes büd eascheint nua no in primzoihn, iahre gedonkn wean des lebm im ewign tod befrein.

      Hot vagessn, wos liebe is, iah gedächtnis wuade vaschleppt, iah fümriss woa gewoitig long

      Hot vagessn, wie liebe fliesst, die hohe flut is längst vaebbt, steht voa an brennendn voahong

      Hot vagessn, wie liebe läuft, olle sinne wuadn geneppt, eakennt ka licht, kan gschmock, kan klong

      Hot vagessn, wie liebe blüht, nua noch befriedigung gestrebt, kniet wieda voam onfong.

            Olle sinne wuadn endgültig ausradiat, und olle sinne hom den valust akzeptiat

            Olle sinne wuadn freiwillig obgesetzt, olle sinne hom iah letzte empfindung gwetzt

            Olle sinne hom die liebe nua no missbraucht, olle sinne hom den letztn atem ausghaucht

            Olle sinne wuadn festgnoglt und zateilt, olle sinne wuadn zum tode vauateilt

                  Heabe grüche belebn flüche, mit woiknbänkn voi wüdm hoss

                  Olle sinne foin aus da rinne, in a bestialisches chaos

                  Wache winde täuschn mit finte, damit die leidnschoft implodiat

                  Olle sinne mit leidnsmiene, san im sonnenuntagong krepiat.

                        Im schottn unta an uaoidn baum, liegn zwa gräba nemanond

                        Olle sinne san vaeint in dem traum, olle sinne reichn si die hond

                        Im schottn umgebm vom moaschn zaun, brennen zwa keazn nemanond

                        Olle sinne vagrobm des söbstvatraun, olle sinne schlofn tiaf im sond.

Bin scho seit vün longen togn untawegs, bin bereits tausende kilometa von dia entfeant

Mei einsome sö vatauscht konkav und konvex, mei valossnes heaz hot die scheene zweisomkeit valeant

Leid scho unta an mindaweatigkeitskomplex, oi meine gefühle hom si scho söbstständig entkeant

Bei mein büd reagia i mit goa kan reflex, meine eiskoidn gedonkn ghean wieda mit liebe aufgwäamt.

                        Im schottn unta an uaoidn baum, liegn zwa gräba nemanond

                        Olle sinne san vaeint in dem traum, olle sinne reichn si die hond

                        Im schottn umgebn vom moaschn zaun, brennen zwa keazn nemanond

                        Olle sinne vagrobm des söbstvatraun, olle sinne schlofn tiaf im sond.

 ___________________________

Geschrieben am 13./14./15./16. juli 2015.pk.

Überarbeitet am 15. jänner 2017.pk. – copyright by philipp kirschner.pk.

*************************************

danke für eure treue und euren mut, jedesmal die neuen texte zu lesen und zu entwirren. hoffe, es ist nicht allzu schwer, meine mundarttexte zu lesen. in diesem sinne. danke.
euer phil

hier wieder die üblichen verdächtigen links:

www.facebook.com/philjazz

twitter.com/philjazmetlyric

https://plus.google.com/u/0/104160599138757338426

303. | chaos.

meine lieben leserinnen und leser, liebe verschworene gemeinschaft von lesenden der mundartdichtung und anderen lyrischen mundartigen ergüssen. ich danke euch sogleich für euren besuch hier auf diesem blog und für euer interesse, immer wieder den weg hierher gefunden zu haben. nach einer längeren durststrecke werde ich sogleich den nächsten kommenden text für euch hier präsentieren. wünsche euch eine spannende unterhaltung.

~~~~~~~~~~~~~~~~~~~~~~~~~~~~~~~~~~~~~~

303.     Chaos.

I wüs net wissn, wü afoch nix meah eafoahn, mecht nix riachn, schmeckn, hean oda sehn

Wea nix vamissn, wü ma endlich ois easpoan, mecht da friedlichn stün die föhla gestehn

Fühl mi zarissn, wü ma nix meah aufbewoahn, da wind soi mei vagongenheit vawehn

Wü nix vagiessn, die nocht wiad si no aufkloan, muass afoch nua no den zeiga weida drehn.

Wü die kötn spian, die hitz raubt ma mein vastond, mecht jetzt im regn und schnee badn gehn

Wü nix meah riskian, um mi hearum nua treibsond, wea kane höfendn händ meah laut onflehn

Brauch net meditian, vanein die wöd, sunn und mond, denn mei steanensegl wiad si aufblähn

Muass mi no maskian, siag net üban hechstn rond, deaf jetzt die kloare feansicht jo net vaschmähn.

      Steh gonz allan zwischn lebm und tod, steh gonz allan zwischn gebuat und grob

      Steh gonz allan zwischn friedn und krieg, steh gonz allan zwischn valust und sieg

      Steh gonz allan zwischn schwäazn und licht, steh gonz allan zwischn heilkraut und gift

      Steh gonz allan zwischn liebe und hoss, steh splittanockt in meim eignen chaos.

Wü kan meah beleahn, ka nochricht soi mi meah quön, hob gnua von katastrophn jeda oat

Wü a kan bekeahn, kana soi si herausschön, jede haut is ondas, amoi wach donn hoat

Muass jetzt ois auslean, mecht jede hüfe zruckstön, brauch von eich a ka aufmuntarungswoat

Mecht nix meah gewäahn, deaf mi jetzt net meah vawöhn, mei neibeginn hot si no net offnboat.

Wü niemond schockian, hob jetzt mei vatraun valoan, mecht von eich niemondn vauateiln

Wü kan irritian, zasteat san meine sensoan, leida kennan sa si net meah ausheiln

Wü ois minimian, hea scho ständig a rumoan, konn mi oba leida net meah obseiln

Mecht nix meah probian, deaf jetzt jo net meah nochboahn, deaf hia afoch net meah länga vaweiln.

Wü niemond onschrein, mecht von eich kan meah vaschmähn, kana soi si nua wegn mia empöan

Mecht mi jetzt befrein, muass no so vü samen sähn, muass endlich von da vagongenheit obschwöan

Brauch kane arznein, muass den rasn wieda mähn, konn eich mit meina gschicht net meah betöan

Wü eich net entzwein, konn die wundn net zommnähn, deaf diese traute harmonie net zastöan.

      Steh gonz allan zwischn lebm und steam, steh gonz allan zwischn gloswond und scheam

      Steh gonz allan zwischn gleichklong und kroch, steh gonz allan zwischn gebiag und loch

      Steh gonz allan zwischn dunkl und hö, steh gonz allan zwischn longsom und schnö

      Steh gonz allan zwischn liebe und hoss, steh splittanockt in meim eignen chaos.

            Dieses chaos umhüllt mi mit oi seina kroft, dieses chaos fühlt mein vastond, mei innre schlocht

            Dieses chaos hot mi glei in a foin glockt, voa diesm chaos steh i gonz allan splittanockt

            Dieses chaos is pletzlich üba mia eingstüazt, dieses chaos is mit an labyrinth gewüazt

            Dieses chaos hot ma mei zukunft wüd zahockt, voa diesm chaos steh i gonz allan splittanockt.

Wü von eich kan rat, hob mei weisheit längst vakauft, den sinn des lebms hob i scho vaschenkt

Woat aufs resultat, bin scho vüz tiaf runtataucht, die schwean stana homman weg vasenkt

Steh beim stochldraht, mei bluad hot kan laut ausghaucht, meine tiafn wundn hom mi foisch glenkt

Fühl mi söbst schochmatt, olle schmeazn san varaucht, hob oi meine empfindungen eatränkt.

Mecht den wind berüahn, mecht aufm licht weitaziehn, meine kräftign fliagl trogn mi foat

Muass ois enga schnüan, konn ausm sumpf net entfliehn, hob den widaspruch spieglvakeaht ongstoat

Wü mi söbst entfüahn, muass mi scho wieda hinknien, meine fedan san mit da sunn vaschmoat

Konn den nebl spüan, da regn eazeugt melodien, hätt ma fuachtboa gean ois weitare easpoat.

Muass mei sö onschnoin, mecht die ewigkeit vafiahn, wü mi aus diesa sockgossn foatstöhn

Deaf nix meah einzoihn, wü mein nomen eingravian, deaf niemondn mei geheimnis eazöhn

Wü ois übamoin, mecht meine feind imitian, muass mei innre finstanis wieda eahön

Mi deaf nix befoin, muass mei hoffnung regulian, deaf mei endgültigs zü afoch net vaföhn.

      Steh gonz allan zwischn lebm und schlof, steh gonz allan zwischn gabe und strof

      Steh gonz allan zwischn ruhe und läam, steh gonz allan zwischn sunn, mond und stean

      Steh gonz allan zwischn schottn und schein, steh gonz allan zwischn groshoim und stein

      Steh gonz allan zwischn liebe und hoss, steh splittanockt in meim eignen chaos.

            Dieses chaos vaschlingt mi mit oi seina gwoit, dieses chaos liest mein vastond, mei gonze gstoit

            Dieses chaos hot mi glei in a netz vapockt, voa diesm chaos steh i gonz allan splittanockt

            Dieses chaos hot mi von oin seitn einkreist, dieses chaos hot meine gedonkn vaspeist

            Dieses chaos hot mei zukunft eiskoid vazockt, voa diesm chaos steh i gonz allan splittanockt.

                  Die wüafl san vüz tiaf gfoin, des chaos hot den knopf wieda moi drückt

                  Da boch is seah stoak ongschwoin, des chaos hot den regn beigefügt

                  Da pfeil suacht si scho sei zü, des chaos hot den bogn übasponnt

                  Die figua valiat im spü, des chaos duachbricht afoch jede wond.

I wü nix meah schreim, a vom lesn hob i gnua, mecht endlich die monotonie kopian

Muass hia zruckbleim, foig da unsichtboan spua, deaf jede hohe stufn im kreis foamian

Mecht die ongst vatreim, reiss on meina lebmsschnua, muass den dünnen fodn gonz akzeptian

I triff ka züscheim, valetz jedn treueschwua, wü meine vün lügn net meah duplizian.

Wü nix meah bereun, hob meine schritte scho zöht, da zruckglegte weg vom nebl vahüllt

Mecht liebe vastreun, mei heazschlog hot si eahöht, die eifasucht hot dröhnend laut in mia brüllt

Muass mei boot vatäun, hob die ruada scho bestöt, meine woogschoin san scho zua gänze befüllt

Deaf des grob betreun, hob diesn stein söbst ausgwöht, da regn hot die tränen weit foatgespült.

I wüs net wissn, wü afoch nix meah eafoahn, mecht nix riachn, schmeckn, hean oda sehn

Wea nix vamissn, wü ma endlich ois easpoan, mecht da friedlichn stün die föhla gestehn

Fühl mi zarissn, wü ma nix meah aufbewoahn, da wind soi mei vagongenheit vawehn

Wü nix vagiessn, die nocht wiad si no aufkloan, muass afoch nua no den zeiga weida drehn.

      Steh gonz allan zwischn beginn und wond, steh gonz allan zwischn wön und strond

      Steh gonz allan zwischn ebbe und flut, steh gonz allan zwischn wunde und blut

      Steh gonz allan zwischn obm und unt, steh gonz allan zwischn beag und obgrund

      Steh gonz allan zwischn liebe und hoss, steh splittanockt in meim eignen chaos.

      Steh gonz allan zwischn lebm und tod, steh gonz allan zwischn gebuat und grob

      Steh gonz allan zwischn friedn und krieg, steh gonz allan zwischn valust und sieg

      Steh gonz allan zwischn schwäazn und licht, steh gonz allan zwischn heilkraut und gift

      Steh gonz allan zwischn liebe und hoss, steh splittanockt in meim eignen chaos.

            Dieses chaos frisst mein keapa mit haut und hoa, dieses chaos seziat mein vastond, mein oitoa

            Dieses chaos hot mi in tausend stücke zahockt, voa diesm chaos steh i gonz allan splittanockt

            Dieses chaos hot mi in da mittn einzwängt, dieses chaos hot die reine woahheit vadrängt

            Dieses chaos hot jetzt mein lebmssinn geknackt, voa diesm chaos steh i gonz allan splittanackt.

                  Die wüafl san vüz tiaf gfoin, des chaos mocht die illusion peafekt

                  Die woahheit is heavoaquoin, des chaos hot des spieglbüd vasteckt

                  Die wiaklichkeit is a traum, des chaos is reinste spekulation

                  Die blätta vafäabm den baum, des chaos is die letzte dimension.

                        Dieses chaos braucht kan schlüssl, ka passwoat, ka sichaheitsschloss

                        Dieses chaos heascht üba raum und zeit, jedn zusammenstoss

                        Dieses chaos braucht ka rettungsseil, ka schwimmwestn und ka floss

                        Dieses chaos spüt mitm univeasum woahheit und mythos.

______________________________________________

Geschrieben am 07./08./09./10./11. juli 2015.pk.

Überarbeitet am 15. jänner 2017.pk. – copyright by philipp kirschner.pk.

****************************************

nochmals ein grosses dankeschön für euren besuch.
hier wieder die üblichen links:

www.facebook.com/philjazz

twitter.com/philjazmetlyric

https://plus.google.com/u/0/104160599138757338426