412. | phantom
1) .13/13/15
fühl mi gfongen wie in an endlosn labyrinth, beweg mi in ana spiroin die niagends beginnt, üba mia des monsta des die fädn mitanond vaspinnt
die wänd drückn auf mei zoate sö engen mi ein, gänzlich valossn in meim sinnlos profanen sein, unta mia bricht mei dünna moascha gschwächta bodn ein
lauf voa meim lebm davon kumm oba net vom fleck, flücht voa meina vaflossnen zeit treibt mi in a eck, in mia vabreitet si a giariga schwoaza zäha fleck
mecht mei gschicht jetzt obstreifn vabrenna tiaf vagrom, die ongst schleicht um mi herum vajog do des phantom, registria scho long dieses charaktaristische symptom.
fühl mi gfongen wie in an wüafl ohne ausloss, die flächn da seitn spiegln mein schlofendn hoss, des monsta stiftet gean a wüdes wüstes chaos
die maua ruckt imma näha siag vaschwommne zoihn, mecht endlich die schwoazn stön mit foabm übamoin, somml die oiptraim in da winzign opfaschoin
valia mi in depressionen stüaz mi in manien, konn aus dem rotiarendn kreislauf net meah entfliehn, dieses magnetföd is a ständigs eabittates tauziehn
mecht die seitn zreissn zaschneidn und tiaf vagrom, die ongst umhüllt mi scho fest vajog do des phantom, identifizia do endlich dieses typische symptom.
ch 1a) .8+7 (7+8)/12/5+6 (6+5)
beend endlich diese schmeazn, diese unendlichn quoin, mecht endlich schwerelos und befreit ins licht foin, mecht ois ausmeazn, a dieses helle stroihn
pflosta mein weg mit blumen, deina liebe und deina glut, injizia ma dein glaubm gib ma wieda mut, die geheimen runen, heiln die bese brut
beend diese foitarungen, diese hoatn quölarein, mecht ma endlich söba füa mei lebm vazeihn, meine läutarungen, soin mi jetzt befrein
entfean die barrikadn, hüadn stana und vün foin, des phantom is aufm weg und kummt mi scho hoin, brauch jetzt brigadn, die mi wieda onschnoin.
fühl mi gfongen wie in an zähflüssign treibsond, meine fiass spian kan grund ruda hektisch mit da hond, des monsta vafoigt mi bis in mein vatrocknetn vastond
vasink imma tiafa in brutale phantasien, eastick gonz longsom in fragiln anomalien, vawickl mi ständig in hysterisch besessne phobien
mei lebm wiaft mi aus da anzign umlaufbahn, treib gedonknlos duach mein übalebmsroman, hob füa die vün lean seitn kan zukünftign plan
mecht jeds woat jedn sotz wieda löschn tiaf vagrom, die ongst is mei begleita vajog do des phantom, lokalisia do endlich dieses spezifische symtom.
4) .13/13/15
fühl mi gfongen wie in an ufalosn morast, diesa sumpf aus söbstvoawüaf sägt scho om fahnenmast, des monsta hot oi mei positive einstellung vaprasst
des splittan und krochn dröhnt deutlich on meine oahn, do mei reaktionsgeschwindigkeit is scho eingfroan, bei mia gibts ka anzige reaktion von meinen sensoan
mei ruckn is krumm von da lost da vagongenheit, hob no imma schwea zu trogn von meina woahheit, schlepp mi mit lautem gestöhn duach mei kronkhofte einsomkeit
b 1) .5/6/6/6 / 8/8 ....12/12/8/9
bin scho wie gelähmt, hob ka gfüh auf da haut, hot si weita ausdehnt, hob scho wieda obbaut, mei kokon is afoch vüz weich, vasink longsom im schottnreich
hob in mia ka kroft, bin scho völlig ausbronnt, woat nua auf die botschoft, do sie bleibt uneakonnt, konn mei sein net meah decodian, loss mei wiaklichkeit patentian
bin scho wie gelähmt, ka gfüh meah in mia drin, bin miad hob laut gegähnt, find hia afoch kan sinn, da augnblick is glei vapufft, hob mei schicksoi scho laut vaflucht
reseavn san gstoihn, ois is so monoton, wiad mi donn übaroin, vajog jetzt des phantom, ghea jetzt scho dringend exoaziat, wuade wieda hypnotisiat
treib wünlos im dichtn nebl umanond, befind mi scho wieda im ausnahmezuastond, füa mi gibts ka noamalität, sitz auf an schwebendn schauklbrett
da wind übasetzt des flüstan vom wökn laub, hob auf die foabm des regnbogns vatraut, in mia foische magie eaweckt, hob scho wieda mei eignes bluad gleckt.
ch 1b) .8+7 (7+8)/12/5+6 (6+5)
beend endlich diese marta, und diese ewige pein, mecht ma jetzt endlich des friedliche licht ausleihn, wäa gean autarka, bei meinen metzelein
streu ma blumen auf mein weg, schenk ma dei gonze feiakroft, impf mi gegn jede seuche jedn giftstoff, da blossa woiknsteg, hot mi scho bestroft
beend endlich dieses stechn, die bestialische not, mecht jetzt endlich füa dieses unglück a vabot, meine vasprechn, hom goa ka echolot
varäum die vün blockadn, schronkn foigruabm und des netz, des phantom is aufm weg vatritt des gesetz, mei aussnfassade, a hohes trapez.
des phantom vafoigt mi scho seit meina gebuat, bleibt unsichtboa, is übaroi hot mi scho onknuat, wie in zeitlupm setzts scho on zum endspuat
des phantom is mei feind spoitet scho mein vastond, mocht mi varuckt, drängt mi scho on den äussastn rond, vafinstat scho mein geistign horizont
des phantom hintalosst hia afoch kane spuan, hot ois vawischt, spüt mit mia schach mit seinen figuan, hot unidentifiziaboare struktuan
des phantom hot mi von oin seitn einkreist, bin wie eastoat, mei kronkheit is scho wieda entgleist, bin wieda ins komatöse trauma greist.
fühl mi gfongen wie in da woikn aus dichtm rauch, da ausbruch des vuikans vauasocht mein amoklauf, des monsta nimmt enoame kollateralschädn in kauf
die explosion hot mit gonza gwoit so vü zasteat, meine umtriebign exzesse hom mi beleaht, steh zua positivn diagnose stets seitnvakeaht
so vü noabm zian mein keapa hob so vü bereut, konns jetzt oba net meah zruckdrehn bin scho z‘schwoch und z’oid, die defekte leita füaht mi direkt zum klaffendn spoit
6) .13/13/15
fühl mi gfongen wie in an blindtrübm spieglbüd, die ondre seitn zakrotzt scho den eisanen schüd, des monsta hot a skruplloses sadistisches gemüt
des glos hot scho riss vabindn si zua allianz, die feinen fädn strangulian scho die grundsubstanz, füa die eiseskötn ois bese gibts a nuitoleranz
tauch ein in pessimismus schwimm in melancholie, des boot is moasch und leck treib mittn in agonie, bod in da entgleitendn katastrophaln therapie
mecht die scheabm zastückln, einschmözn, tiaf vagrom, die ongst bewocht mei lem, vajog jetzt des phantom, studia endlich dieses auffällig schizophrene symptom.
bin scho wie gelähmt, ka gfüh in meina schoin, hob mi vüz weit rausglehnt, wea jetzt nix meah vastreun, mei geflecht is vüz weich gestrickt, bin afoch vü zu oft einknickt
bin scho wie gelähmt, ka gfüh meah in meim heaz, vawüst jeds element, mit mia gehts steu obwäats, vü zu schnö is die zeit varaucht, mei schicksoi hot glei mi zommgstaucht
treib völlig easchöpft in neblschwadn umhea, in meina notlog is mei lem äussast prekäa, hob nie die tretmühle bedient, meine sinne san taub stumm und blind
die eadschicht eazöht ma von da vagongenheit, des steanenlicht hot mi ins geheimnis eingweiht, so vü foamln gehn no valoan, mei eignes bluad deaf jo net eastoan.
d 1) .22/22
a psychische störung mutiat zu ana zwonghoftn eingebüdetn dimension, diese sinnestäuschung transfoamiat si zu ana oiptraumhoftn düstaren vision
utopische phantasterein wütn pausnlos duach jeds anzelne schwoche genom, a mystische askese peitscht und geisslt den keapa zum bluadign chamäleon
unrealistische illusionen vamischn si zu an imaginäan phantom, hobln die gsundn logischn fragmente ob und easchoffn so des armageddon.
ch 1a) .8+7 (7+8)/12/5+6 (6+5)
beend endlich moi des leidn, jedn traurign moment, mecht ins wäamende licht springen gonz ungehemmt, muass mi vakleidn, füa mei experiment
pflonz bunte blumen neman weg, spend liebe in reinsta foam, moch mi immun gegn jede letaln spoan, hob diesn beleg, füa meine töpfawoan
beend des schlechte gwissn, die vün soagn jeds problem, mecht jetzt endlich diesn schwean onka hochhem, mei nodlkissn, losst si net meah umdrehn
beseitig wälle und bremsn, jedn klanstn widastond, des phantom is aufm weg hot no kan vaschont, die gschliffne sensn, hot no jedn belohnt.
des phantom beschottet mi scho mei lebm long, bleibt guad vasteckt, belogat mi wie a bumarong, tyrannisiat mi hintam gschlossnen voahong
des phantom is mei rivale is aggressiv, vadreht mein geist, drängt mi auf a schoafkantiges riff, hot meine gonzn synapsn fest im griff
des phantom hot olle beweise liquidiat, hot ois zasteat, jeds zeichn aufm brett ausradiat, hot nua on mia sei exempl statuiat
des phantom hot mi von oin seitn umringt, gonz vahäatet, mei kronkheit scho im chaos vasinkt, hob dem nocktn graun im tiafn schlof nochgwinkt.
mecht jetzt ebbe und flut beheaschn und regian, mecht sonne und mond lenkn und dirigian, mecht oi meine schwiarigkeitn pulvarisian
mecht unsan planetn keimfrei säuban und heiln, mecht unsre galaxie mit goa kan meah teiln, mecht mit dia alla auf diesa insl vaweiln
mecht des phantom endlich onfossn und berüahn, mecht des phantom jetzt endlich moi übafüahn, wü endlich dieses phantom fongen und vaschnüan
hob schweissausbrüch meine phobien san autonom, vajog jetzt bitte dieses vadommte phantom, do sei schaurige aura hot imma saison.
fühl mi gfongen wie im auge von an wiablstuam, beobocht die sündign föhla vom hohn tuam, des monsta vabeisst si in mia wie a metalonga wuam
jede stufn a symboi füa mei moabides lem, oagien duachwühln giarig mei gedonknsystem, entsend gean meine inhumanen radikaln armeen
hob mei wut mein zoan bis zua unkenntlichkeit ausgrott, meine geistesblitz donnan dröhnend laut übas boot, betrocht mi ois kriegarischn psychopatischn hoibgott
mecht des mosaik niedareissn und tiaf vagrom, die ongst nimmt von mia besitz vajog jetzt des phantom, sequenzia jetzt des parasitäa infektiöse symptom.
8) .13/13/15
fühl mi gfongen wie in an vüz dichtn engen soag, somml olle sinistren träume in nua an koab, des monsta wittat des zittan des giftige knochnmoak
hob die suizidgfäahdetn sön wieda hambrocht, kana hot die vaschlossnen tüan und fensta aufgmocht, die rutschig glitschige steilkuavn hot si net meah obgflocht
ziag die fädn voasichtig aus an schleimign brei, daron hoftet a valogne gebetlitanei, offnboa nua dem engstn ziakl mei schwoaz-weiss-molarei
mecht endlich jede eainnarung gonz tiaf vagrom, hob da ongst nie gonz vatraut vajog jetzt des phantom, spezifizia endlich dieses neurologische symtom.
b 3) .5/6/6/6 / 8/8 ....12/12/8/9
bin scho wie gelähmt, ka gfüh in diesa schicht, hob mi danoch gesehnt, do vaspeat is mei sicht, mei ponza is scho längst aufknackt, bin drunta hüflos splittanackt
hob jetzt den knopf druckt, des graun hot noch mia gsuacht, mit kana wimpa zuckt, hob trotzdem grosse fuacht, deaf die faktn net meah beschmian, muass mei existenz renovian
drüba net nochdocht, foig da todesschwadron, des wiad mei letzte schlocht, vajog jetzt des phantom, stecks ungeheua ins valies, zeig ma endlich mei paradies
eatrink scho hüflos in an glottn nebltopf, mei gebrochna finga druckt auf den alarmknopf, hob nie longeweile vaspüat, hob scho mei melancholie varüaht
a moagntautropfn hot scho wunda bewiakt, die hohn gräsa hom si sonft griebn und ziapt, leare phrasn träufln aufd sö, nua vatrocknets bluad auf meim fö.
d 2) .22/22 ...7+6/7+7/7+6 ..6+5/5+9 / 8/8
a neavliche belostung mutiat zu an besessnen übanatüalichn zeitraum, die halluzinationen transfoamian si zu an kahln vatrocknetn lebmsbaum
imaginäre eascheinungen leidn unta diesm kreativn pseudonym, a eisan strenge disziplin prüglt und züchtigt jede zön zu matschign pupün
wiaklichkeitsfremde söbsttäuschungen vamischn si donn zu an surrealn phantom, raspln die marodn schuppm von da haut untabricht den takt vom lebmsmetronom
die belostung übasteigt die hechstn atmosphäan, da ost hot si scho geneigt bis zu den gereiftn äahn, da ausgehöhlte baumstomm saugt ois auf wie a schwomm
diese störung vauasocht schädn gonz unbewusst, da brennende keazndocht hot den intellekt varusst, des lodande flommenmea frisst diese gegnweah
da pfad is voagebm ohne kompromiss, dieses entschwebm gelingt sogoa mit ana dosis, diese tour wiad da höhepunkt, hob donn voi ins schwoaze eintunkt.
e 1) .10/9/10/11
konn die mauan und wänd net bezwingen, symbolisian des innre gebiag, aus hoffnungslosa kapitulation, es föht a stabile lebmskonstruktion
wü nua endlich von da bruckn springen, gleit donn frei schwebend in meim beziak, ohne offnsichtlicha reaktion, die londung hot a komplette dysfunktion
muass unbedingt den schottn duachbrechn, die ondre seitn is unbekonnt, mei neigia eaweckt mi aus tiafm schlof, im delirium gibts a abstrakte strof
deaf jetzt jo net dieses licht bestechn, die stroihn fliagn ma sunst aus da hond, und flüchtn zu an explosivn stoff, vawondlt si zum exzessivn moloch
soi endlich moi mitm phantom redn, hot mi scho die gonze zeit eapresst, wegn meina rauhn vagongenheit, hob oft bodet in vagessna grausomkeit
mecht jetzt zu diesm oat namens edn, feia doat des aufeastehungsfest, hob mi ja scho in die schlonge eingreiht, da feind ealedigt sei schmutzige oabeit.
ch 1d) .8+7 (7+8)/12/5+6 (6+5)
beend endlich die traua, des elend die trostlosigkeit, mecht endlich im woamen licht bodn bin bereit, die lebmsdaua, trogt scho des totnkleid
pflück die blumen aufm weg, deck mi mit liebe gonz wach zua, beschütz mi voa da arznei voa diesa tinktua, öffne des paket, leist do endlich den schwua
beend die foische moral, die vün lügn den betrug, mecht endlich aussteign aus dem vakeahtn zug, voifüah des ritual, füa den letztn spuk
spreng jeds hindanis ind luft, jeds staubkoan mocht sei odyssee, des phantom is aufm weg mit seinen armeen, spia die eiskoite gruft, eakenn iah emblem.
des phantom lauat hinta jedm baum und strauch, bleibt konzentriat, is woch bis zum zoatn moagnhauch, seine schoafn woffn san oft in gebrauch
des phantom is mei böses ich mei spieglbüd, zahockt mei hian, drängt mi koitblütig vom sichren schüd, hot bereits oi meine neuronen vabrüht
des phantom hot jedes symboi bestens eakannt, hot ois vaneint, jedn anzelnen schritt im voraus plant, woa in ollen belongen seah militant
des phantom hot mi von oin seitn einzäunt, konn mi net rüahn, mei kronkheit hot die heilung vasäumt, des gesomte nichts hot si in mia aufgschäumt.
mecht üba gezeitn gebietn sie regian, mecht kometn onweisn und dirigian, mecht oi meine komplikationen boykottian
mecht die mutta eadn reinign und kurian, mechts univeasum nua füa mi reseavian, loss mi om sondstrond nua von dia elektrisian
mecht des phantom ongreifn und keapalich fühln, mecht den schlomm vom phantom so richtig aufwühln, wü jetzt des phantom endgültig hinuntaspüln
hob akutes heazrasn an beklemmendn strom, vajog endlich dieses beschissne phantom, vafoigt sei eigne eaboamungslose mission.
schliess kuaz die miadn augn, und scho foaht des phantom duach mein keapa in mein vastond, schwenk die weisse fahne mittn on da front
wü net imma ois glaubm, do des phantom hot scho seit ewigkeitn in mia gwohnt, weaf des weisse hondtuach hot si scho söbst geklont
schliess nua füa kuaz die augn, und scho hot mi des phantom in seina psychischn gwoit, bin wie zu sta eastoat bei seim hintahoit
wü ma die zeit zruckraubm, do des phantom hot oi meine ängste auf mia festgschnoit, da sta hot mi zadruckt in diesa onstoit
schliess nua kuaz meine augn, und scho stüt des phantom mei knopp bemessne lebmszeit, vahindat diesn bund unsra zweisomkeit
wü do no net vastaubm, do des phantom hot mei lebm scho wo ondas eingreiht, stosst mi aus unsra intimen voikommenheit.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
geschrieben am 05./06./07. november 2017 /// 25. mai 2018. überarbeitet am 08./09./10. dezember 2021.pk
copyright by philipp kirschner.pk ~ untermalt mit musik von christian mcbride (b), vincent hering (as).
**********************************************************************************
nochmals euch allen da draussen ein herzliches dankeschön für euer interesse, für eure lange treue, euren mehrmaligen besuch und für eure investierte zeit, die ihr alle ins lesen und übersetzen dieser mundartigen texte steckt. vielen lieben dank dafür.
...und ich habe noch eine grosse bitte.
bleibt mundartig gesund und bleibt mir weiterhin gewogen.
euer philjazzmetal, dialectiloquax, der mundartige.
Keine Kommentare:
Kommentar veröffentlichen