285. | valoane sön.

285. | Valoane sön.

1)
Gedämpfte, flüstand hauchende heisare stimmen, sprechn des gebet im choa in ana litanei
Schwoch glühendes göb-oranges leuchtendes glimmen, übamoit in da dunklheit die obschlochtarei
Des ewig gleiche spü vom valian und gewinnen, entfocht a dröhnend betäubendes schmeazensgeschrei
Zruck bleim valoane sön in uaoidn ruinen, hom gnua vom foitan, masochistischa quölarei.
2)
Schweare grosse regntropfn foin auf des schlochtföd, schwemmen die letztn rodn spuan in vagessnheit
Die via joahreszeitn hom die zeichn auseawöht, iahre deckn wexln bis zua unkenntlichkeit
Die ollaletztn knochn san on da wond zaschöt, vasteinan longsom in da endlosn einsomkeit
Und die valoanen sön hom si scheinheilig vastöt, hom gnua von iahra beraubtn, valognen freiheit.
ch 1a)
      Und a dichta nebl befoit dieses kronke lond, streichlt wach und zoat die valoanen sön mit da hond
      Dicke tränen san no aus den augnhöhln groit, zaschundne, valetzte sön findn afoch kan hoit
      Bestialische uaängste zreissn den vastond, des ewig heulende gekreisch stösst auf kan widastond
      Die valoanen sön suachn vazweiflt nochm weg, die valoanen sön kämpfn füa iah vitalität.
3)
Im geheimen ausgsprochne wöata fliagn duachd luft, vom stüamisch wüdn wind gepeitscht londns in da gruft
Kolossale intrigante pläne san weatlos, eifasüchtig vahosste gedonkn wean zum mythos
Genial duachdochta wahnsinn wiad krompfhoft zadrückt, den foischn hödn wäa da totale sieg fost glückt
Die valoanen sön leugnen iah woahre lebmsgschicht, woatn volla inbrunst auf des vagebende licht.
4)
Die vagiftete schling ziagt si gmiatlich longsom zua, da feine sond rieslt mit bedocht aufm fluchtweg
Da aufstieg woa die reinste foita, schlimmste toatua, die moasche zasteate bruckn füaht zum woiknsteg
Vom uawoid übawuchate ruinen im schlof, träumen von ana heroischn gloareichn zeit
Die valoanen sön vabüssn no iah hoate strof, vadrängen des vahosste gschenk da endgültigkeit.
ch 1b)
      Und a dichta nebl senkt si auf des kronke lond, liebkost sonft und mild die valoanen sön mit da hond
      Heisse tränen san aufm staubign bodn gfoin, gedrillt misshondelte sön findn ka sichre schoin
      Brutale panikattackn foitan den vastond, infernalisches gebrüll stösst auf kan widastond
      Die valoanen sön rennen ewig sinnlos im kreis, die valoanen sön hom füa iah lebm kan beweis.
ch 2a)
            Die valoanen sön bleibm gfongen im labyrinth, hom ka chance auf wiedakeah
            Die valoanen sön wean schee longsom taub, stumm und blind, hom ka chance auf gegnweah
            Die valoanen sön wean varuckt, vadrahn die woahheit, hom ka chance aufs gleichgewicht
            Die valoanen sön hossn iah tiafe ewigkeit, hom ka chance auf a freie sicht.
5)
Des letzte voigschriebne togebuach bleibt a vaschoin, schloft und ruht guad geschützt unta schutt, asche und staub
Im massivn gefäss schlummats friedlich zum eahoin, bis zua entdeckung foit no gnua regn, schnee und laub
A gedämpft flüstand hauchend rauchig heisare stimm, spricht des gebet gonz alla mit schönen melodien
Und die valoanen sön flüchtn si in den wahnsinn, im eignen chaos gfongen, entwicklns gnua phobien.
ch 1c)
      Und da dichte nebl umhüllt des todkronke lond, tätschlt liebevoi die valoanen sön mit da hond
      Soizige tränen san aus den augnhöhln gstüazt, gmartate sön findn ka ruah, hom den weg obküazt
      Manische depressionen zasetzn den vastond, des hysterische wütn stösst auf kan widastond
      Die valoanen sön kuman afoch net meah vom fleck, die valoanen sön eafülln nua iahn letztn zweck.
ch 2b)
            Die valoanen sön hom si im niavana vaiat, hom ka chance auf wiedakeah
            Die valoanen sön hom iah schicksoi jetzt akzeptiat, mochn a ka gegnweah
            Die valoanen sön schliessn friedn mit an vatrog, hom ka chance auf kompromiss
            Die valoanen sön beweinen iahn todestog, hom ka chance auf iah gedächtnis.
ch 3a)
                  Die valoanen sön san die wächta von diesa koidn zwischnwöd
                  Die valoanen sön eskoatian die vün totn von diesm schlochtföd
                  Die valoanen sön san die bewoahra diesa heilign instanz
                  Die valoanen sön hoitn zua realität a gwisse distanz.
 
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 12./13. märz 2015.pk.
Überarbeitet am 08. jänner 2017.pk. – copyright by philipp kirschner.pk.
 
***********************************************************************************
 

bleibt mir weiterhin gewogen.

euer philjazzmetal, der mundartige.