287. | vielleicht.

287. | Vielleicht.
1)
Vielleicht hob i wiaklich scho wieda vüz vü trunkn, und vielleicht hob i afoch heit wieda vüz vü graucht
Bin wieda amoi in an tiafn rausch vasunkn, fühl mi schochmatt, ausglaugt, völlig vasteat und vabraucht
Vielleicht is da alkohol mei ollabesta freind, und vielleicht ghean die vün tschick a no mit dazua
Wia san wie bluadsbriada, san stets im geiste vaeint, hob ois im griff, bin jo eawoxn, ka klana bua.
2)
Vielleicht is da alkohol mei eign fleisch und bluad, und vielleicht is die sucht vü gressa ois mei vastond
Meine gedonkn eatrinkn im see gonz obsuad, nua wön aus eabrochenem roin aus on diesn strond
Vielleicht hob i diese zeichn total übasehn, und vielleicht woit i mei kronkheit afoch ignoarian
Woit ma afoch die vün föhla net eingestehn, do i muass mein kronkhoft steinign weg akzeptian.
3)
Vielleicht is mei konsum da drogn zu exzessiv, und vielleicht hot die tägliche menge scho ausgreicht
Denn mei gleichgewichtssinn is nimma so effektiv, und die eainnarungen san scho ziemlich duachgweicht
Vielleicht hob i meine letztn neavn zschnö valoan, und vielleicht hob i mein oidn keapa ausvakauft
Bin wieda im treibsond vasumpft, spia kane sensoan, afoch ois vagessn, mei lung hot scho bessa gschnauft.
ch 1a)
      Oba vielleicht host mi jo gheat und vielleicht, hob i di mit meine tiafn gedonkn eareicht
      Oba vielleicht host di zuaspeat und vielleicht, san meine ausredn vüz floch, lea und endlos seicht
      Oba vielleicht gib i ois zua und vielleicht, wead i mei lebm bereun, bin net peafekt ausgreift
      Oba vielleicht leist i an schwua und vielleicht, hob i boid moi mei süchtige zweite haut obgstreift.
4)
Vielleicht hob i wiaklich scho wieda vüz vü trunkn, und vielleicht hob i afoch heit wieda vüz vü graucht
Mia is ois üban kopf gstiegn, mit grelle funkn, hob die neavn valoan, bin afoch net meah auftaucht
Vielleicht is mei eignes lebm vüz schwea zu kapian, und vielleicht hob i ois geeabt, bin so vaonlogt
Bin wie feangsteuat, konn diesn drong net blockian, hob a meine halluzinationen net vajogt.
5)
Vielleicht kum i von diesa fiesn gschicht net meah los, und vielleicht weadn die gehianzön zu fest einzwängt
Bin gfongen in an labyrinthoatigen chaos, hob afoch nie wos gmeakt, wea von meim zweitn gsicht glenkt
Vielleicht hot des schicksoi füa mi des ois so geplant, und vielleicht eagibt mei bishearigs lebm an sinn
Hob von meina eignen zukunft rein goa nix geahnt, die zruckglegte streckn is des ende vom beginn.
6)
Vielleicht hot mi wea vafluacht, sticht nodln in mi rein, und vielleicht is ois nua a oiptraum ohne beweis
Nua füa a kuaze zeit woa i in an ondan sein, und scho steh i allan aufm vakeahtn obstögleis
Vielleicht is mei vanunft, mei wille afoch zu schwoch, und vielleicht hob i mei situation foisch eingschätzt
Mei eigne logik vasteh i in da ondan sproch, afoch vüz vü obglenkt, hob mi daduach söbst valetzt.
ch 1b)
      Oba vielleicht host mi jo gsehn und vielleicht, hob i di mit mein vakeahtn spieglbüd eareicht
      Oba vielleicht wüst mi vastehn und vielleicht, san meine notlügn scho bis mittn drin duachgweicht
      Oba vielleicht sog i d‘woahheit und vielleicht, san meine nägstn schritt scho wieda vüz weit obgschweift
      Oba vielleicht is no vüz weit und vielleicht, hob i mei süchtige zweite haut kräftig eingseift.
ch 2a)
            Bin weahlos und labil, do vielleicht hot jeda grosse sta auf meim weg an tiafan sinn
            Obhängig instabil, do vielleicht woa i hypnotisiat, konn diesm zwong net entfliehn
            Unsicha, lostahoft, do vielleicht bleibt die ontwoat vaschoin, die frog woa goa kan bekonnt
            Wünlos und triebhoft, do vielleicht woan olle tüan auf, und da schlüssl mitvabronnt.
7)
Vielleicht hob i di zweng beochtet, dia net zuagheat, und vielleicht hom meine wüdn trieb mit dia zvü gspüt
Woit unbedingt an neionfong mit an hohn weat, do i hob imma voabei gschossn, afoch foisch züt
Vielleicht hob i di zvü sekkiat, gepeinigt und quöt, und vielleicht hob i di zfest gschlogn und zlaut ongschrien
Do die zeit heilt do die wundn, homs ma grod eazöht, schenk da frische rosn, kriach voa dia scho auf den knien.
8)
Vielleicht hob i di füa mi alla besitzn woin, vielleicht hob i mei zäatlichkeit etwos übasponnt
Blaue fleckn om gonzn keapa, augn zuagschwoin, da hoss hot die wütende eifasucht übaronnt
Vielleicht is unsre beziehung afoch zu peaveas, vielleicht san die sadistischn spiele zu brutal
Do du host das dringend braucht, so bizarr, so advers, bei uns is ois ealaubt, wos gefällt, ois is noamal.

9)
Vielleicht hob i di nua füa meine zwecke benutzt, und vielleicht hob i di scho vüz oft um den schlof brocht
Denn i leb schliesslich bei dia, hob scho so vü vaschmutzt, gibst ma so vü von dia, imma in wäame aufgwocht
Vielleicht hob i di zu oft malträtiat und missbraucht, und vielleicht is unsre hossliebe vü zu extrem
Bin in dei fesslkunstphantasie gänzlich eintaucht, wia zwa san a team, ghean afoch zomm in diesm lem.
10)
Vielleicht hob i mit deim lebm zvü experimentiat, vielleicht hob is donn afoch net meah in da gwoit ghobt
Lebm und tod san in meina hond, hob gott imitiat, pletzlich hob i mi söba bei mein treibm gestoppt
Vielleicht hot mi mei ongst innalich völlig gelähmt, vielleicht woit i mei siasses klans spüzeig net valian
Du bist die höfende hond, nua du host mi gezähmt, wü on dia meine geheimstn triebe ausprobian.
ch 1c)
      Oba vielleicht host mi gefühlt und vielleicht, hob i di mit meina intimität glei eareicht
      Oba vielleicht host di obkühlt und vielleicht, hot mei maskarade dei blindes vatraun eableicht
      Oba vielleicht eazöh i ois und vielleicht, nutz i den richtign moment, bin vü zu vasteift
      Oba vielleicht is wie damois und vielleicht, hot mei süchtige zweite haut scho vüz oft gekeift.
ch 2b)
            Bin ohne jedn hoit, do vielleicht hot diesa longe pfad, danebm mei medizin
            Von sensibl bis koid, do vielleicht woas nua da tunnlblick, bringt ma mein eignen ruin
            Unstet, ka entschlusskroft, do vielleicht gibts ka infoamation, des echo hot kan nochklong
            Giarig und dünklhoft, do vielleicht woa da seidne fodn, a teu vom oidn voahong.
ch 3a)
                  Drum brauch i imma wieda an ausgleich, gonz bestimmt höfn do drogn und gwoit
                  Vielleicht is zu bluadig und tränenreich, gonz bestimmt vafüg i üba vüfoit
                  Drum brauch i obwexlung, an zeitvatreib, gonz bestimmt hoit i damit mei gleichgwicht
                  Vielleicht is mei phantasie zu befreit, gonz bestimmt stroiht mei sö wieda im licht.
11)
Vielleicht hob i wiaklich scho wieda vüz vü trunkn, und vielleicht hob i afoch heit wieda vüz vü graucht
Hob da do zum obschied no gonz liebevoi gwunkn, und hob brünstig lüstane liebesschwüre ausghaucht
Vielleicht woan ma die hohn risikn net bewusst, und vielleicht hob i glaubt, es is a expeariment
Mei geheimnis hot mei vahoitn nie beeinflusst, mei promügrenzn von schizophren bis ambivalent.
12)
Vielleicht hob i mein radius vüz weit untaschätzt, und vielleicht hot mi die lawine scho längst vaschütt
Die wucht hob i goa net gspiat, trotzdem bin i valetzt, konn mi net meah rüahn, ka schritt noch voa und kana zrück
Vielleicht hob i etwas übasteigat reagiat, und vielleicht is mei götungsdrong vü zu hoch geschraubt
Woit a kloares zeichn setzn, hot net funktioniat, des rampmlicht is defekt und im restmüll vastaubt.
13)
Vielleicht hob i übad konsequenzn net nochdocht, und vielleicht is mei plan zu vawegn und riskant
Nua füa an tog hob i mi ois hauptpeason onglocht, mit an grinsn im gsicht, gonz bled, fies und provokant
Vielleicht hot mei geistige reife no net genügt, vielleicht hob i den blick ind zukunft net glei eafosst
Hob di jedesmoi danoch aufs heazlichste gedrückt, hob di umsoagt, beschützt, hob imma auf di aufposst.
14)
Vielleicht find i no a lückn in diesm system, und vielleicht übazeug i die wöd von meim talent
Ka anziga eakennt des wiaklich woahre problem, bin eua führenda meista, eua dirigent
Vielleicht wiad donn dei martyrium zua religion, und vielleicht san deine wundn a so genial
Schildare jeds detail diesa scheenen impression, denn du bist des teuaste vabrauchsmaterial.
ch 1d)
      Oba vielleicht host mi bemeakt und vielleicht, hob i di mit meina kreativität eareicht
      Oba vielleicht bist jetzt gestäakt und vielleicht, hom meine künste di no kompromisslos eaweicht
      Oba vielleicht vatrau i dia und vielleicht, gesteh i mei schuid, hob des ois scho vüz long mitgschleift
      Oba vielleicht bin i gonz stia und vielleicht, is mei süchtige zweite haut ois toanung gestreift.
ch 2c)
            Wanklmütig, ungsund, do vielleicht gibt ma jeds anzelne loch puares adrenalin
            Missgelaunt ohne grund, do vielleicht hot die ondre seitn reichlich frisches kokain
            Zwiespältig, missgelaunt, do vielleicht gibts jo a togebuach, glei direkt aus easta hond
            Lüstand geil und eastaunt, do vielleicht is dieses labyrinth, nua eabaut aus weissm sond.
ch 3b)
                  Drum brauch i imma dringend a passion, gonz bestimmt höfn do drogn und gwoit
                  Vielleicht hot die bestie a vision, gonz bestimmt hots ois wieda boid zruckzoiht
                  Drum brauch i oblenkung, an gegnweat, gonz bestimmt gibts füa mi kan mittlweg
                  Vielleicht san meine phantome bekeaht, gonz bestimmt findt mei sö ausm vasteck.

ch 4a)
                        Vielleicht hot si mei situation nie wiaklich richtig entsponnt
                        Denn mei sucht hot mi imma wieda von neim eiskoid übaronnt
                        Vielleicht san die fuachn in meim lebmsföd scho vüz tiaf grobm
                        Denn meine trieb woin si so gean on deinen sönschmeazn ealobm.
15)
Vielleicht hob i wiaklich scho wieda vüz vü trunkn, und vielleicht hob i afoch heit wieda vüz vü graucht
Bei diesa gewoitoagie sprühn scho die funkn, hob woahscheinlich mei sö on diesn teifl vakauft
Vielleicht valäuft sunst mei lebm afoch endlos floch, und vielleicht san jetzt meine ebenen ziemlich steil
Endlich vastehst du mei sein, mei söbst kreiate sproch, endlich bestätigst du mei söbstgerechtes uateil.
16)
Vielleicht hob i die letztn szenen übatriebm, vielleicht woas sogoa bessa ois des oaginal
Hob kulissen nachbaut und des drehbuch söbst gschriebm, kane kostn gescheut, bei jedem material
Vielleicht hätt i da do mein gresstn traum beichtn soin, vielleicht soit i da a beruhigungsmittl gem
Die kameras hom des geschehn eingfongen und gstoihn, aus jeda perspektive füm i dei kuazes lem.
17)
Vielleicht hätt dei liebe zeit und raum ondas bedeckt, vielleicht hot mei hoss die geheimen zeichn umbrocht
Dei wundascheena keapa is makllos peafekt, hot tiaf in mia des bestialische feia entfocht
Vielleicht hob i oi meine sündn auf di glodn, vielleicht moch i di zua tochta von iagendan gott
Vom antikn kreiz tropft dei bluad zäatlich zu bodn, die heilge lanzn besieglt dein ewign tod.
ch 1e)
      Oba vielleicht host das jetzt gschofft und vielleicht, hob i di jetzt mit mein peafektionismus eareicht
      Oba vielleicht host wieda glocht und vielleicht, hot mei kunstweak dia deine ängste endlich vascheucht
      Oba vielleicht kum i no noch und vielleicht, hot die doku beim riesneafoig gstöhnt und gekeucht
      Oba vielleicht leg i di floch und vielleicht, host du mei süchtige zweite haut do no vaseucht.
ch 2d)
            Woatbrüchig, suggariat, do vielleicht hom die vün hüadn, mia diesn oadn valiehn
            Chaotisch, kompliziat, do vielleicht hom si meine kettn, wieda vü spiele ausgliehn
            Charaktalos und frech, do vielleicht is diesa hoate füm, des ende vom onfong
            Stoak earegt, so vü pech, do vielleicht is mei phantasiewöd, ausgschlossn vom untagong.
ch 3c)
                  Drum brauch i imma dringend a spülarei, gonz bestimmt höfn do drogn und gwoit
                  Vielleicht kumts zu ana obschlochtarei, gonz bestimmt gebietet niemond einhoit
                  Drum brauch i zeastreuung mit qualität, gonz bestimmt wöht die geduid mit bedocht
                  Vielleicht bin i schizophren aufgedreht, gonz bestimmt eastroiht mei sö in volla procht.
ch 4b)
                        Vielleicht hot si mei geistig-sölischa zuastond no net entschäaft
                        Denn mei sucht is tiaf zwischn meine varucktn gedonkn einpfeacht
                        Vielleicht san die keabm und fugn in meim lebmsstob vüz tief
                        Denn meine trieb lochn si üba deine sönschmeazn krumm und schief.
ch 5a)
                              Vielleicht is dei tod füa mi sogoa des woahre präsent
                              Vielleicht is dei tod da easte schritt füas woahre fundament
                              Vielleicht woa i zu dia vüz grausam, eiskoid und zu streng
                              Mei lebm woa vü zu breit, do jetzt hots die richtige läng.
1)
Vielleicht hob i wiaklich scho wieda vüz vü trunkn, und vielleicht hob i afoch heit wieda vüz vü graucht
Bin wieda amoi in an tiafn rausch vasunkn, fühl mi schochmatt, ausglaugt, völlig vasteat und vabraucht
Vielleicht is da alkohol mei ollabesta freind, und vielleicht ghean die vün tschick a no mit dazua
Wia san wie bluadsbriada, san stets im geiste vaeint, hob ois im griff, bin jo eawoxn, ka klana bua.
 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

 
Geschrieben am 06./30. november // 14. dezember 1995 /// 16./17. jänner // 10. februar // 27. dezember 1996.pk.
Neu überschrieben am 18./19./20./21. märz 2015.pk.
Überarbeitet am 08. jänner 2017.pk. – copyright by philipp kirschner.pk.
 

**************************************************************************

bleibt mir weiterhin gewogen.

euer philjazzmetal, der mundartige.