293. | steh no aufrecht.

293. | Steh no aufrecht.
1)
Mei keapa is a anzige schmeazfabrik, mit gschlossnen augn lausch i meina leidnsmusik
Mei eainnrung da letztn tog is vablosst, ka no so klans passlteil hätt no zommposst
Mei lebmsweg hot si vasteckt, bleibt vaschoin, ka spua bekonnt, kane fuassobdrück san wem aufgfoin
Mei gedonke draht si scho ständig im kreis, vaia mi im labyrinth, steh aufm foischn gleis.
2)
Mei keapa is a loga füa quoin und pein, mei leidnsmusik besteht aus gestöhn und lauts schrein
Mei zeitrechnung beginnt wieda moi bei null, bin ziemlich hoat glondet direkt in an sündnpfuhl
Mei lebmslicht hot jetzt no gnua eneagien, muass seah spoasam sein, sonst brauch i vüz vü battarien
Mei vastond muass si no sommln und foamian, hob mein plan valoan, muass jetzt mein instinkt aktivian.
ch 1a)
      Bin mei eigna feind, steh mittn im krieg, von hia gibts ka zruck, jeda woat scho auf an kloan sieg
      Bin mei eigna feind, marschia in die schlocht, völlig isoliat, des feia hot si in mia entfocht
      Bin mei eigna feind, in da eastn reih, hob in übablick, stüaz voawäats mit gegröhl und geschrei
      Bin mei eigna feind, des föd bluadigrot, bin hia gonz allan, do i steh no aufrecht zwischn lebm und tod.
3)
Mei keapa is a wunde mülldeponie, mit gschlossnen augn witta i mei anomalie
Mei gedächtnis stützt si auf an lean raum, zadruckt aufm bodn spieglt si da letzte traum
Mei lebmsboot schauklt scho gfäahlich im wind, die schäumend wüdn wön mochn mi taub, stumm und blind
Mei meakfähigkeit losst mi ständig im stich, so vü wissn gspeichat, zruck bleibt nua a dünna strich.
4)
Mei keapa vegetiat im vakuum dahin, diesa dämmazuastond is wie a oat medizin
Mei sonnenuah is vom hassn sond vaschluckt woan, und die zasprungnen glockn san gschmoizn und eafroan
Mei lebmsmotto steht unta kan guadn stean, muass east den breitn übaschwemmtn fluss übaquean
Mei intellekt vasinkt jedn tog im sumpf, zruck bleibt nua da obtrennte entstöte rode rumpf.
5)
Mei keapa valiat ständig on masse und gwicht, weit weg vom horizont siag i scho a zoates licht
Mei glückskeks hot mein weisn leitsotz vaflucht, liegt zabrochn und aufgweicht in da valossnen bucht
Mei lebmsbuach zöht die voi geschriebnen tog, unlesaliches geschmiere leistet kan beitrog
Mei spüasinn konn si nimma auf schoaf einstön, da weitblick is getrübt, die uaängste san stromschnön.
ch 1b)
      Bin mei eigna feind, steh mittn im kompf, a grinsn im gsicht, vabissn quöt mit an zähn krompf
      Bin mei eigna feind, marschia ins gefecht, brauch die einsomkeit, des feia is neutral und gerecht
      Bin mei eigna feind, hob den eastn plotz, siag des büd voa mia, woat scho ungeduidig auf mein einsotz
      Bin mei eigna feind, die front bluadigrot, bin om end da wöd, do i steh no aufrecht zwischn lebm und tod.
ch 2a)
            Steh no aufrecht zwischn dröhnendem gewitta und da ewig reinen stün
            Steh no aufrecht zwischn an schoafn foigitta und dem ewig frein wün
            Steh no aufrecht zwischn tiafsta schwäazesta nocht und nei geboarenem tog
            Steh no aufrecht zwischn belebt heilenda kroft und an nei ausghobnen grob.
6)
Mei keapa beweist den söbsteahoitungstrieb, mit gschlossnen augn foi i ständig duachs löchrige sieb
Mei echo is wie a gwoafna bumerong, hot kan hoitegriff, kennt kan zutritt und kan ausgong
Mei lebmsgschicht kennt seah vü tiafn und höhn, hob vagessn, olle seitn in meim buach zu zöhn
Mei rückschau losst kane scheenen büda zua, a die betrübtn momente lossn mia ka ruah.
7)
Mei keapa is a silo voll dreck und gift, guad vasteckt hinta da maua vablosst die woanschrift
Mei foab blättat ob, hintalosst dünne haut, mei rots fleisch hot si scho äussast neigiarig umgschaut
Mei lebmssoft tropft beim leck auf und davon, vaseicht den untagrund, wiad die gsunde eadn bedrohn
Mei weisheit is boid om end, gib longsom auf, die unwissnheit nimmt die ahnungslosigkeit in kauf.
8)
Mei keapa zeigt goa ka intaresse meah, des fiamament erstroiht gerodet, vabronnt und leah
Mei neblbeag wiaft den schottn übas lond, unhamlich bese geista schleichn duach jede wond
Mei lebmsongst hot den todesmut bestüamt, mit volla obsicht olle knochn voa eam auftüamt
Mei instinkt treibt a unduachsichtiges spü, hetzt die gefühle psychisch brutal ins letzte zü.
ch 1c)

      Bin mei eigna feind, steh mittn im streit, loch hasse tränen, eahnvoi diese unschuid entzweit
      Bin mei eigna feind, marschia zu dem kroch, von oin obtrennt, nua des feia is scho wieda woch
      Bin mei eigna feind, hob den eastn rong, die londkoatn stroiht, die bestie heult zum angriffsklong
      Bin mei eigna feind, die zone bluadrot, des nichts umgibt mi, do i steh no aufrecht zwischn lebm und tod.
ch 2b)
            Steh no aufrecht zwischn bombign raketn und ana wiesn so bunt
            Steh no aufrecht zwischn scheinheiliges betn und an friedlichn jogdgrund
            Steh no aufrecht zwischn dem dunklrodn mond und da liab lächelnden sunn
            Steh no aufrecht zwischn dem valossnen sondstrond und dem grausamen taifun.
ch 3a)
                  Streif und wondare duach uaoide ruinen, spia iahre aura, so wiaklich, so echt
                  Eafoasch easchöpfte und stügelegte minen, die stoin san a seah kompliziats geflecht
                  Spazia und wondare duach a krotalondschoft, spia die rohe gwoit, so wiaklich, so echt
                  Füa mei vagongenheit wuade i hoat bestroft, bin net gstiazt oda gfoin, i steh no aufrecht.
9)
Mei keapa is a bombardement volla schmeaz, mit gschlossnen augn wiads brachial, gehts steu obwäats
Mei reue kumt vüz spät, des schuidgefühl nogt, die gähnende leare hot mi wieda danoch gfrogt
Mei lebmssinn hot si scho vüz weit entfeant, hob jedn funkn da woahheit eignhändig entkeant
Mei queaschnitt eakennt jedn klan joahresring, fühl den zoatn hauch des fliaglschlogs vom schmettaling.
10)
Mei keapa schreit stumm noch ealösta freiheit, söbstlos valongsom i mein heazschlog bis zua auszeit
Mei atem vatauscht imma des aus und ein, röchlnd sprudlt die dünne luft aus an hoatn stein
Mei lebmswün zabricht voa da endstation, entziffa die hieroglyphn, tauch in a fiktion
Mei humoa hot um vagossne tränen glocht, jetzt trauat a söbst um diese ollaletzte nocht.
ch 1d)
      Bin mei eigna feind, steh mittn im woat, net meah anonym, bleib ongwuazlt stehn, zu sta eastoat
      Bin mei eigna feind, marschia zu dem läam, völlig valossn, nua des feia übabringt vadeam
      Bin mei eigna feind, easte qualität, schweb jetzt schwearelos, bin scho süchtig noch intimität
      Bin mei eigna feind, linie bluadrot, schwäaze obsolut, do i steh no aufrecht zwischn lebm und tod.
ch 2c)
            Steh no aufrecht zwischn lean trümmahaufn und dem ewig reinen licht
            Steh no aufrecht zwischn dem sonftn eintauchn und diesm jüngstn gericht
            Steh no aufrecht zwischn dem rachsüchtign stean und dem guadn paradies
            Steh no aufrecht zwischn dem befruchteten kean und dem letztn begräbnis.
ch 3b)
                  Schweif und wondare duach asche, abfoi und schutt, spia iahre präsenz, so wiaklich, so echt
                  Stöbare und stochre in da no woamen glut, da letzte rest a kompliziats geflecht
                  Schlendare und wondare duach scheabm und dreck, spia die koide mocht, so wiaklich, so echt
                  Füa mei vagongenheit brauch i jetzt a vasteck, bin net gstiazt oda gfoin, i steh no aufrecht.
ch 4a)
                        Da kieslstein fongt on zu roin, bin glei drauf hoat gstiazt und hingfoin
                        Konn jetzt goa net meah aufrecht stehn, da tod stüht ma jetzt grod mei lem
                        Des blott vawökt und is obgfoin, da kieslstein fongt on zu roin
                        Konn jetzt goa net mea aufrecht stehn, denn da tod stüht ma jetzt mei lem.
1)
Mei keapa is a anzige schmeazfabrik, mit gschlossnen augn lausch i meina leidnsmusik
Mei eainnrung da letztn tog is vablosst, ka no so klans passlteil hätt no zommposst
Mei lebmsweg hot si vasteckt, bleibt vaschoin, ka spua bekonnt, kane fuassobdrück san wem aufgfoin
Mei gedonke draht si scho ständig im kreis, vaia mi im labyrinth, steh aufm foischn gleis.
ch 4a)
                        Da kieslstein fongt on zu roin, bin glei drauf hoat gstiazt und hingfoin
                        Konn jetzt goa net meah aufrecht stehn, da tod stüht ma jetzt grod mei lem
                        Des blott vawökt und is obgfoin, da kieslstein fongt on zu roin
                        Konn jetzt goa net mea aufrecht stehn, denn da tod stüht ma jetzt mei lem.
 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

 
Geschrieben am 04./05./06. mai 2015.pk.
Überarbeitet am 11. jänner 2017.pk. – copyright by philipp kirschner.pk.
 

**************************************************************************

bleibt mir weiterhin gewogen.

euer philjazzmetal, der mundartige.