294. | weg.

294. | Weg.
1)
Wan bittre tränen üba so vü elend, not und kriag, so vü sinnlosigkeit im wossa, om lond, im gebiag
Bin wütend üba fanatismus und intolaranz, so vü untadrückung, fuacht und schreckn im lichtaglanz
Wan bittre tränen üba so vü zastearung und tod, so vü terror, entsetzn, gwoit und pein im rettungsboot
Bin wütend üba sklavarei jeda oat bei gross und klein, so vü eisnkettn und fessln on hond, hois und bein.
2)
Loch siasse tränen üba die dummheit von mensch und tia, so vü unwissnheit und unvastond in holda zia
Bin glücklich üba die friedliche stün, die mi umgibt, so vü zäatlichkeit, intime wäame wonn ma si liebt
Loch siasse tränen üba geistreich zweideutige witz, so vü humoristische akrobatik auf an sitz
Bin glücklich üba vü harmonie, wohllaut und gleichklong, so vü vabundnheit und vatraun in schrift und gesong.
ch 1a)
      Da schwoaze punkt om horizont, wiad imma gressa und vaschlingt, dieses eiskoide lond
      Da schwoaze punkt hots zü eareicht, öffnet die zukunft ungeschminkt, hots giftig eingeseift
      Da schwoaze punkt om fiamament, wiad imma gressa und vaschluckt, den hoatn kontinent
      Da schwoaze punkt hot si vameaht, öffnet diese tüa unbefugt, hot den weg übaqueat.
3)
Sing traurige liada übas vagessn, negation, so vü betrübliche momente und depoatation
Bin müde vom streit, von zoan, rache, von schande und hoss, so vü leidnschoft beim amoklauf und beim todesstoss
Sing traurige liada üba die liebe mit unglück, so vü tragische umstände defoamian des gemüt
Bin müde von den vün klogn, jamman und beschwean, von so vü unrecht, föhla und vastoss, so vü opfean.
4)
Eazöh lustige gschichtn gwüazt mit an schoafn humoa, vü zum nochdenkn, rätsln, da goign steht voam toa
Bin höwoch, mei kloara vastond oabeit rund um die uah, mit vü kompliziat woihduachdochta hoata garnitua
Eazöh lustige gschichtn voi deftig earotischa kost, uaoide anekdotn gsommlt von west, noad, süd, ost
Bin höwoch, mei eigne phantasie spüt a grosse roin, mei speziella witz sprüht voa schlogfeatigkeit, hob nix gstoihn.
5)
Schweig beredt üba so vü vadoabne heazn und sön, so vü varuckte gedonkn san bereit zum beföhn
Bin zarissn, mecht innalich ausbrechn, hoit mi zruck, die stün beruhigt, deckt mi wach zua, ohne iagendan druck
Schweig eloquent in die helligkeit, in die finstanis, so vü kronke woahheitn vadunkln des geheimnis
Bin zarissn, äussalich is mei oide haut no intakt, die süchtign eagüsse halluzinian kompakt.
ch 1b)
      Da schwoaze punkt auf weissa wond, bläht si auf, zaplotzt dröhnend laut, bis üban hohn rond
      Da schwoaze punkt losst zeit stüstehn, hot dieses steanentoa vabaut, konns jetzt net meah zruckdrehn
      Da schwoaze punkt is element, vawondlt si in jede gstoit, steht ois auf pergament
      Da schwoaze punkt hot si bewegt, die reinste uagewoit, da weg is ungepflegt.
ch 2a)
            Untam dichtn blättadoch schlänglt si da weg duachn woid gonz guad vasteckt
            Teils gänzlich übawuchat windet si da weg duachn woid bleibt unentdeckt
            Seit tausenden joahn hot ka nockta fuass den weg im woid intensiv gespüat
            In vagessnheit grotn übalebt da weg im woid völlig unberüaht.
6)
Schrei dröhnend laut ind nocht hinaus, damit ma mi jetzt höat, om tog vaschluckt da läam meine schoiwön gonz ungestöat
Bin scho gonz heisa, mei woanung homs afoch ignoariat, die natuakatastrophn homs gsicht da ean defoamiat
Schrei long onhoitend in die weide fremde wöd hinein, des echo beontwoatet die frogn und schreibts in stein
Bin scho gonz heisa, kana hot meine visionen glaubt, longsom schleicht die ongst ins hian, die hysterie wiad entstaubt.
7)
Flüsta tonlos geheime sprüche dem wind in sei oah, trogt die botschoft mit woikn weida und londn om toa
Bin scho miad, meine augn foin zua, tauch tiaf in an traum, hoit mi fest, losst mi net los, woch auf in an ondan raum
Flüsta hauchend leis die reine woahheit ins zoate licht, dem voin mond gehn die hoa aus, hot scho foitn im gsicht
Bin scho miad, suach mei sö, friedn und stün tiaf in mia drin, wonn i donn den weg endlich vasteh, eagibt ois an sinn.
8)
Beobocht stü hamlich von weita feane des geschehn, schweb schwearelos duach raum und zeit, guad und bes, tod und lem
Bin fost unsichtboa, lies gedonkn kryptisch und vawoan, drahn si in spiroin ohne end, san gscheitat und valoan
Beobocht intressiat in nächsta nähe jeds detail, akribisch schreib i ois auf, gnua knotn im rettungsseil
Bin fost unsichtboa, füa die zukunft is füa ois gesoagt, nua den weg konn ma net ändan, des end is zugekoakt.
ch 1c)
      Da schwoaze punkt im nein mond, gebiat si söbst in dunklheit, mit an bluadrodn bond
      Da schwoaze punkt hot grosse mocht, kontrolliat die unsteablichkeit, hot des lebm ausglocht
      Da schwoaze punkt hot sein moment, gonz genau rechtzeitig eareicht, da weg is evident
      Da schwoaze punkt hot si getoant, hot sei zweite haut obgstreift, da weg is voagewoant.
ch 2b)
            Zwischn engen fösnschluchtn grobt si da weg imma tiafa ins gestein
            Des vatrocknete bochbett mutiat zu dem weg, woat long aufm sonnenschein
            Seit tausenden joahn hot ka nockta fuass den weg im spoit intensiv gespüat
            In vagessnheit grotn übalebt da weg im spoit völlig unberüaht.
ch 3a)
                  Muass den weg unbedingt findn, damit da schwoaze punkt endlich vaschwindt
                  Muass den weg donn nei entbindn, damit da schwoaze punkt im weiss varinnt
                  Muass den weg endlich entdeckn, damit da schwoaze punkt donn weitazieht
                  Muass den weg riachn und schmeckn, damit da schwoaze punkt von hia entflieht.
9)
Meditia tiaf in sölisch philosophischn atmosphäan, im dichtn nebl bis zua ekstase auf altäan
Bin süchtig, giarig auf die anzig woahre wiaklichkeit, die echte reale wöd gibt vatraun und sichaheit
Kontemplativ mit mystischn geistwesn meditiat, die synthesn vom univeasum san seah kompliziat
Bin süchtig, giarig auf diesn genialn kreislauf, nua da weg füaht ausm labyrinth, ausm schwoazn rauch.
10)
Explodia bestialisch, völlig schuidlos vauasocht, brauch kan grund, afoch ohne nochdenkn so vü umbrocht
Bin varuckt, die innren stimmen homma den beföh gem, ziag an schlussstrich, säubare die wöd vom schmutzign lem
Explodia hungrig und duastig noch bluad, schmeaz, gwoit und pein, ohne vastond hob i mi valiabt in mei kronkes sein
Bin varuckt, mei rasarei wütet ohne sicht auf end, da weg woa vielleicht a foin, a föschung in da gegend.
11)
Loch siasse tränen üba so vü elend, not und kriag, so vü sinnlosigkeit im wossa, om lond, im gebiag
Bin glücklich üba fanatismus und intolaranz, so vü untadrückung, fuacht und schreckn im lichtaglanz
Loch siasse tränen üba so vü zastearung und tod, so vü terror, entsetzn, gwoit und pein im rettungsboot
Bin glücklich üba sklavarei jeda oat bei gross und klein, so vü eisnkettn und fessln on hond, hois und bein.
ch 1d)
      Da schwoaze punkt on da kriagsfront, vafüahts feige lebm zum tod, hot afoch kan vaschont
      Da schwoaze punkt hot mit uns gspüt, seine regln hom uns bedroht, hot jetzt sei gift vasprüht
      Da schwoaze punkt hot sei regiment, schickts donn in diese wüde schlocht, da weg is a fragment
      Da schwoaze punkt suacht jetzt sei kind, sei rache is brutal eawocht, da weg is taub, stumm und blind.
ch 2c)
            Üba dichte schwoazgraue woikn füaht da weg in diese unendlichkeit
            Da feige sönfänga flüchtet auf dem weg in die makabre freiheit
            Seit millionen joahn hot ka nockta fuass den weg im oi intensiv gespüat
            In vagessnheit grotn übalebt da weg im oi völlig unberüaht.
ch 3b
                  Muass dem weg mei vatraun schenkn, damit da schwoaze punkt si jetzt auflöst
                  Muass den weg ind richtung lenkn, damit da schwoaze punkt sei heaz entblösst
                  Muass den weg endlich bestrofn, damit da schwoaze punkt mein hoss tiaf spiat
                  Muass den weg jetzt nei easchoffn, damit da schwoaze punkt endlich krepiat.
ch 4a)
                        Do da weg füaht direkt in die mittn vom schwoazn punkt
                        Denn da weg hot eam oi unsre geheimnisse gefunkt
                        Gibt kane ausredn, ka zruck, nua da weg is des zü
                        Und da schwoaze punkt gwinnt endlich sei spü.
 

 ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 07./08./11./12./13. mai 2015.pk.
Überarbeitet am 11. jänner 2017.pk. – copyright by philipp kirschner.pk.
 

**************************************************************************

 
bleibt mir weiterhin gewogen.

euer philjazzmetal, der mundartige.