284. | woikn weinen.

 
284. | Woikn weinen.
1)
Des feia brennt lodand in hohe atmosphean, diesa riesige orange-rode boi muass si jetzt endlich weahn
Diese hitz nimmt stetig kontinuialich zua, denn sei stüamisch wüd aufglodna wind kumt afoch niemois zu ruah
Die kugl woxt longsom in an menschnlebm, bis zum rotn riesn wiads hia no gnua katastrophn gebm.
Des feia brennt lodand hö on da frischn luft, und da giftige rauch vabreitet an bestialischn duft
In diesa hitz zafoit ois zu aschn und staub, da lauwoame wind hot den flommen sei geheimnis onvatraut
Unsre eadn wiad si auch amoi eahebm, bis zu iahm aufschrei wiads hia no gnua katastrophn gebm.
2)
Des feia brennt lodand auf an ealoschnen beag, da orange-rode strom vawondlt den obhong in a kunstweak
Da pyroklastische strom übaroit des lond, in diesa glutlawine bleibt ma gfongen, entkommt ka vastond
Unsa planet mecht in seina gschicht mitredn, bis wia die woanungen vastehn, wiads no gnua katastophn gebm.
ch 1a)
      Und schweare schwoaze woikn weinen, und heuln iahre tiafe traua auf uns hearob
      Und bese vorzeichn eascheinen, und vakündn von vadeabm, seichn und tod
      Und diese milliadn tränen, sammln si zua flut, bringen ois wieda ins lot
      Und des wossa wiad si ausdehnen, und eahebt si zua hohn wond ohne rettungsboot.
3)
Des feia brennt lodand im bewohntn gebiet, die explosionen easchüttan die stodt, menschn hom si hinkniet
Diese hitz da gwoit sät nua vü rache und hoss, und fanatische kriega vasetzn den letztn gnodnstoss
Die menschn flüchtn ins scheinheilige betn, bis diese bittn eahöat wean, wiads no gnua katastrophn gebm.
Des feia brennt lodand im heazn, in da sö, die saat wiad düngt, unschuidige keimlinge tötn auf beföh
Die hitz is a epidemie, a krebsgeschwüa, sie woxt rasend schnö vom geöffnetn fensta zua nächstn tüa
Fraun und kinda woin die topfakeit onstrebm, bis zum heroischn einsotz wiads no gnua katastrophn gebm.
4)
Des feia brennt lodand lichtaloh und befreit, vom wödoi siagt ma die augn da schlonge, iah zung is bereit
Diese hitz wittat und riacht jedn klanstn feind, friedliche freiheitn weadn grundsätzlich sogleich strikt vaneint
Da stoiz da männa woatet auf diesn segn, bis ea in eafüllung geht, wiads no gnua katastrophn gebm.
Des feia brennt lodand, peafekt gewollt gelegt, die pyromanischn onschläg hom die voauateile vasteckt
Diese hitz eazeugt diese kötn im vastond, die gehianwäsche is geglückt, rode fleckn auf da weissn wond
Die menschheit muass den teppich zu ende webm, bis d‘letzte maschn knüft is, wiads no gnua katastrophn gebm.
ch 1b)
      Und schweare schwoaze woikn weinen, und heuln iahre tiafe traua auf uns hearob
      Und die tränen woin si vaeinen, und reinign gründlich jedn spoit bis ins grob
      Und diese milliadn seeln, schrein dröhnend noch gerechtigkeit in diesa not
      Und des wossa wiad donn ois zommzähln, und schickt die listn zu an vameintlichn gott.
ch 2a)
            Wonn wiaklich weisse woikn weinen, donn kopuliat des chaos mit da wiaklichkeit
            Wonn wiaklich graue woikn weinen, donn kollidiat dieses chaos mit raum und zeit
            Wonn wiaklich schwoaze woikn weinen, donn korrigiat des chaos die vagongenheit
            Wonn wiaklich wieda woikn weinen, donn kreiat des chaos a neue ewigkeit.
5)
Des feia brennt lodand auf jedm kontinent, jede nation, jeds voik, jeda stomm füaht sei eignes regiment
Die hitz wiad geschüat von an peaveasn symboi, die beschmutztn unreinen ealeidn an tragischn unfoi
Die woahre rass muass an treueschwua oblegn, bis zum ende da rede wiads no gnua katastrophn gebm.
Des feia brennt lodand die gonze nocht hinduach, ondasoatige kultuan rauchn aus an oidn antikn buach
Die hitz schmüzt des eabe da gesomtn menschheit, die blinde zastearungswut hosst die radikale sinnlichkeit
Die ideologie muass si no bewegn, bis si die wön endlich bricht, wiads no gnua katastrophn gebm.
6)
Des feia brennt lodand füa die lokomotiv, übafüllte waggons rattan scho togelong gonz primitiv
Die hitz bleibt auf gleicha heissa temperatua, da vasprochne nochschub kumt pünktlich im loga on in da fruah
Die besn woatn scho ungeduidig aufs fegn, bis olle spuan vawischt san, wiads no gnua katastrophn gebm.
Des feia brennt lodand aus an hohn schoanstein, die trockne vazaubate duschn füaht direkt ins ondre sein
Die hitz danoch hot kana meah so richtig gspüat, da weatvolle schmuck wiad eingesommlt und ois geschenk vaschnüat
Die gerechte woahheit miassns gwissnhoft pflegn, bis die täta übafüaht san, wiads no gnua katastrophn gebm.
7)

Des feia brennt scho lodand bis zum horizont, des obgrundtiaf bese wiad vom guadn jetzt endlich übaronnt
Diese hitz breitet endlich seine fliagl aus, die wöd atmet wieda befreit und ealeichtat ein mit vü applaus
Des guade rechnet mit vü heabm rückschlägn, bis diesa wahnsinn sei end findt, wiads no gnua katastrophn gebm.
ch 1c)
      Und schweare schwoaze woikn weinen, und heuln iahre tiafe traua auf uns hearob
      Und die seelen wean uns eascheinen, und beschuidign des defekte kaleidoskop
      Und diese milliadn wesn, legn iahre wehklogn unta des mikroskop
      Und des wossa schreibt seine thesn, und vabietet des feige friednsongebot.
ch 2b)
            Wonn wiaklich weisse woikn weinen, donn kollabiat des chaos mit da wiaklichkeit
            Wonn wiaklich graue woikn weinen, donn korrumpiat des chaos des licht, raum und zeit
            Wonn wiaklich schwoaze woikn weinen, donn kopiat dieses chaos die vagongenheit
            Wonn wiaklich wieda woikn weinen, donn kaschiat des chaos die neue ewigkeit.
ch 3a)
                  Woikn weinen afoch net so ohne grund, woikn weinen jo nua im vabund
                  Woikn weinen wonn die menschheit föhla mocht, woikn weinen om tog, in da nocht
                  Woikn weinen afoch net ohne an sinn, woikn weinen scho seit onbeginn
                  Woikn weinen wonn unsre sunn net meah locht, woikn weinen in fromma ondocht.
8)
Des feia brennt lodand im bluadigrodn schein, kriegsvafoigte flüchtlinge brennen guad in iahm eignen heim
Diese hitz raubt da feuaweah die otemluft, die übalebendn steabm glei drauf und londn in da gruft
Die rechte hond weadns wieda zum gruss hebm, bis die paroin eahöat wean, wiads no gnua katastrophn gebm.
Des feia brennt lodand im auto, im geschäft, mindaheitn wean untadrückt, gfoitat, gibt ka gesetz, ka recht
Die hitz übasteigt massiv den legaln grenzweat, a friedliches miteinonda is uneawünscht, total vakeaht
Des innaste bleibt afoch übaroi klebm, bis des a jeda vasteht, wiads no gnua katastrophn gebm.
9)
Des feia brennt lodand hö auf mensch und auf tia, hinrichtungen jeda oat weadn vollendet in ruhiga zia
Die hitz vaströmt scho an eigntümlichn gstonk, auf die vauateiltn woat scho a gonz besondas guada tronk
Da henka muass olle beweise zasägn, bis zua unkennlichkeit wiads hia no gnua katastrophn gebm.
Des feia brennt lodand hö mittn in da nocht, a bombastische kulisse in impressionistischa procht
Die hitz sprengt jedn kunstschotz, jeds orginal, des militärische regime hot befehle, oba ka moral
Da demokratie bröckln scho ihre strebm, bis da schutt übahond nimmt, wiads no gnua katastrophn gebm.
ch 1d)
      Und schweare schwoaze woikn weinen, und heuln iahre tiafe traua auf uns hearob
      Und die wesn wean si vaeinen, und woatn giarig auf des steanenhoroskop
      Und diese milliadn schottn, jogn unsan vastond im wüdestn galopp
      Und des wossa tropft auf plottn, und vagiftet stetig den nossn voarot.
ch 2c)
            Wonn wiaklich weisse woikn weinen, donn kalibriat des chaos diese wiaklichkeit
            Wonn wiaklich graue woikn weinen, donn kastriat dieses chaos des licht, raum und zeit
            Wonn wiaklich schwoaze woikn weinen, donn kompensiat des chaos die vagongenheit
            Wonn wiaklich wieda woikn weinen, donn katapultiat si des chaos ind ewigkeit.
ch 3b)
                  Woikn weinen afoch net ohne an zweck, woiken weinen in an weichn bett
                  Woikn weinen wonn die menschheit net nochdenkt, woikn weinen ois woanendes gschenk
                  Woikn weinen afoch net ohne essenz, woikn weinen mit vü effizienz
                  Woikn weinen wonn die sunn uns net meah lenkt, woikn weinen in diesm moment.
ch 4a)
                        Wonn woikn weinen, donn san die zeiga scho wieda vüz weit voagruckt
                        Wonn woikn weinen, donn hot si die natua om fremdn bluad vaschluckt
                        Wonn woikn weinen, donn hot da donna den blitz in da luft zadruckt
                        Wonn woikn weinen, donn hot die sunn iah eignes bluad vüz weit ausgspuckt.
10)
Des feia brennt lodand om feanen firmament, diesa unfreindlich grinsende komet is in seim element
Die hitz nimmt stetig kontinuialich zua, vabreitet ongst und schreckn, mocht boid sei letzte entziehungskua
Woit no amoi auf seina reisn wos ealebm, bis ea uns zäatlich küsst, wiads hia no gnua katastrophn gebm.

Des feia brennt lodand in hohe atmosphäan, sei innige liebe is wie a magnet, hot uns ja so gean

Die hitz mocht mit iahra magie ois unsichtboa, da kollektive aufschrei singt seine gebete om oitoa
Unsre eadn konn den kuss net meah behebm, bis des blau si in schwoaz vafäabt, wiads no gnua katastrophn gebm.
11)

Des feia brennt lodand in hohe atmosphäan, diesa riesige orange-rode boi muass si jetzt endlich weahn
Diese hitz nimmt stetig kontinuialich zua, denn sei stüamisch wüd aufglodna wind kumt afoch niemois zu ruah
Die kugl woxt vüz schnö in an menschnlebm, bis zum rotn riesn wiads hia kane katastrophn meah gebm.
ch 1e)
      Und schweare schwoaze woikn weinen, und heuln iahre tiafe traua auf uns hearob
      Und die schottn wean donn eascheinen, und vafluachn des letzte endgültige grob
      Und diese milliadn tränen, vadompfn auf da stö und hossn diesn tod
      Und ka wossa tropft meah beim brennen, sehn scho den apokalyptischn behemoth.
ch 2d)
            Wonn wiaklich weisse woikn weinen, donn kommandiat des chaos diese wiaklichkeit
            Wonn wiaklich graue woikn weinen, donn konfisziat des chaos des licht, raum und zeit
            Wonn wiaklich schwoaze woikn weinen, donn kolonisiat des chaos die vagongenheit
            Wonn wiaklich wieda woikn weinen, donn konstruiat des chaos die neue ewigkeit.
ch 3c)
                  Woikn weinen afoch net ohne substanz, woikn weinen in an lichtakranz
                  Woikn weinen wonn die menschheit jetzt ausstiabt, woikn weinen wonn die wöd vadiabt
                  Woikn weinen afoch net ohne inhoit, woikn weinen freiwillig mit gwoit
                  Woikn weinen wonn die sunn valiat iah licht, woikn weinen voam jüngstn gericht.
ch 4b)
                        Wonn woikn weinen, donn läutn die glockn bis zu iahm letztn schlog
                        Wonn woikn weinen, donn vahoit des echo genau om steabetog
                        Wonn woikn weinen, donn zabricht da vasteinate übalebmsstob
                        Wonn woikn weinen, donn explodiat des ollaletzte todesrod.
ch 4a)
                        Wonn woikn weinen, donn san die zeiga scho wieda vüz weit voagruckt
                        Wonn woikn weinen, donn hot si die natua om fremdn bluad vaschluckt
                        Wonn woikn weinen, donn hot da donna den blitz in da luft zadruckt
                        Wonn woikn weinen, donn hot die sunn iah eignes bluad vüz weit ausgspuckt.
ch 5a)
                              Woikn weinen reines blut, woikn entfochn a hohe flut
                              Woikn weinen reines gift, woikn schluckn afoch jedes licht
                              Woikn weinen rotn soft, woikn entziehn da natua iah kroft
                              Woikn weinen rotn stoff, woikn imitian des schwoaze loch.
ch 1a)
      Und schweare schwoaze woikn weinen, und heuln iahre tiafe traua auf uns hearob
      Und bese vorzeichn eascheinen, und vakündn von vadeabm, seichn und tod
      Und diese milliadn tränen, sammln si zua flut, bringen des nichts hia ins lot
      Und des wossa wiad si ausdehnen, und eahebt si zua hohn wond ohne rettungsboot.
 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
 
Geschrieben am 09./10./11. märz 2015.pk.
Überarbeitet am 08. jänner 2017.pk. – copyright by philipp kirschner.pk.
 
************************************************************************************

bleibt mir weiterhin gewogen.

euer philjazzmetal, der mundartige.