273. | lebmsrecht.

1)

Öffne longsom meine augn, loss die dunklheit hearein, heisse sie heazlich wükommen, bin jetzt gonz allein
Mei lebm soi net vastaubm, soi no voa kroft explodian, siag afoch scho zvü vaschwommen, mecht no net eafrian
Spia a kötn auf da haut, mei ongst schwitzt mi völlig noss, und mei keapa zittat und bebt, bin scho wünlos
So vü hot si scho aufgstaut, pletzlich bricht da hohe domm, olle öffnungen woan zuaklebt, brauch a notprogromm.
2)
Öffne longsom meine augn, inhalia des letzte licht, und da bunte regnbogn, hot ka freie sicht
Mei lebm soi on wos glaubm, in da ewigkeit eastoat, afoch imma weida gflogn, bis zum heakunftsoat
Spia jetzt die gravitation, die woahheit wiad zum oiptraum, ströme aus licht zeign den weg, fliess duach zeit und raum
Boid kumts donn zua reaktion, die flut übaschwemmt des lond, des boot treibt hüflos auf an fleck, ohne widastond.
3)
Öffne longsom meine augn, schwoaz und weiss wexln si ob, mei schochbrett is aus stein gehaun, und bewocht des grob
mei lebm soi si entlaubm, jedes blott eazöht a gschicht, weise sprüche schenkn vatraun, vamocht a nochricht
Spia jetzt den innren friedn, pletzlich eagibt ois an sinn, jeds passlteil hot jetzt sein plotz, scho seit onbeginn
Jetzt stehts no unentschiedn, jedes moi a klans gefecht, kämpfn um den mythischn schotz, um des lebmsrecht.
ch 1a)
    Dieses lebmsrecht is in diamont gemeisslt, kana konns ausradian, obreissn oda zastöan
    Dieses lebmsrecht wuade jedn tog gegeisslt, dieses lebmsrecht konn sei foita, sei quoi beschwöan
    Dieses lebmsrecht übawindet schmeaz und hoate pein, kana konns zabrechn, spoitn und pulvarisian
    Dieses lebmsrecht erstroiht bei sonn-, mond- und kreaznschein, dieses lebmsrecht konn sei eneagie aktivian.
4)
Öffne longsom meine oahn, loss jedes geräusch hearein, heisse es heazlich wükommen, bin jetzt gonz allein
Mei lebm soi net rumoan, soi no jedes flüstan hean, vasteh ois nua no zaronnen, mecht no net umkeahn
Spia jede klanste schoiwön, mei trommlfö is guad gsponnt, des winzige loch is geflickt, proi voi auf die wond
Muass mi trotzdem no vastön, lausch intensiv in d‘natua, hob mi mit blättan vastrickt, is die foische spua.
5)
Öffne longsom meine oahn, inhalia den letztn ton, und die mystische symphonie, vahoit in beton
Mei lebm soi weidaboahn, do da stüstond is eareicht, vaflogn is die euphorie, zweite haut obstreift
Spia jetzt dieses magnetföd, des mi innalich zareisst, da sonnenwind haucht a liabs woat, des nix guads vaheisst
Vielleicht bin i auseawöht, find die foaml füas warum, die frogn bleibm eisan hoat, im delirium.
6)
Öffne longsom meine oahn, laut und leis wexln si ob, da klongteppich deckt mi wach zua, und bewocht des grob
Mei lebm deaf net eastoan, jede notn singt a liad, kluge texte mochn kultua, hobms scho dekodiat
Spia jetzt die friedliche stün, pletzlich is da weg gonz kloa, jedes sondkoan und jeda stein, is a lebmsjoah
Hob jetzt no an frein wün, is a kompliziats geflecht, schäaft mei sölisches bewusstsein, und mei lebmsrecht.
ch 1b)
    Dieses lebmsrecht is in hoatn stein eingraviat, kana konns löschn, vawüstn, oda ausschlogn
    Dieses lebmsrecht wuade jedn tog massakriat, dieses lebmsrecht kennt ontwoatn auf die frogn
    Dieses lebmsrecht untadrückt die brutalität, kana konns niedareissn, aufreibm oda zahaun
    Dieses lebmsrecht strotzt voa lauta vitalität, dieses lebmsrecht hot a endloses söbstvatraun.
ch 2a)
        Do des lebmsrecht hot a pflichtn zu eafülln, muass ois offnlegn, deaf nix vahülln
        Und des lebmsrecht braucht a vahondlungsgeschick, oi die argumente hom an weitblick
        Und des lebmsrecht nutzt jede gelegnheit, voa- und nochteile vaschmözn mit da zeit
        Do des lebmsrecht hot sei eignes lebm valoan, dieses lebmsrecht is mit mia zomm vastoam.
7)
Öffne longsom meinen mund, loss die atemluft hearein, heisse sie heazlich wükommen, bin jetzt gonz allein
Mei lebm suacht noch an grund, da sinn zaspringt im vastond, hob vüz weng dazuagewonnen, a dauazuastond
Spia die zön, wie sa si drehn, brauchn dringend sauastoff, a mei heaz pumpt scho wie varuckt, a valossna hof
Da wind muass mein schrei vawehn, hot si donn in luft aufglöst, hob mi on meina stimm vaschluckt, hob mei woat entblösst.
8)
Öffne longsom meinen mund, inhalia den letztn hauch, und da unsteabliche gesong, mutiat donn zu rauch
Mei lebm schliesst scho an bund, die ontwoat is positiv, sprich und sing mit an tiafn klong, is so intensiv
Spia jetzt dieses schwoaze loch, treibt den nebl aus da bahn, vaschlingt giarig schnö zeit und raum, hot vafoigungs-wahn
A klane figua beim schoch, hot glei den könig besiegt, gfongen in an ewign traum, hot net meah zruckblickt.
9)
Öffne longsom meinen mund, auf und zua wexln si ob, mei uaoide sproch is ausgstoam, und bewocht des grob
Mei lebm braucht an befund, jedes woat is hia gesetz, do diesa text is zu vawoan, gfongen in an netz
Spia tiaf in mia die weisheit, pletzlich fühl i mi so leicht, jeda buchstob und jede zoih, hom iah zü eareicht
Des licht nimmt si seah vü zeit, is a kompliziats geflecht, dieses buach is geheimnisvoi, und a des lebmsrecht.
ch 1c)
    Dieses lebmsrecht is auf vasteinats hoiz einbronnt, kana konns demolian, vanichtn oda vadeam
    Dieses lebmsrecht homs afoch jedn tog entmonnt, dieses lebmsrecht wiad sei wissen weidavaeam
    Dieses lebmsrecht ignoariat wundn, tiaf und frisch, kana konns zasetzn, sprengen, oda ruinian
    Dieses lebmsrecht gedeiht befreit und hoamonisch, dieses lebmsrecht konn si alla regenarian.
ch 2b)
        Do des lebmsrecht soi seine pflichtn ausfüahn, muass olle details onschaulich aufschnüan
        Und des lebmsrecht braucht a übazeugungskroft, entdeckt unta jedm stein a botschoft
        Und des lebmsrecht sät und eantet die woahheit, legendn, mythn vaschmözn mit da zeit
        Do des lebmsrecht hot sei eignes lebm valoan, dieses lebmsrecht is mit mia zomm vastoam.
ch 3a)
            Mia homs des lebmsrecht hintarucks gstoihn, obeakonnt und tiaf vagrom
            Mei lebmsrecht is z‘schwea füa die woogschoin, mit da kronkheit vawom
            Mia homs des lebmsrecht meuchlings geraubt, eiskoid genial vasteckt
            Mei lebmsrecht is varottend vastaubt, die eadn hot mi wach zuadeckt.
10)
Öffne longsom meine haut, loss olle sinn hearein, heisse sie heazlich wükommen, bin jetzt gonz allein
Mei lebm woa so vatraut, vabundn mit harmonie, trotzdem vüz vü weggenommen, von meina chemie
Spia die poan tiaf in mia, gibt ma sichaheit und schutz, jede wundn is glei vaheilt, a noabmvaputz
Oba eifasucht und gia, hom den neid in si aufgsaugt, hom si schnö übaroi vateilt, des ois unealaubt.
11)
Öffne longsom meine haut, inhalia den letzten heiltronk, und weit tränende elegien, londn auf da bonk
Mei lebm afoch vabaut, ka freie stö, ka vüfoit, woan afoch nua allegorien, wiad schee longsom koid
Spia dunkle materie, die mein keapa sonft liebkost, des univeasum endlos weit, und seah vawoahlost
Leb auf da grenzlinie, da schmale grat find ka end, die schoafe kantn is bereit, von mia donn obtrennt.
12)
Öffne longsom meine haut, rauh und weich wexln si ob, des chamäleon lebt in mia, und bewocht des grob
Mei lebm scho fost obgflaut, jede foab glänzt im schutzschüd, jede nuance a souvenia, gehäutet füas büd
Spia des reissn, zean und ziehn, pletzlich siag i donn des licht, da onfong vabeisst si ins end, und hot freie sicht
Des gefühl mecht gean entfliehn, is a kompliziats geflecht, diese haut homs eiskoid duachtrennt, und a des lebmsrecht.
ch 1d)
    Dieses lebmsrecht is in buntn glos eingeritzt, kana konns vawischn, entfeanen oda vareim
    Dieses lebmsrecht homs jedn tog wieda aufgschlitzt, dieses lebmsrecht wiad si ois genau aufschreim
    Dieses lebmsrecht meditiat jedn schmeaz weit weg, kana konns zamoimen, easchüttan oda brechn
    Dieses lebmsrecht reicht von da bruckn bis zum steg, dieses lebmsrecht wiad si amoi hamlich rächn.
ch 2c)
        Do des lebmsrecht muass seine pflichtn eakläan, muass olle untalogn glei gewäahn
        Des lebmsrecht braucht an fein schoafn intellekt, und vadient an gebüahrendn respekt
        Des lebmsrecht losst nix unvasucht, is bereit, oi seine föhla vaschmözn mit da zeit
        Do des lebmsrecht hot sei eignes lebm valoan, dieses lebmsrecht is mit mia zomm vastoam.
ch 3b)
            Mia homs des lebmsrecht eiskoid entfeant, vaweigat und tiaf vagrom
            Mei lebmsrecht hot wieda ois valeant, wiad seina mocht enthom
            Mia homs des lebmsrecht eiskoid entfüaht, bleibt afoch spualos vaschoin
            Mei lebmsrecht nie meah wieda berüaht, nua die eadn kumt no ins roin.
ch 4a)
                Dieses lebmsrecht kämpft mit letzta kroft, die pflicht zu steabm hot vü meah mocht
                Dieses lebmsrecht geht donn in die knie, die pflicht zu steabm entfocht a phobie
                Dieses lebmsrecht wuade jetzt besiegt, die pflicht zu steabm hot weise genickt
                Dieses lebmsrecht om bodn eafroan, die pflicht zu steabm hot ois hearaufbeschwoan.
13)
Vaschliess jetzt meine augn, loss die finstanis hearein, heisse sie heazlich wükommen, bin jetzt gonz allein
Mei lebm wiad vastaubm, die kroftreseavn vabraucht, die kötn wiad si belohnen, is ins nix eintaucht
Spia a schäafe tiaf in mia, mei ongst voam tod rotiat, mei keapa vakrompft und eastoat, mei heaz deseatiat
Brauch a zaubaelexia, pletzlich bricht mei widastond, hätt ma so vü lügn easpoat, offn steht die wond.
14)
Vaschliess jetzt meine augn, inhalia des letzte licht, und da bunte regnbogn, hot ka freie sicht
Mei lebm soi on wos glaubm, tiaf in die ewigkeit gfoin, mi im labyrinth vaflogn, muass dafüa bezoihn
Spia jetzt die gravitation, duachgebrochn is da zaun, ströme aus licht zeign den weg, fliess duach zeit und raum
Befreit duach die reaktion, wiad da letzte gang a spü, geh lächelnd üban woiknsteg, eareich jetzt mei zü.
15)
Vaschliess jetzt meine augn, die schwäazn kumt im galopp, da friedhof is scho voi besetzt, und bewocht mei grob
Mei lebm wiad si entlaubn, jeds blott vafäabt und vadoat, die seitn vom buach san zafetzt, und vastehn ka woat
Spia jetzt den innren friedn, pletzlich eagibt ois an sinn, jeds passlteil hot jetzt sein plotz, scho seit onbeginn
Jetzt hot si ois entschiedn, jedes moi a klans gefecht, kämpfn um den mythischn schotz, um des lebmsrecht.
ch 1e)
    Dieses lebmsrecht steht nua in an uaoidn buch, jeda konns spielend leicht stöhn, vabrenna und vagrom
    Auf diesm lebmsrecht lostet a brutala fluch, dieses lebmsrecht wuade ins niavana vaschom
    Dieses lebmsrecht woa ängstlich, feig und depressiv, jeda konns malträtian, hoat missbrauchn und enteahn
    Dieses lebmsrecht treibts mit den pflichtn exzessiv, dieses lebmsrecht konn auf seim weg net meah umkeahn.
ch 2d)
        Do des lebmsrecht hot üba die pflichtn glocht, hot olle details dem feua vamocht
        Des lebmsrecht hot mi varotn und entweiht, und hot mein lebmswün gonz foisch eingreiht
        Des lebmsrecht hot mi belogn und entstöt, vaschmözt zum extrem bluadigrodn schlochtföd
        Denn des lebmsrecht hot sei eignes lebm valoan, dieses lebmsrecht is mit mia zomm vastoam.
ch 3a)
            Mia homs des lebmsrecht hintarucks gstoihn, obeakonnt und tiaf vagrom
            Mei lebmsrecht vüz schwea füa die woogschoin, mit da kronkheit vawom
            Mia homs des lebmsrecht meuchlings geraubt, eiskoid genial vasteckt
            Mei lebmsrecht is varottend vastaubt, die eadn hot mi wach zuadeckt.
ch 3b)
            Mia homs des lebmsrecht eiskoid entfeant, vaweigat und tiaf vagrom
            Mei lebmsrecht hot wieda ois valeant, wiad seina mocht enthom
            Mia homs des lebmsrecht eiskoid entfüaht, bleibt afoch spualos vaschoin
            Mei lebmsrecht nie meah wieda berüaht, nua die eadn kumt no ins roin.
ch 4b)
                Mei lebmsrecht kapituliat, gibt auf, die pflicht zu steabm nimmt a in kauf
                Mei lebmsrecht geht donn in die knie, die pflicht zu steabm a todesphobie
                Mei lebmsrecht is vüz leicht besiegt woan, die pflicht zu steabm wiad neu geboan
                Mei lebmsrecht san asche, eade und staub, die pflicht zu steabm mocht an blind, stumm und taub.
ch 5a)
                    Dieses lebmsrecht spoitet des lebm und wiafts dem tod voa die fiass
                    Dieses lebmsrecht konn nix meah gebm und lächlt heuchlarisch siass
                    Des lebmsrecht woat gnädig auf sein tod und suacht des heilige licht
                    Dieses lebmsrecht wiad zum behemoth, und eafüllt jetzt sei steabepflicht.
1)
Öffne longsom meine augn, loss die dunklheit hearein, heisse sie heazlich wükommen, bin jetzt gonz allein
Mei lebm soi net vastaubn, soi no voa kroft explodian, siag afoch scho zvü vaschwommen, mecht no net eafrian
Spia a kötn auf da haut, mei ongst schwitzt mi völlig noss, und mei keapa zittat und bebt, bin scho wünlos
So vü hot si scho aufgstaut, pletzlich bricht da hohe domm, olle öffnungen woan zuaklebt, brauch a notprogromm.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 06./07./08./09./10. jänner 2015.pk.
Überarbeitet am 05. jänner 2017.pk. – copyright by philipp kirschner.pk.

***********************************************************************************

bleibt mir weiterhin gewogen.

euer philjazzmetal, der mundartige.