398. | moch no net schluss

seid gegrüsst, meine lieben treuen, braven textleserinnen und textleser meines mundartigen blogs. danke sogleich dafür. in den letzten vier tagen ist dieser text entstanden. wünsche euch nun ein informatives lesevergnügen der besonderen art.

>>>>>>>>>>>>>>>>>>>>>>>>>><<<<<<<<<<<<<<<<<<<<<<<<<<

398. | moch no net schluss

Schlof tiaf und fest unta an grossn dichtn baum, wie wökes laub raschlt in mia a traum

Konn eam net manifestian, is unontastboa, konn die foabm net berüahn, völlig unsichtboa

Fliag mit leichtigkeit duach diesn zeitraum, tiaf untn eastreckt si a longa zaun

Reicht bis zum horizont, mutiat zum labyrinth, valia wieda mein vastond, donn des end beginnt.

Wü net scho wieda ins koma foin, hob diesn scheiss scho vüz oft ealebt, bin oba imma wieda aufgwocht

Wü net scho wieda ois übamoin, hob diesn scheiss scho vüz long mitgschleppt, hob vüz long in diesm sumpf vabrocht

Wü endlich aus dem kreislauf entfliehn, hob den dominoeffekt scho sott, deaf jetzt mei letzte schons net vatun

Mei sinnloses lem is nua geliehn, woa hia niemois mei eigna pilot, foi wieda zruck ins delirium.

      Kum do wieda zruck, und hoit jetzt mei hond, vaspüa so vü druck, in mein vastond

      Befrei mi vom schmeaz, und sing ma wos voa, mit mia gehts obwäats, schau scho empoa

      Streichl mi gonz zoat, und gib ma an kuss, sog do nua a woat, moch no net schluss

      I brauch ka mitleid, hob diesn weg gwöht, brauch nua no meah zeit, auf diesm schlochtföd.

Schlof tiaf und fest auf an schrillgrön woiknbond, vasink scho tiafa im rieslnden sond

Eareich kan hoitegriff, wea boid gänzlich vaschluckt, nebm mia s‘seglschiff, da onka hots zadruckt

Geh gmiatlich spazian auf ana senkrechtn wond, schau gonz neigierig üban hechstn rond

Des chaos mocht si breit, die grodn hot si krümmt, valia mi in da zeit, da raum woa unvadünnt.

Wü net scho wieda in d’leare foin, hob diesn scheiss scho vüz oft mitgmocht, hobs imma iagendwie übalebt

Wü mi net scho wieda söbst vastreun, hob mit diesm scheiss zvü zeit vabrocht, bin scho längst mit diesm sumpf vaklebt

Wü endlich aus da rundn entfliehn, die gföschtn wüafln roin weit davon, deaf diesn moment net übasehn

Mei nutzloses lem is nua geliehn, woa niemois mit meim heazschlog synchron, konn vom bodn net meah leicht aufstehn.

Brauch jetzt dringend wieda a straffe oadnung und disziplin, gebts ma endlich a reinigende medizin

Brauch jetzt dringend wieda strenge regln und an hoatn drill, vabietets ma endlich dieses süchtige spiel

Fesslts mi on händ und fiass und speats mi in a finstres loch, gebts jo net auf mei wimman, heuln und bittn noch

Steckts mi in a zwongsjackn und schnoits mi hoat aufs wache bett, weafts mi endlich wieda in die realität.

      Kum do endlich zruck, und hoit mi gonz fest, gibt so vü betrug, in diesm nest

      Befrei mi von quoin, und schau mi liab on, wea eh ois bereun, fong von voan on

      Streichl do mei gsicht, und gib ma an kuss, schenk ma do dei licht, moch no net schluss

      Brauch ka mitgefühl, hob diesn schritt gmocht, bin a molekül, nua in diesa schlocht.

            Moch no net schluss, dafüa gibts do kan richtign grund, bin a brodlnda fluss, und a vagabund

            Wiaf net ois weg, so vü eainnarungen vaeint, bin a glühenda fleck, oba net dei feind

            Moch no net schluss, dafüa gibts übahaupt ka motiv, bin a negativs plus, mit an lanznstich

            Loss net ois los, hom so vü obmteia ealebt, bin a stoaka amboss, dea den homma zasägt.

Schlof tiaf und fest zwischn schichtn aus schwoaz und weiss, die foabm foadan an vüz hohn preis

Tauch in hohn atmosphäan, duach mei utopie, konns abstrakte net obweahn, in meina amnesie

Foig meim woahn schicksoi in an ewign kreis, mei keapa untaliegt dem stoakn vaschleiss

Mei gia hot mi in da gwoit, kontrolle valoan, die hebl san umgschoit, in da zeit eafroan.

Wü net scho wieda ins dunkle foin, hob diesn scheissdreck scho vüz oft gspüat, hob wieda meine augn aufgmocht

Wü mi net scho wieda übahoin, hob endlich diesn scheiss fest vaschnüat, da sumpf lockt mit seina gonzn procht

Wü endlich ausm gfängnis entfliehn, do die lawin hot mi wach zuadeckt, deaf des bissl glück net provozian

Mei planloses lem is nua geliehn, jetzt trifft mi da schmettalingseffekt, mecht nua seine fliagl demolian.

Brauch jetzt dringend wieda moi an exaktn plan mit system, lösts do endlich mei wiedakeahrendes problem

Brauch jetzt dringend wieda a korrekt definiate struktua, vaweahts man rückblick auf mei hintalossne spua

Legts ma kettn um händ und fiass und weafts mi donn üba boad, hobts ka vatraun auf an kompromiss, auf mei woat

Steckts mi in an engen käfig und hängts eam drausst auf an baum, hoits mi jetzt endlich wieda aus diesm oiptraum.

      Kum do zu mia zruck, und hoit mi schee warm, auf meim höhnflug, gibts an alarm

      Befrei mi vom leid, und red ma guad zua, hob net meah vü zeit, leist scho an schwua

      Streichl mei ego, und gib ma an kuss, eahöa mei echo, moch no net schluss

      Brauch ka bedauan, hob diesn stein gsetzt, steh auf da maua, in da schlocht valetzt.

            Moch no net schluss, dafüa gibts do goa kan onhoitspunkt, foi scho aus mein rhythmus, scho vüz tiaf eintunkt

            Vagrob net ois, hom so vü sponnende gschichtn gschriem, bin a höd bestnfois, ohne symmetrien

            Moch no net schluss, dafüa gibts goa kan zusommenhong, bin a ka ausschuss, mit an hohln klong

            Drängs net zweit weg, unsre liebe woa exorbitant, woa ka mittl zum zweck, a roha diamant.

                  Valoss mi net afoch ohne iagend a reaktion, moch no net schluss wegn meina aggression

                  Valoss mi net afoch ohne iagend a resonanz, moch no net schluss wegn meina diskrepanz

                  Valoss mi do net afoch ohne iagend an reflex, moch no net schluss nua wegn mein suchtkomplex

                  Valoss mi net afoch ohne iagend a fundament, moch no net schluss wegn mein drogntalent.

Schlof tiaf und fest mittn in an dichtn uawoid, die noadlichta leuchtn gonz stü und koid

Die ochtabohnfoaht schauklt si imma meah auf, übaflutet mei oat, mein innren amoklauf

Schleich getarnt duach die voikommen gschmoizne vüfoit, die einsomkeit findt hia goa kan inhoit

Mei sucht hot si vaiat, auf an steiln plateau, den obstieg net kapiat, hea den schrei vom echo.

Wü do net scho wieda ins nix foin, hob diesn scheiss scho vüz oft kopiat, hob mei lebm wieda rübagrett

Wü do net mit volla wucht aufproin, hob diesn scheiss vüz long akzeptiat, diesa sumpf is mei letztes gebet

Wü endlich aus dem nebl entfliehn, die freie sicht is vaschwommen trüb, deaf jetzt diesn fluchtweg net zastean

Mei weatloses lem is nua geliehn, meine gefühle hom no nie blüht, konn diesn hoatn schlog net obweahn.

Brauch jetzt dringend wieda a gewissnhofte übasicht, entziagts ma do endlich dieses schleichende gift

Brauch jetzt dringend wieda a präzis aufgebautes gerüst, hob in mein traum scho oft den tod heazlich begrüsst

Legts mi gfesslt in an plastiksock und giessts mi in beton, vawondl mi donn innalich in a phantom

Steckts mi in an giarign fleischwoif und vateilts mi gerecht, hoits mi do endlich aus diesm dichtn geflecht.

      Kum do bitte zruck, und hoit mi instond, bei diesm entzug, scheint da voimond

      Befrei mi von pein, und gib ma hoffnung, is net nua zum schein, moch a den sprung

      Streichl do mei haut, und gib ma an kuss, hob nua dia vatraut, moch no net schluss

      Brauch ka vaständnis, hobs freiwillig gmocht, die zeit hot an riss, in da letztn schlocht

            Moch no net schluss, dafüa gibts do no goa kan beweis, fühl mi wie a ausguss, mit hohem vaschleiss

            Weich do net aus, hom gemeinsom signalfeua gsetzt, woa do dei augnschmaus, mitanond vanetzt

            Moch no net schluss, dafüa gibts do kan vadochtsmoment, bin a dickes minus, bin net existent

            Hoit di net zrück, hom unsre gedonkn rezitiat, hobs alla übabrückt, in da schlocht amputiat.

                  Valoss mi net afoch ohne iagend a reaktion, moch no net schluss wegn meina aggression

                  Valoss mi net afoch ohne iagend a resonanz, moch no net schluss wegn meina diskrepanz

                  Valoss mi do net afoch ohne iagend an reflex, moch no net schluss nua wegn mein suchtkomplex

                  Valoss mi net afoch ohne iagend a fundament, moch no net schluss wegn mein drogntalent.

                        Bitte, moch no net schluss, brauch jetzt diese univeaselle zeremonie

                        Bitte, moch no net schluss, bin süchtig noch diesa phantastischn eneagie

                        Bitte, moch no net schluss, mei obhängigkeit losst si jetzt net meah umdrehn

                        Drum, moch jetzt no net schluss, gib ma do endlich wieda den reinen stoff füas lem.

Schlof tiaf und fest unta an grossn dichtn baum, wie wökes laub raschlt in mia a traum

Konn eam net manifestian, is unongreifboa, konn die foabm net berüahn, völlig unsichtboa

Fliag mit leichtigkeit duach diesn zeitraum, tiaf untn eastreckt si a longa zaun

Reicht bis zum horizont, mutiat zum labyrinth, valia wieda mein vastond, donn des end beginnt.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 04./05./06./07. Dezember 2016.pk - copyright by philipp kirschner.pk

******************************************************

nochmals ein herzliches dankeschön für euer interesse, für eure lange treue, euren oftmaligen besuch und für eure investierte zeit, die ihr alle ins lesen und übersetzen dieser mundartigen texte steckt. vielen lieben dank dafür.

und hier wieder die üblichen links:

übersicht band 2

übersicht band 4 und band 3

facebook

twitter

google+

literatpro - meine gedichte band 2

danke für alles. und ich habe noch eine grosse bitte.

bleibt mundartig gesund und bleibt mir weiterhin gewogen.

euer philjazzmetal, dialectiloquax, der mundartige.