357. | Dimensionen.

meine lieben textmaniacs. ich darf euch nun den nächsten text präsentieren, der da lautet:

>>>>>>>>>>>>>>>>>>>>>>>>><<<<<<<<<<<<<<<<<<<<<<<<<

357. | dimensionen.

Mei schädl brummt und dröhnt, mei gsicht is hass und rot, mei schrei hot ois übatönt, ohne mass und zü in da not

Mei müdigkeit schloft nie, mei kroft losst a scho noch, hob füa nix a eneagie, vasteh net meah mei eigne sproch

Mei keapa schmeazt und quöt, mei heaz is ausm takt, hob mein wün obbestöt, mei lebnsgeist hot si vahakt

Mei haut rissig und rau, die wundn schlecht vaheilt, die foab tendiat scho zu grau, wuade zua busse vauateilt.

Meine muskln gehn zruck, meine händ zittan scho, vüz schwea is da eigne druck, moch ois im zeitlupntempo

Mei wöd is jetzt mei bett, gibt ka fluchtmeglichkeit, fein seaviat auf an tablett, bleibt füa mi nua a kuaze zeit

Innalich trocknglegt, vasondet mei vastond, die eainnrung scho zasägt, kane büda meah auf da wond

Ka frog füa mei ontwoat, des lebnsbuach is krong, hob die seitn nua ongstoat, riach scho an obscheulichn gstonk.

      Vasink liaba in meine traim volla obmteialust, abstrakta visionen und phantasien

      Vasink liaba in meine traim volla lemsgfäahlicha mutprobn, illusionen und utopien

      Vasink liaba in meine traim volla unhamliches grausn, sensationen und asymmetrien

      Benötig jetzt dringend die ondren dimensionen mit iahn vaschiednen praktikn und theorien.

Mei schwäche is vüz schwea, mei sucht losst mi nie los, vasuach goa ka gegnweah, treib üba stromschnön auf an floss

Mei gleichgwicht is umkippt, bin om bodn eastoat, hob wieda völlig foisch tippt, die wett hätt i ma gean easpoat

Die traua hot mi gjogt, foi in a depression, bin vazweiflt und vazogt, die tränen näahn die korrosion

Bin vanoabt und gebeugt, des unglück is mei freind, hob kan beföh mea befoigt, hob mit da melancholie gweint.

Die insl is vüz klan, tauch tiaf im weissn sond, bin im wossa gonz allan, niagends befindet si a lond

Mei einsomkeit bewocht, mein stuaz in den trübsinn, vüz kuaz is da oide docht, füa mi gibts goa kan neibeginn

Die flomm is nua a glühn, und da rauch steigt ind luft, in mia is ois om vablühn, nua no a poa schritt voa da gruft

Ka ontwoat auf mei frog, unlesalich die schrift, diesa brief woa a vatrog, die sonfte stimm woa reinstes gift.

Muass von diesm unhamlichen oat und von diesa realität flüchtn und entfliehn

Muass aus diesa obsuadn sinnlosn zeit die letztn logischn konsequenzn ziehn

Muass mi in meditation vasinkn, loss mi fedaleicht und unbeschweat ins nix foin

Muass die leichtigkeit des seins east vastehn und füa meine fataln föhla bezoihn.

      Vasink liaba in meine traim volla euphorie, sprühenda begeistarung und temparament

      Vasink liaba in meine traim volla berauschtn exzessn und an genüsslich siassn glücksmoment

      Vasink liaba in meine traim volla passioniata leidnschoft, sympathie und an kompliment

      Benötig jetzt dringend die ondren dimensionen mit iahm raffiniatn weakzeug und instrument.

            In diesn dimensionen fühl i mi geboagn wie in muttas schoss

            In diesn dimensionen kennt die freiheit ka grenzn, ka tüa, ka schloss

            In diesn dimensionen wead i wieda keangesund, strotz donn voa kroft

            In diesn dimensionen bekomm i endlich die heiss easehnte botschoft.

Mei kronkheit expandiat, stroiht üban horizont, die beschweadn san mutiat, ka zön wiad jemois vaschont

Die foita heat net auf, a endlosa obgrund, is mei letzta amoklauf, mei schrei is no long net vastummt

Mei keapa is defekt, da kreislauf geht scho noch, afoch nix läuft meah korrekt, hob a moasches, undichtes doch

Gfongen im labyrinth, leb i om ausgongspunkt, hob den zuastond net vadient, des schicksoi hot dazwischngfunkt.

Die zentren san entgleist, jeds rad kumt zum stüstond, leise rieslt scho mei geist, bis üba mein sölischn rond

Mei aura scho vablasst, da äussre schein betrügt, hob die letzte schons vapasst, die stana vom mosaik plückt

Da wahn hot scho onklopft, hot si höflich voagstöt, die gedonkn san scho tropft, in a offnes varücktes zöt

Ka frog füa mei ontwoat, vaschwommen is jeds büd, die synapsn san vaschmoat, aus feigm wind besteht mei schüd.

Muass jetzt dringend von diesm vafluachtn oat vaschwindn und bleib donn hoffentlich vaschoin

Muass jetzt an kräftig monströsn schlussstrich ziehn, nua des brave guade heit deaf weidaroin

Muass oi mei geschwächte konzentration bündln und meine instinkte intensivian

Muass die uneaträglichkeit des übaiadischn east vastehn und konkret akzeptian.

      Vasink liaba in meine traim volla übaschwong, heitra ausgelossnheit und vitalität

      Vasink liaba in meine traim volla übaschäumenda fröhlichkeit und eafrischta spontanität

      Vasink liaba in meine traim volla schreckhofta panikattackn und extrema peaveasität

      Benötig jetzt dringend die ondren dimensionen mit iahra oiwissenden weisheit und qualität.

            In diesn dimensionen fühl i mi guad beschützt wie in muttas schoss

            In diesn dimensionen kennt die singularität kan gegnstoss

            In diesn dimensionen wead i wieda geboan, hob mei rüstung on

            In diesn dimensionen läuft mei getriebe mit mein vastond gonz synchron.

                  Olle eainnarungen vamischn si zu an schizophrenen einheitsbrei

                  Nua in diesn dimensionen bekämpf i mit olla mocht diese tyrannei

                  Olle lebnsgschichtn schmözn fliessend in a hasse suppm aus schmutz und dreck

                  Nua in diesn dimensionen schlof i endlich wieda sicha in meim vasteck.

Mei hungaduascht entflommt, zum tiafn wossafoi, da regnbogn entkommt, dem reinigenden feuaboi

Mei hoss wütet brutal, mei rache sonft und weich, mei gia geniesst gonz frontal, den unfair vadientn ausgleich

Mei spieglbüd zabricht, in da vakeahtn wöd, die scheabn brechn des licht, hob mi beim aufhebn vazöht

Denn es gibt ka zurück, die richtung is voagem, übaroi föht scho a stück, die bestie eawocht zum lem.

Den sinn im nebl taucht, hot si no meah vaschäaft, an heisan schrei no ausghaucht, in da eignen onstoit einpfeacht

Des zü no net eareicht, die schritt moch i im schlof, da bodn scho dopplt aufgweicht, stiaz endlos tiaf ins schwoaze loch

Da wunsch bleibt uneafüllt, hob den wün scho valoan, hob den zettl scho zaknüllt, olle hom si gegn mi vaschwoan

Ka ontwoat auf mei frog, hob jetzt an fümriss, pletzlich trifft mi donn a schlog, die theorie wiad zua praxis.

Muass von diesm schaurig finstren, bedrohlichn oat und aus diesa sackgossn obhaun

Muass des nahe end mit nochdruck obwoatn und aufd heile seite des jenseits vatraun

Muass mei vasunkne wochsomkeit wieda aufspüan und mei denkvamögn eaneut trainian

Muass die obgeschiednheit da uneafoaschtn ewigkeit east vastehn und inhalian.

      Vasink liaba in meine traim volla leidnschoftn, eahöhta aufbruchstimmung und ambition

      Vasink liaba in meine traim volla vazückung, taumelnda begeistarung und puara illusion

      Vasink liaba in meine traim volla fiebriga eawoatung, extatisch vazückta emotion

      Benötig jetzt dringend die ondren dimensionen mit iahra fesslnden sponnendn faszination.

            In diesn dimensionen fühl i mi behütet wie in muttas schoss

            In diesn dimensionen kennt die schwearelosigkeit kane echos

            In diesn dimensionen wead i wieda eafrischt, hob gnua obweahkräft

            In diesn dimensionen vaknüpfn si die einsomen sön zum geflecht.

                  Olle eainnarungen vamischn si zu an schizophrenen einheitsbrei

                  Nua in diesn dimensionen bekämpf i mit olla mocht diese tyrannei

                  Olle lebnsgschichtn schmözn fliessend in a hasse suppm aus schmutz und dreck

                  Nua in diesn dimensionen schlof i endlich wieda sicha in meim vasteck.

                        Diese dimensionen san mei letzte rettung, mei letzte station und mei letzta hoit

                        Zu diesn dimensionen woa diesa endlos weide weg pflostat mit häate und gwoit

                        Diese dimensionen san füa mi des woahre paradies, des vaheissungsvolle lond

                        In diesn dimensionen spia i des stoake phänomenale obsolute bond.

Mei schädl brummt und dröhnt, mei gsicht is hass und rot, mei schrei hot ois übatönt, ohne mass und zü in da not

Mei müdigkeit schloft nie, mei kroft losst a scho noch, hob füa nix a eneagie, vasteh net meah mei eigne sproch

Mei keapa schmeazt und quöt, mei heaz is ausm takt, hob mein wün obbestöt, mei lebnsgeist hot si vahakt

Mei haut rissig und rau, die wundn schlecht vaheilt, die foab tendiat scho zu grau, wuade zua busse vauateilt.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 29. Februar // 01./02./03. März 2016.pk – copyright by philipp kirschner.pk

****************************************************

nochmals ein herzliches dankeschön für euer interesse, für eure lange treue, euren mehrmaligen besuch und für eure investierte zeit, die ihr alle ins lesen und übersetzen dieser mundartigen texte steckt. vielen lieben dank dafür.

und hier wieder die üblichen links:

übersicht band 2

übersicht band 4 und band 3

facebook

twitter

google+

literatpro - meine gedichte band 2

danke für alles. und ich habe noch eine grosse bitte.

bleibt mundartig gesund und bleibt mir weiterhin gewogen.

euer philjazzmetal, dialectiloquax, der mundartige.