355. | Ungelöst

meine lieben. hier sogleich der nächste text für euch, damit ihr wieder etwas zu lesen habt.
ein grosses dankeschön an euch für eure treue und euren besuch. es freut mich ungemein, dass dieser blog euch gefällt. hier nun der text:

>>>>>>>>>>>>>>>>>>>>>>>>>>>>>><<<<<<<<<<<<<<<<<<<<<<<<<<<<<<

355. | ungelöst.

Seah stoak vawittat und tonnenschwea bedeckt, hom si vasteinate knochn tiaf in da ean vasteckt

Diese spezies is völlig unbekonnt, des long vamisste bindeglied zwischn wossa und lond

Die mutta eadn gibt den schotz no net preis, mit diesm sensationelln fund schliesst si donn da kreis

Voa joahmillionen is es zu stein mutiat, do die vagessnheit hot die reine woahheit negiat.

Stoak vawittat, ausgwoschn und moosbedeckt, hot si diesa uaoide sta unta vü laub vasteckt

Ma konn die inschrift net meah spian oda sehn, diesa fost unsichtboare sta muass si söba umdrehn

Diesa klane hügl aus blättan und ean, mecht sogean seim geheimen schotz no long zuflucht gewäahn

Voa joahtausendn wuade es in stein graviat, do die vagessnheit hot die reine woahheit negiat.

      So vü wissn schlummat no vaboagn und unbemeakt voa unsam vastond

      So vü mysterien existian direkt voa unsam aug, voa unsra hond

      So vü weisheit steckt in diesa natua, im unendlichn universum

      So vü rätsl bleibm ungelöst, vielleicht sogoa bis ins nächste millenium.

Tief gekühlt vom metahohn eis bedeckt, hot si diese mumie voa da gegnwoat vasteckt

Aus diesm tiafn schlof wocht ea net meah auf, denn sei tod beendete sein vüz kuazn lebnslauf

Sei letzte ruhestätte bewocht eam gut, die grobbeigobn leuchtn und stroihn im licht, in da glut

Voa joahtausendn wuade ea einbalsamiat, do die vagessnheit hot die reine woahheit negiat.

Eafroan in eisiga höh vom schnee bedeckt, hot si a einsoma mönch voa da tyrannei vasteckt

Die vafoiga hom die suche scho längst aufgem, die schwoazn woikn raubtn eana iah böshoftes lem

Da weise monn flieht no imma in seim traum, sei geheimnis bleibt auf ewig gfongen in diesm raum

Voa joahhundatn homs die weisheit liquidiat, und die vagessnheit hot die reine woahheit negiat.

Mecht endlich den unbeontwoatetn frogn, ohne ausred a kloas eagebnis präsentian

Mecht jetzt endlich den unschuidign onklogn, ohne voauateil den prozess manipulian

Mecht jetzt endlich den sinnlos valebtn togn, ohne sanktionen die lebnsfreude spendian

Mecht endlich dem ewign hintaheajogn, ohne umschweife die beute eliminian.

      So vü wissn liegt no guad getarnt und scho fost unsichtboa auf unsra haut

      So vü mysterien existian direkt voa unsra hond, voa unsam aug

      So vü weisheit steckt im unendlichn univeasum, in diesa natua

      So vü rätsl bleibm ungelöst, scheinboa find ma niemois davon a spua.

            Wia eafoaschn ois bis zum winzigstn atom, und stoan staunend in die unendlichkeit

            Unsa vastond läuft mit da zeit net meah synchron, jeds passlteil valiat sei hoitboakeit

            Wia kennan unsan wissnsdrong net meah zruckdrehn, so vü woahheitn homma scho entblösst

            Suachn vazweiflt nochm sinn in unsam lem, do vü geheimnisse bleim ungelöst.

Vom dichtn dschungl übawuchand bedeckt, hom si die uaoidn steinruinen voa uns vasteckt

Spian diese unduachdringliche dunklheit, riachn und schmeckn diese unberüaht rohe wüdheit

Riesige wuazln hom ois giarig vaschluckt, nua diese vasunknen schätze bleibm unbeeindruckt

Voa joahundatn woa jeda sta glott poliat, do die vagessnheit hot die reine woahheit negiat.

Vom metahohn betonbodn bedeckt, hom si tausende grosse und klane knochn vasteckt

Schrein iahre klogn ungehöat duach die wond, des unsichtboare gas bricht afoch jedn widastond

Die steane san längst varottet und vafault, dem braunen kriag wuade da heile sieg grod no vagrault

Voa joahzehntn wuadn opfa exekutiat, nua die vagessnheit hot die reine woahheit negiat.

Mecht endlich dem guadn wundascheenen moagn, ohne foischheit den sochvahoit analysian

Mecht endlich den plogendn eansthoftn soagn, ohne valognheit die wiaklichkeit seavian

Mecht endlich dem bestialisch wüdn moadn, ohne groll des friednsongebot offarian

Mecht endlich den flüchtendn vafoigtn hoadn, ohne umweg ind neie heimat einquartian.

      So vü wissn schloft no tiaf und fest mit oiptraim gespickt voa unsra tia

      So vü mystearien existian direkt voam fensta, voam revia

      So vü weisheit steckt im mikrokosmos, in jedm klanstn lebendign kean

      So vü rätsl bleibm ungelöst, vielleicht loss ma uns deshoib net beleahn.

            Denn wia studian die winzigstn materien, und staunen üba die unendlichkeit

            Unsa horizont stösst on begrenzte linien, des mosaik valiat sei echtheit

            Wia kennan unsan wissnsduascht net meah gonz stün, zvü woahheitn homma uns scho eingflösst

            Suachn scho vazweiflt noch unsam frein wün, do vü geheimnisse bleim ungelöst.

                  So vü is no ungelöst, is offn, unvoiendet, lücknhoft, so vü is no ungekläat

                  So vü bleibt no ungelöst, bleibt no unobgschlossn, ungewiss, so vü is no stoak vazeat

                  So vü scheint no ungelöst, scheint offn, unvoikommen, net gereift, so vü is no fest vaspeat

                  Denn so vü is no ungelöst, is net komplett, is no ungenügend, so vü is no gonz vakeaht.

Im dochbodn von an leintuach bedeckt, hom si hinta vastaubtn möbln büda guad vasteckt

Leuchtend kräftige foabn suachns licht, brauchn den augnkontakt von an kunstveasiatn gsicht

Is a föschung oda original, ka expeate eakennt technik odas material

Voa joahzehntn wuadns peafekt kopiat, do die vagessnheit hot die reine woahheit negiat.

Im kella von da zweitn wond vadeckt, hom si drei junge fraun füa peavease spiele vasteckt

Iah geschrei und gestöhn hot kana gheat, hom si nie üba diese sadistischn trieb beschweat

Da tägliche besuch woa gottgewoit, do gott hot eam pletzlich ohne voawoahnung zu si ghoit

Voa a poa joahn is a vüz fruah om krebs krepiat, und die vagessnheit hot die reine woahheit negiat.

Mecht endlich die fädn mitanond vaknotn, ohne föhla an glottn teppich produzian

Mecht endlich die äussastn grenzn auslotn, ohne suchtgefoah diesn nächstn sprung riskian

Mecht endlich von den letztn moaschn rettungsbootn, ohne schlechts gwissn die zwa ruda ausprobian

Mecht endlich den scheinheilign anekdotn, ohne humoa den eanst da lage konkretisian.

      So vü wissn ruht no tiaf vagrobn, mit euphorie woat ea auf sein fund

      So vü mysterien existian direkt auf unsam bodn, auf unsam grund

      So vü weisheit steckt in jedm klanstn lebendign kean, im mikrokosmos

      So vü rätsl bleibm ungelöst, des lebn schmiedet si söba aufm amboss.

            Wia obseavian die winzigstn teilchen aus kroft, und vaian uns in da unendlichkeit

            Unsre intelligenz hot si donn söbst bestroft, des dichte neavnnetz valiat den streit

            Wia kennan unsan wissnshunga net vatreim, diese woahheitn hom uns nua vatröst

            Suachn scho vazweiflt nochm lebnsbaustein, do vü geheimnisse bleibm ungelöst.

                  So vü is no ungelöst, is offn, unvoiendet, lücknhoft, so vü is no ungekläat

                  So vü bleibt no ungelöst, bleibt no unobgschlossn, ungewiss, so vü is no stoak vazeat

                  So vü scheint no ungelöst, scheint offn, unvoikommen, net gereift, so vü is no fest vaspeat

                  Denn so vü is no ungelöst, is net komplett, is no ungenügend, so vü is no gonz vakeaht.

                        A komet küsst donn unsre wöd, trotzdem hots dieses kaos übalebt

                        Da mensch stiabt donn aufm schlochtföd, trotzdem kniet a si hin zum stün gebet

                        Dwoahheit bleibt weitahin vaschoin, trotzdem zastean wia unsan lebnsbaum

                        Kennan die zeit net meah zruckhoin, drum bleibt des wissn ungelöst wie a traum.

                              Und da mond zeigt sei volles gsicht, trotzdem hot a uns no goa net ausglocht

                              Da mensch valiat scho sei gleichgwicht, trotzdem wieda aufgstondn, weidagmocht

                              Die woahheit is vüz kompliziat, trotzdem zastean wia unsan lebnsschüd

                              Hom die zeit foisch intapretiat, drum is des wissn ungelöst vaglüht.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 15./16./17./18. Februar 2016.pk – copyright by philipp kirschner.pk

******************************************************

nochmals ein herzliches dankeschön für euer interesse, für eure lange treue, euren mehrmaligen besuch und für eure investierte zeit, die ihr alle ins lesen und übersetzen dieser mundartigen texte steckt. vielen lieben dank dafür.

und hier wieder die üblichen links:

übersicht band 2

übersicht band 4 und band 3

facebook

twitter

google+

literatpro - meine gedichte band 2

danke für alles. und ich habe noch eine grosse bitte.

bleibt mundartig gesund und bleibt mir weiterhin gewogen.

euer philjazzmetal, dialectiloquax, der mundartige.