397. | In gedonkn

fürs erste, seid ihr mal aufs herzlichste gegrüsst, ihr lieben, braven und treuen textmaniacs! es hat lange gedauert, aber hier darf ich euch nun den neuen text präsentieren. diesmal ist es ein sehr persönlicher und trauriger. vor zwei jahren verstarb mein vater. mein bruder hat sich natürlich auch gedanken darüber gemacht, die ich nun in textform gebracht habe. es hat eine lange zeit gedauert, doch diese zeit brauchte ich. es war genau der richtige zeitpunkt und augenblick. 

diesmal sind es zwei vollgeschriebene din a4 seiten geworden, den ich euch nun hier vorstellen darf.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

397.     In gedonkn

In diesm brei volla traua und valust, eakenn i donn, wie weatvoi des lebm wiaklich is

Die tröstendn woate foign unbewusst, tränenreich schleppm sa si hin bis zum begräbnis

Beim obschiednehmen wiad ma voikommen kloa, doss unsre gemeinsome zeit afoch vüz kuaz woa

Meine gedonkn drahn si nua no um di, des vazweiflte nochdenkn eazeugt a anomalie.

Kum von diesm rätsl afoch net meah los, net nua da tod onsich sondan a du ois peason

Jeda gedonke on di gibt ma an stoss, scho wiad jeds gfüh vasoizn mit an heulendn ton

So vü offne frogn zu deim lebmsweg, so wenig ontwoatn in deina bibliothek

Hob nie dein gesomtn stommbaum kenna gleant, die räumliche und zeitliche distanz woan vüz zweit entfeant.

      Sitz vü zu oft gonz alla in da nocht, und denk intensiv üba die bishea vastoabenen noch

      Hob mit eich so vü gweint und a vü glocht, jeda wükommensgruss beschützend untam liebenden doch

      Die zeit schmüzt und varinnt vüz schnö dahin, gnua eainnarungen, gschichtn, büda san ma von eich bliem

      Brauch ka grob, ka keazn, a ka gebet, schliess nua meine augn, in gedonkn spia i eich wie a magnet.

In diesm brei volla sönschmeaz und leid, eakenn i donn, wie kostboa die liebe wiaklich is

Sogoa die woikn trogn a trauakleid, und da volle mond eazeugt a sonnenfinstanis

Die innre politik woa diametral, die sötne begegnung im friedlich harmonischn tal

Beim kompromiss hot nua no des gleichgwicht gföht, host jo dei eaziehung net gonz freiwillig ausgwöht.

Kum von diesm rätsl afoch net meah los, net nuas lebm onsich sondan du ois eigne figua

Deine gedichte woan jedsmoi viatuos, diese männavaeinigung hot a kloare struktua

Vü freude und freundschoft duach kunst und humoa, so lautet da leitspruch in diesm schlaraffnlond

In diesm reich besingt laut da männachoa, geisteswissnschoftn mit vü lebmslustigm vastond.

Nua dei innaste gefühls- und gedonknwöd, host ma nie so umfossend offnboat

Vielleicht hot si a maua in deinen weg gstöt, oda woas afoch nua dei wesnsoat

Hätt ma nua gwünscht, du hättst dei tüa gonz weit aufgmocht, damit i gonz tiaf in di reinschaun konn

Hob oft und long üba deine tatn nochdocht, rückschlüsse zogn, ois eafoahna monn.

      Sitz no imma oft alla in da nocht, und denk intensiv üba die bishea vastoabenen noch

      Hob mit eich so vü scheene zeit vabrocht, jeda wükommensgruss woa wie a leise sprudlnda boch

      Die zeit wiad kiaza, vüz schnö zum nullpunkt, gnua eainnarungen, gschichtn und büda hom si reingfunkt

      Brauch kan stan, ka keazn und a kan kronz, schliess nua meine augn, bitt eich in gedonkn um an nägstn tonz.

            In gedonkn sads iah stets on meina seitn, und eazöhts ma von eira ondan dimension

            In gedonkn weads iah mi imma begleitn, duach zeit und raum, auf mein weg, bis zua endstation

            In gedonkn hobts iah mi niemois valossn, jeda hot an teu von sich in mia hintalegt

            In gedonkn homma uns zusommengschlossn, und hom den tod donn gemeinsom wiedabelebt.

In dem brei volla melancholie und gram, eakenn i donn, wie anzigoatig des lebm is

Des eahliche mitgefühl wiakt wie balsam, heilt die offnen wundn mit an guadn eagebnis

Do beim obschiednehmen wean die augn noss, vazweiflt mutiat si die traua in wut, zoan und hoss

Warum hot di die kronkheit so schnö besiegt, die offne frog kumt mit da ontwoat in an inteanen konflikt.

Kum von diesm rätsl afoch net meah los, net nuas steam onsich sondan du ois mei ahnhea

Bist da letzte in an ewiglongen tross, a kette endend aufm beag beginnend om mea

Steh aufm gipfl und schau in die zukunft, dei hond auf meina schuita zeugt von kroft und vanunft

D‘nägste generation hot si scho eingreiht, schaut gesponnt zum feanen horizont, is scho zum sprung bereit.

Hob in diesn letztn togn so vü üba di meditiat, hob üba deine vün geheimnisvoin rätsl sinniat

Hob die vabindungen zwischn uns bis ins klanste eruiat, hob unsre grundlegenden gemeinsomkeitn genau studiat

Hob donn diese vün rätsl aufs wesentliche minimiat, hob meine lebmsgschicht mit deina vaglichn und konfrontiat

Hob mi zeitlebms füa die vün rätsl imma intressiat, do besondas jetzt hätt i da meine gedonkn offariat.

Nua dei emotion und dei eainnarungswöd, host ma nie so wiaklich grodlinig gsogt

Vielleicht hot si a blockade in den weg gstöt, oda woast afoch nua so vaonlogt

Hätt ma gwünscht, du hättst a poa schritt auf mi zu gmocht, damit i die details bessa eakenn

Hob in den letztn togn vü drüba nochdocht, ois logisch eakläat, woa dei system.

      Sitz scho wieda gonz alla in da nocht, und denk intensiv üba die bishea vastoabenen noch

      Hobt in mia oft des feia nei entfocht, denn jeda wükommensgruss woa a leahreicha almanoch

      Die zeit fliesst afoch ohne an stüstond, hoit gnua eainnarungen, gschichtn, büda fest in da hond

      Brauch kan sinnspruch, ka keazn und ka grob, schliess meine augn, hoit in gedonkn eian wondastob.

            In gedonkn sitz ma olle gmiatlich beinond, jeda eazöht sei gschicht aus seina dimension

            In gedonkn gibt si jeda friedlich die hond, es kumt donn zua weisn und eafoahnen fusion

            In gedonkn schwebt iah imma um mi umhea, jeda hot a stück von sich in mia hintalegt

            In gedonkn büd ma sogoa a büagaweah, und hom den tod donn gemeinsom wiedabelebt.

                  Oba so is des lebm, woa genauso geplant, und nix wiad dron wos ändan, auf diesm treibsand

                  So is nun moi des lebm, gibt die gebuat und den tod, denn des is unsa kreislauf, woatn auf des boot

                  Denn so is unsa lebm, homma wiaklich gnua vastond, woins afoch net woahobm, des ende vom strond

                  In gedonkn vasunkn, schau i weit voa und zurück, denn jeda hintalosst spuan, und des is mei glück.

In diesm brei aus kumma und tiafm schmeaz, eakenn i east, wie uneasetzlich des lebm is

Diesa valust ziagt an wiaklich weit obwäats, vielleicht entdeck i donn des vasunkne atlantis

Do von unsra ähnlichkeit in jungen joahn, hob i east voa kuazem auf an oidn foto eafoahn

Iagendwos woa darauf frappiarend vakeaht, des weisse ti-shöat hot des schwoaze in an kostn eingspeat.

Füa mi hots goa ka altanative gem, du alla host mi auf den pfad da natua gefüaht

Woit imma scho pflonzn und tiare ealem, hobs in den wödan, auf wiesn und beagn berüaht

Lauf stets begeistat duach die biologie, spü olle schachfiguan mit äussasta akribie

Du host ma die vazwicktn züge beibrocht, host in diesa disziplin mei passion, mein eahgeiz entfocht

Kum von diesm rätsl afoch net meah los, net nuas lebm onsich sondan du ois ötra hea

Sitz oft stundnlong voam brett gonz woatlos, do jetzt schweigst füa imma, es gibt doat kan funkvakeah

Hunde und motoaräda san uns suspekt, beim dunklgrau quoimenden diesl hots uns scho gregt

Host di in meim eignen lebm manifestiat, in so vün details host di in mia charaktarisiat.

Hob in diesn letztn togn so vü üba di meditiat, hob üba deine vün geheimnisvoin rätsl sinniat

Hob die vabindungen zwischn uns bis ins klanste eruiat, hob unsre grundlegenden gemeinsomkeitn genau studiat

Hob donn diese vün rätsl aufs wesentliche minimiat, hob meine lebmsgschicht mit deina vaglichn und konfrontiat

Hob mi zeitlebms füa die vün rätsl imma intressiat, do besondas jetzt hätt i da meine gedonkn offariat.

Nua dei innaste und tiafste sönlondschoft, host ma nie wiaklich bis ins klanste zeigt

Vielleicht hot a barriean aus dia gsaugt dei kroft, oda is dei stüs wossa weitvazweigt

Hätt ma gwünscht, du hättst no moi dein voahong aufgmocht, damit des licht dein dunklen raum eahellt

Hob in den letztn togn vü üba di nochdocht, mei traurigs heaz is jetzt von stoiz geschwellt.

      Sitz freiwillig gonz alla in da nocht, und denk intensiv üba die bishea vastoabnen noch

      Hobts oft an mei klane gschlossne tüa pocht, denn jeda wükommensgruss woa in eura uaeignen sproch

      Die zeit übasteigt scho mein horizont, betrocht gnua eainnarungen, gschichtn, büda on da wond

      Brauch ka amen, ka keazn, und ka kreiz, schliess die augn, in gedonkn bin i bei eich im jenseits.

            In gedonkn hob i eich olle gean umoamt, eazöhts den neiestn tratsch aus da dimension

            In gedonkn hob i eich olle stets enttoant, bei eira humoavoin heitren konveasation

            In gedonkn hobts iah in mia an onka gsetzt, denn jeda hot a fragment in mia hintalegt

            In gedonkn samma olle mitanond vanetzt, und hom den tod donn gemeinsom wiedabelebt.

                  Oba so is des lebm, woa genauso geplant, und nix wiad dron wos ändan, auf diesm treibsand

                  So is nun moi des lebm, gibt die gebuat und den tod, denn des is unsa kreislauf, woatn auf des boot

                  Denn so is unsa lebm, homma wiaklich gnua vastond, woins afoch net woahobm, des ende vom strond

                  In gedonkn vasunkn, schau i weit voa und zurück, denn jeda hintalosst spuan, und des is mei glück.

                        I donk eich oin füa eire liebe und wäame, die uns von klan bis gross umgebm hot

                        Siag eich jetzt obm bei sonne, mond und steane, eia licht übastroiht sogoa den tod

                        I donk eich oin füa eia wissn und weisheit, die uns auf unsam weg begleitet hom

                        Setz donn eian weg foat bis in die ewigkeit, sprich in gedonkn mit eich im flüstaton.

In diesm brei aus schweamut und vün quoin, eakenn i east wie unbezoihboa des lebm is

Siagt wie die buntn blätta zu bodn foin, da dünne lebmsfodn hot scho an feinen riss

Stuaheit is a negative eignschoft, wiegt si do mit da zuvalässigkeit wieda auf

A gwisse ungeduid hot uns scho bestroft, dafüa steht wiedarum die pünktlichkeit in unsam lebmslauf.

Da atheismus is unsre religion, lebm in friedlicha obsicht mit diesa natua

A klana streit eanäaht die motivation, do die peasönlichn probleme bleim in da eignen spua

A dei longa weg woa voagem bis zum schluss, von deina gebuat bis hin zum letztn obschiedskuss

Host die liebe deines lebms kennagleant, host sie donn heimgefüaht und mit oi deina liebe umschwäamt.

Hob mit mia seah long gerungen und gekämpft, ois du uns damois fost üba nocht valossen host

Dei schlechts gwissn hot di traktiat und gedämpft, auf deinen schuitan trogst bestimmt auch a schweare lost

Du woast afoch imma füa uns olle do, no heit spia i deine umoamung ois echo

Weaf da nix voa, im gegnteu hot mi gfreut, host aus deim lem die scheenen wichtign dinge hearausghoit.

Kum von diesm rätsl afoch net meah los, net nuas steabm on sich sondan du ois junga bua

Da kriag woa füa di real und ka mythos, host eam mitealebt, net nua in da literatua

Dei lebm geprägt von liebe und vatraun, host dei familie beschützt, earichtest an zaun

So vü kinda, enkal host um di gescharrt, host sie mit liebe übaschüttet, woast in olle vanarrt.

Hob in diesn letztn togn so vü üba di meditiat, hob üba deine vün geheimnisvoin rätsl sinniat

Hob die vabindungen zwischn uns bis ins klanste eruiat, hob unsre grundlegenden gemeinsomkeitn genau studiat

Hob donn diese vün rätsl aufs wesentliche minimiat, hob meine lebmsgschicht mit deina vaglichn und konfrontiat

Hob mi zeitlebms füa die vün rätsl imma intressiat, do besondas jetzt hätt i da meine gedonkn offariat.

Nua dei kompliziates sölisches labyrinth, host ma nie so wiaklich exakt eakläat

Vielleicht woa i afoch völlig taub, stumm und blind, oda hot si kana drüba beschweat

Hätt ma gwünscht, du hättst des fensta gonz weit aufgmocht, damit jeda dein lautn heazschlog heat

Hob in den letztn togn vü üba di nochdocht, host wiaklich dei liebe füa uns aufgspeat.

      Sitz voi gmiatlich gonz alla in da nocht, und denk intensiv üba die bishea vastoabenen noch

      Hobts in mia die ideen vavüfocht, jeda wükommensgruss woa aus edlem friedliebendem stoff

      Die zeit is afoch wie a wossafoi, gnua eainnarungen, gschichtn, büda san eahlich und treu

      Brauch ka schleifn, ka keazn und ka grab, schiess nua meine augn, in gedonkn foigts iah meinem pfad.

            In gedonkn fliag ma olle duach zeit und raum, eazöhts anekdoten aus eira dimension

            In gedonkn konn i a brückn zu eich baun, füa mi iss gonz real und ka animation

            In gedonkn büdet iah um mei ich an kreis, denn jeda hot an obschnitt in mia hintalegt

            In gedonkn stehn ma olle aufm söbm gleis, und hom den tod donn gemeinsom wiedabelebt.

                  Oba so is des lebm, woa genauso geplant, und nix wiad dron wos ändan, auf diesm treibsand

                  So is nun moi des lebm, gibt die gebuat und den tod, denn des is unsa kreislauf, woatn auf des boot

                  Denn so is unsa lebm, homma wiaklich gnua vastond, woins afoch net woahobm, des ende vom strond

                  In gedonkn vasunkn, schau i weit voa und zurück, denn jeda hintalosst spuan, und des is mei glück.

                        I donk eich oin füa eire güte und gnade, die uns von klan bis gross umgebm hot

                        Besing eich donn olle in ana ballade, eire musik übatönt sogoa den tod

                        I donk eich oin füa eiren friedn und freiheit, die uns auf unsam weg begleitet hom

                        Setz donn eian weg foat bis in die ewigkeit, sprich in gedonkn mit eich im flüstaton.

                              Mecht eich no so vü sogn, do nua in gedonkn konn i mit eich kommunizian

                              Mecht eich no so vü frogn, denn nua in gedonkn konn i mit eich donn diskutian

                              Vamiss eich scho tog aus tog ein, do nua in gedonkn tauch i duach eire dimension

                              Vamiss eia lebm und sein, denn nua in gedonkn bekomm i a reaktion.

In diesm brei aus trübsinn und düstakeit, eakenn i east wie unentbeahlich des lebm is

Wean vüz spät in des geheimnis eingeweiht, vielleicht gibts jo danoch an oat namens paradies

Vü zu spät homma uns donn endlich vasöhnt, host oi dei liebe in voim umfong auf mi gleat

Host uns oin mit deina füasoage vawöhnt, host di noch da nägstn generation voa sehnsucht vazeaht.

Host dei lem on da liebe orientiat, so intensiv und rein, hot mei voastellungskroft gsprengt

Hob da volla stoiz deine enkal präsentiat, samma wiaklich guad gelungen, hob mi a ongstrengt

Dei heaz hot uns scho mit liebe übaschwemmt, die zeiga da uah woan schnölla ois du auf deim weg

Dei gsundheit woa leida scho stoak eingeklemmt, so vü zuneigung, hingabe und gefühl in deim gepäck.

Du host ma so vü liebe entgegnbrocht, und auch füa oi des gute gebüaht dia grossa donk

Unsre diffarenzn homma gar gekocht, oba auch die schwierigkeitn passn in an schronk

Unsre situation woa net imma leicht, do bei diesa gelegnheit bin i donn gereift

In diesa beziehung bist du mei voabüd, füa die zukunft hob i mi bewusst mit liebe übafüt.

Kum von diesm rätsl afoch net meah los, net nuas lebm onsich sondan du ois junga monn

Deine ötan grüsstn vüz fruah den kosmos, du gonz allan host as donn gfundn, dei glückshoamon

Dei friedliche liebe hot uns aufd wöd brocht, so a neigeboanes lebn is die kostboaste frocht

Host unsan weadegong genaustens vafoigt, host di voa dem wunda des lebms wiaklich seah tiaf vabeugt.

Hob in diesn letztn togn so vü üba di meditiat, hob üba deine vün geheimnisvoin rätsl sinniat

Hob die vabindungen zwischn uns bis ins klanste eruiat, hob unsre grundlegenden gemeinsomkeitn genau studiat

Hob donn diese vün rätsl aufs wesentliche minimiat, hob meine lebmsgschicht mit deina vaglichn und konfrontiat

Hob mi zeitlebms füa die vün rätsl imma intressiat, do besondas jetzt hätt i da meine gedonkn offariat.

Nua dein weichn flüssign unsteablichn kean, host ma no nie gonz peasönlich voagstöt

Vielleicht woa grod zu dem zeitpunkt afoch zvü läam, oda i hob scho längst zu ende zöht

Hätt ma gwünscht, du hättst deine tüan gonz weit aufgmocht, damit die liebe auch den ausgong findt

Hob in den letztn togn vü üba di nochdocht, on diesm end wieda da onfong beginnt.

      Sitz mit an lächln alla in da nocht, und denk intensiv üba die bishea vastoabenen noch

      Hobts mi imma ois gleichweatig betrocht, denn jeda wükommensgruss woa a ongenehm sonfta kroch

      Die zeit tropft stetig auf an hoatn stein, damit eainnarungen, gschichtn, büda eahoitn bleim

      Brauch ka gebet, ka keazn und ka gruft, schliess die augn, in gedonkn fliag ma gemeinsom duachd luft.

            In gedonkn samma olle wieda vaeint, eazöhts episodn aus eira dimension

            Do auch in gedonkn hob i um eich geweint, moi eich olle ois leicht vaschwommne impression

            In gedonkn spün ma donn des spü vom lebm, jeda hot an bereich in mia füa si festglegt

            In gedonkn mecht i mi mit eich eahebm, und hom donn dem tod gemeinsom wiedabelebt.

                  Oba so is des lebm, woa genauso geplant, und nix wiad dron wos ändan, auf diesm treibsand

                  So is nun moi des lebm, gibt die gebuat und den tod, denn des is unsa kreislauf, woatn auf des boot

                  Denn so is unsa lebm, homma wiaklich gnua vastond, woins afoch net woahobm, des ende vom strond

                  In gedonkn vasunkn, schau i weit voa und zurück, denn jeda hintalosst spuan, und des is mei glück.

                        I donk eich oin füa eire liebe und milde, die uns von klan bis gross umgebm hot

                        Duachwonda mit eich wieda diese gefilde, unsre eile übahoit sogoa den tod

                        I donk eich oin füa eian woihklong und gleichheit, die uns auf unsam weg begleitet hom

                        Setz donn eian weg foat bis in die ewigkeit, sprich in gedonkn mit eich im flüstaton.

                              Mecht eich no so vü sogn, do nua in gedonkn konn i mit eich kommunizian

                              Mecht eich no so vü frogn, denn nua in gedonkn konn i mit eich donn diskutian

                              Vamiss eich scho tog aus tog ein, do nua in gedonkn tauch i duach eire dimension

                              Vamiss eia lebm und sein, denn nua in gedonkn bekomm i a reaktion.

                                   Und east wonn die glockn aufgheat hot zu schlogn, begreift ma den tiafn valust

                                   Wonn die sunn vasinkt, vaschwindt da regnbogn, in gedonkn gonz unbewusst

                                   East wonn die letzte träne aufgheat hot zu foin, leant man sinn des lebms vastehn

                                   Wonn des grob si schliesst, mecht mas ins lebm zruckhoin, in gedonkn losst mas donn gehn.

Aus „liebster papa“ – copyright by alexander kirschner.ak

Gewidmet für unseren vater und füa alle bisher und kommenden verstorbenen.

Geschrieben am 28./29./30. November // 01. Dezember 2016 – Copyright by philipp kirschner.pk

**********************************************************************************

ich bedanke mich für euer interesse und für euren besuch.

seid umarmt und gedrückt.

www.facebook.com/philjazz

twitter.com/philjazmetlyric

https://plus.google.com/u/0/104160599138757338426

euer phil