mundartige texte - philipp kirschner: 334.

meine liebe mundartgemeinde. vielen herzlichen dank für eure zahlreichen besuche auf meinem blog. ich kann es nicht oft genug schreiben: DANKE, DANKE, DANKE. um euch die langeweile zu verkürzen, darf ich euch sogleich den nächsten text aus der sammlung nebelberggräber präsentieren: 334. | ois vastehn.
hierbei geht es um das leben ansich. die chance so vieles zu erleben und selbst zu gestalten. es ist eine hymne auf das leben; da ja ich bereits in der zweiten hälfte meines lebens bin. eventuell midlifecrisis. :D

>>>>>>>>>>>>>>>>>>>>>>>><<<<<<<<<<<<<<<<<<<<<<<<

334. | ois vastehn.

Denn des is mei lem, bis hiahea hob is scho gschofft, wü no so vü gem, momentan hob i no eneagie und kroft

Wonn i donn zruckblick, woa mei weg a labyrinth, hinduach mit vü glick, jedn schritt guad duachdocht, hob i söbst bestimmt

Denn des is mei lem, woa onstrengend und earegt, von fad bis extrem, hot diesa stuam die wön auf mi zuabewegt

Und i woa stondhoft, geschmeidig duach jede foin, hob gnua lebmssoft, denn meine noabm zeugn von schoafn kroin.

Denn des is mei lem, auf meim rückn so vü joah, konn nix meah aufhem, geh volla stoiz mit meim buach duach jedes toa

Wonn i so zruckschau, siag i auch a neblwond, vüz oft gwoat im stau, diese valoane zeit druckt mi on den rond

Denn des is mei lem, hoch und tiaf wexlt si ob, woit nie davonschwem, vawend des feanroah und a des mikroskop

Die innre unruh, treibt mi afoch stets voaron, und diesa hemmschuh, hot si hamlich getarnt ois chamäleon.

Bin mit mia im reinen, bin donkboa füa mei lem, kennt voa freude weinen, bis jetzt woas ongenehm

Spia in mia nua friedn, bin eins mit meina wöd, mecht ma nix vabietn, hob scho so vü eazöht

Fühl in mia die freiheit, bin gsund und a woihauf, voa mia die ewigkeit, rotiat in an kreislauf

Hob scho so vü eareicht, die eainnarung bleibt, mei liebe is gereift, hob scho so vü heazeigt

Mecht eich jetzt umoamen, und olle wiedasehn, mecht no so vü foamen, mecht endlich ois vastehn.

Denn des is mei lem, denk jetzt nua no positiv, und die tog vagehn, afoch vüz schnö wie im flug gonz primitiv

Wonn i donn zruckdenk, woas a wiaklich scheene zeit, woa wie a geschenk, üba umweg fügt si jede anzlheit

Denn des is mei lem, die höfte is scho voabei, i bleib aufrecht stehn, meine interessen san ka einheitsbrei

Foah in die natua, diese wüdnis is mei freund, doat hob i mei ruah, fühl mi net eingeengt, iagendwie einzäunt.

Denn des is mei lem, scho so vü texte vafosst, des rad muss si drehn, jede situation wiad genau ongeposst

Wonn i übaleg, on den buchstobmsalot, gwoxn in an beet, jede seitn voigschriebm ohne vabot

Denn des is mei lem, gib jedm an tiafan sinn, is a unbequem, wonn die woahheitn schwoaz auf weiss voabeiziehn

Die themen endlos, vapocks in a wüde gschicht, und da denkonstoss, vauasocht a magnetföd zum gleichgewicht.

Denn des is mei lem, integria a die musik, konn net widastehn, denn jeds instrument is a notnfabrik

Wonn i so zuahea, ois hintagrund oda laut, des metoi so schwea, duach mei bossgita vibriat sogoa da staub

Denn des is mei lem, auch amoi ohne gesong, is a guads system, kreia daduach texte zwischn stuam und drong

Spü jetzt jedn tog, da rhythmus geht scho ins bluad, i leist mein beitrog, moi ma söbst büda aus musik mit vü gluad.

Bin mit mia jetzt im kloan, bin donkboa füa mei lem, mecht eich goa nix easpoan, es woa wiaklich wundascheen

Öffne jedem mei hond, in friedlicha obsicht, bin mit mia im einklong, hob in mia so vü licht

Fühl ois von nah und fean, schlof a guad, fest und tief, wü eich mei heaz auslean, schreib eich an liebesbrief

Hob scho vü voibrocht, die zukunft a mosaik, des feia is entfocht, jeda sta mit logik

Mecht eich jetzt umoamen, und olle wiedasehn, mecht no so vü foamen, mecht endlich ois vastehn.

Hob scho wieda a hoibs lebm heagschenkt und vakauft, a hoibs lebm is scho gschmoizn und varaucht

A hoibs lebm long rinnt des wossa scho richtung mea, in diesm hoibm lebm woas leicht und schwea

Do i geh mit guadm beispü voaron, die innre einstöllung bringt den woahn lohn

A klans lächln umspüt bereits mein mund, bin freindlich und nett afoch zu jeda stund

Bin in ka krisn oder tiafpunkt gfoin, wü vom gelebtn hintahea nix bereun

Wü afoch mein weg imma weidagehn, wü so gean om end von meim lem ois vastehn.

Denn des is mei lem, dieses suachn findt sei end, endlich hob is gsehn, mei zukünftige frau im aprilfragment

Wonn i donn zruckschau, hom si die umweg auszoiht, liebe löscht des grau, iah aura hot funkn gsprüht, und lieblich gstroiht

Denn des is mei lem, jede meinung hot a recht, hobs lieba bequem, ka sinnlose streitarei und ka gefecht

Hob den ausgleich gschofft, geöffnet san so vü tüan, jeda hot die mocht, si sei eignes geschenkpackal aufzuschnüan.

Denn des is mei lem, meine kinda san mei schotz, muass eana beistehn, seit da gebuat is des zhaus da onkaplotz

Wonn i jetzt zruckblick, und hea donn den eastn schrei, hob wiaklich vü glick, do kana von uns is wiaklich föhlafrei

Denn des is mei lem, sie woxn afoch vüz schnö, boid woins von hia gehn, woin die wöd entdeckn on da ondan stö

I hobs untastützt, bei jeda gelegnheit, hobs a guad beschützt, gib eana guade rotschläg und mei weisheit.

Denn des is mei lem, gibs bestimmt net wieda hea, bin stoiz auf mei weak, woa goa net so leicht oba a net so schwea

Wonn i donn zruckdenk, wäa nua a schritt ondas gsetzt, stünd i auf an beag, vielleicht wäa i gonz alla und schwa valetzt

Denn des is mei lem, kana konn ma no wos stöhn, wea boid ois vastehn, wü jedn anzelnen tog von neim wöhn

Wonn die sunn vasinkt, mond, stean stehn om fiamament, eawocht mei instinkt, wiad mei kreativität zum element.

Denn des is mei lem, nua die zukunft ungewiss, a ongst bleibt bestehn, hoffentlich gibts kan fodn- und fümriss

Wonn i übaleg, is des bese scho eawocht, gähnt sein schlof scho weg, iagendwonn amoi kumts vielleicht on die mocht

Denn des is mei lem, kana deaf mas zfruah zastean, wü no ois vastehn, mecht zua zweitn höftn no friedlich hamkeahn

Und des togebuch, bleibt füa ewig guad vasteckt, foigt nua dem lockruf, wiad von ondren generationen entdeckt.

Hob mi mit mia vasöhnt, bin donkboa füa mei lem, hob mi a söbst vawöhnt, wea imma weida gehn

Schütt mei heaz voa eich aus, und mei sö singt dazua, brauch goa ka schnecknhaus, leist eich an liebesschwua

Fühl no gnua eneagie, sink in meditation, bei mia stimmt die chemie, hot mit physik a fusion

Hob scho so vü umgsetzt, bin auf moagn scho gsponnt, leb im hia und im jetzt, bin scho wieda entbronnt

Mecht eich jetzt umoamen, und olle wiedasehn, mecht no so vü foamen, mecht endlich ois vastehn.

Hob scho wieda a hoibs lebm vakauft und heagschenkt, a hoibs lebm long hob i mi söbst gelenkt

A hoibs lebm long füaht da boch sond und stein ins mea, in diesem hoibm lebm woas voi und lea

Drum moch i jetzt imma gressare schritt, mei söbstvatraun vasetzt meim unmut an tritt

Meine augn hom lochfoitn im gsicht, hob mei liebe zu eich wieda moi vatieft

Foi in ka depression, in ka jammatal, des gelebte hot gnua material

Wü afoch mein weg imma weidagehn, wü so gean om end von meim lem ois vastehn.

Auf mi woatet no a obmteialiche zeit, bin füa die zweite höftn bereit

Voa mia is da weg wieda in dichtn nebl taucht, die zweite höftn no long net vabraucht

Wonns donn so weit is, wea i hoffentlich ois vastehn, diese zweite höftn von meim lem

Sie hot scho begonnen, die uah tickt deutlich und laut, die zweite höftn is mei zweite haut.

Denn des is mei lem, bis hiahea hob is scho gschofft, wü no so vü gem, momentan hob i no eneagie und kroft

Wonn i donn zruckblick, woa mei weg a labyrinth, hinduach mit vü glick, jedn schritt woih duachdocht, hob i söbst bestimmt