339. | auf diesm gleis.

meine liebe brave treue mundartige leserinnen- und lesergemeinde. vielen dank für eure zahlreichen besuche meines blogs. es ist eine riesengrosse freude zu sehen wie die klicks der einzelnen texte über die zweihundert, dreihundert, vierhundert und sogar über die fünfhundert gehen. vielen dank dafür.

um euch die wartezeit auf das neue jahr zu verkürzen, darf euch nun den nächsten text präsentieren. er lautet: 339. | auf diesm gleis. hierbei geht es um die welt zwischen leben und tod - die welt im schatten, zwischen schwarz und weiss. der weg zum licht führt auf diesm gleis.

wünsch euch eine spannende abenteuerliche lesestunde.

>>>>>>>>>>>>>>>>>>>>>>>><<<<<<<<<<<<<<<<<<<<<<<<

339. | auf diesm gleis.

Dieses licht is ma scho vüz hell, sei wäame vastroiht geboagnheit und sichat die lebmsquell

Nua im schottn fühl i mi woih, doat bin i getoant und unsichtboa, is mei eigna ruhepoi

Dieses licht is ma scho vüz grell, die weissn stroihn blendn mi und mochn mi blind gonz offiziell

Nua da schottn is jetzt mei reich, seine schwoaz-weissn foabm dämpfn die weite sicht ois ausgleich.

Dieses licht vauasocht vü quoin, mei blosse haut is seah empfindlich, mecht si ständig rot bemoin

Nua im schottn is friedlich stü, meditia in diesa zwischnwöd, setz figuan auf des schochspü

Dieses licht zakrotzt jedes aug, blute aus meim sehoagan, meine tränen san rot wie heabstlaub

Nua im schottn bin i gonz gsund, seine schwoaz-weissn foabm beruhign mein sölischn obgrund.

      Denn i leb in da düstanis, in diesa graun grenzzone zwischn schwoaz und weiss

      Fiacht mi do voa da finstanis, doat is lebm kontuanlos, foit ausm schutzkreis

      Denn die dämmarung is mei lem, in diesm graun grenzbereich zwischn schwoaz und weiss

      Hob panische ongst im lichtsystem, doat is steabm a sakrileg wie auf diesm gleis.

Dieses licht peinigt mein vastond, die unsichtboan stroihn zastean meine synapsn bis zum rond

Nua im schottn wead i beschützt, dieses schummrige zwielicht hot mein kronkn keapa untastützt

Dieses licht zreisst die innarein, da heilprozess ziagt si in d‘läng, die schmeazn lossn mi aufschrein

Nua im schottn bin i donn fit, seine schwoaz-weissn foabm behoitn mein heazschlog im gleichschritt.

Des licht frisst mi lebendig auf, mei zoate haut schöt si ob und vabrennt im weitaren valauf

Nua im schottn is ois peafekt, a kühla wind streichlt mi weich, die temperatuan san korrekt

Des licht zasetzt mein lebmsstoff, iah foabmspektrum zateilt meine zön und schickt mi in den schlof

Nua da schottn konn mi befrein, denn seine schwoaz-weissn foabm umhülln mi in an graun schein.

Denn in diesm graun zwielicht hob i die wöd eablickt, denn bei meina gebuat hot mi nua da schottn greinigt

Denn in diesm graun hoibdunkl woa i scho vaeint, bei meina gebuat hot nua da schottn voa freude gweint

Denn in diesm graun dämmalicht is es donn passiat, bei meina gebuat hot si da schottn in mia foamiat

Denn in diesa graun dunklheit leb i scho so long, bei meina gebuat woa sei ende mei neia onfong.

      Atme frei in da düstanis, in diesm graun grenzrevia zwischn schwoaz und weiss

      Easchreck mi voa da finstanis, doat is gähnende leare, ka schottn steht im kreis

      Denn die dämmarung is mei wöd, in dem graun territorium zwischn schwoaz und weiss

      Mei phobie hot si in den weg gstöt, doat is steabm net ealaubt, a net auf diesm gleis.

            Denn auf diesm gleis steht scho seit joahn a ausrangiata varosteta waggon

            Und des gleis füaht in die nocht hinein, direkt in die mittn vom armageddon

            Denn auf diesm gleis wuade des bese heimlich geboan und lauat in da nocht

            Und auf da ondan seitn woatet des licht und hot scheinheilig freindlich liab glocht.

Dieses licht beraubt mei sehkroft, a klane gluad hot mit seina feiasbrunst seine feind bestroft

Nua im schottn nimm i a bod, tauch tiaf duach diesn schemenhoftn nebl und foig diesm pfod

Dieses licht in mia explodiat, winzig klane feine schoafe scheabm hom mi mit bluad vaschmiat

Nua im schottn wead i geheilt, die wundn wean zu noabm, hom donn diesn prozess vauateilt.

Dieses licht beeinflusst mei gfüh, jongliat mit meine gedonkn, mit meine fünf sinn mochts a spü

Nua im schottn hob i mei ruah, find wieda mei innre harmonie, entsponn mei muskulatua

Dieses licht foitat mei geduld, mei ausgwognes gleichgwicht befindet si in an wüdn tumult

Nua im schottn bin i gonz frei, schweb schwearelos duach raum und zeit in diese graue molarei.

Denn in dem graun zwielicht hob i mein eastn schrei gmocht, bei meina gebuat hot nua da schottn voa liebe glocht

Denn in diesm graun hoibdunkl hob i so vü gleant, bei meina gebuat hot da schottn glei des licht entfeant

Denn in diesm graun dämmalicht hob i ois studiat, bei meina gebuat hot si da schottn manifestiat

Denn in diesa graun dunklheit hob i übalebt, denn bei meina gebuat hot da schottn in mia gebebt.

      Find mei sein in da düstanis, in diesm graun grenzgebiet zwischn schwoaz und weiss

      Easchauda in da finstanis, doat is geheimnisvoi in dem unhamlichn kreis

      Denn die dämmarung is mei reich, in diesa graun grenzregion zwischn schwoaz und weiss

      Des licht zwingt mi donn zu an ausgleich, des steam is ungerecht wies lebm auf diesm gleis.

            Denn auf diesm gleis foaht scho seit ewigkeitn goa ka zug meah noch niagendwo

            Und des gleis füaht in die nocht hinaus, direkt mittn ins feindliche inferno

            Denn auf diesm gleis wuade des bese auf die wöd brocht und is peafekt getoant

            Und auf da ondan seitn hoit des licht woche und hot mein schottn liab umgoant.

                  Mei schottn heat a fieses echo aus diesa vahosstn schwoazn front

                  Mei schottn hoacht auf diesm gleis noch stimmen und belauscht den monn im mond

                  Mei schottn schleicht duach dichtn nebl ins labyrinth ohne an ausgong

                  Mei schottn foigt auf diesm gleis den stimmen zu an offnen neionfong.

Dieses licht löscht mei gedächtnis, meine eainnarungen hom scho vü tiafe sprünge und riss

Nua da schottn hots donn zuagnäht, so hob i meine eignen büda wieda innalich gedreht

Dieses licht vagiftet mei bluad, die stroihn vanichtn die obweahkräft, mein letztn sichaheitsguat

Nua im schottn lächlt mei lem, do konn i mein siebtn sinn ausdehnen und eich so vü zruckgem.

Dieses licht is die reinste gwoit, des lüftal mutiat donn zum oakan und ändat ständig sei gstoit

Nua im schottn fühl i mi leicht, mit seim sichaheitsradius hob i jedes zü no eareicht

Des licht is wie donna und blitz, nimmt von diesm peaveasn gemetzl übahaupt ka notiz

Nua da schottn is mei daham, hoit sei stoake hond üba mi, is gleichzeitig weich wie balsam.

Denn in diesm graun zwielicht bin i zum monn gereift, bei meina entwicklung is da schottn nie obgeschweift

Denn in diesm graun hoibdunkl hob i vü ealebt, bei meina entwicklung hot da schottn zittat und bebt

Denn in dem graun dämmalicht hob i mi transfoamiat, bei da entwicklung hot is da schottn in mia platziat

Denn in diesa graun dunklheit spü i wieda gott, bei meina entwicklung eateilt da schottn a vabot.

      Easchoff mi in da düstanis, in diesa graun grenzlondschoft zwischen schwoaz und weiss

      Mia graut so voa da finstanis, doat beheascht des blanke chaos den sinnlosn kreis

      Denn die dämmarung is mei lem, in diesm graun grenzterrain zwischn schwoaz und weiss

      Mei schottn liebt jetzt jedes extrem, des steam woa so leicht wies ballancian auf diesm gleis.

            Denn auf diesm gleis hot die vagesslichkeit iah gschicht eingraviat

            Und des gleis füaht ins schwoaze loch, direkt in die nocht, wo da tod eiskoid regiat

            Denn auf diesm gleis hot des bese die wöd eablickt und schreit voa hoss die woahheit

            Und auf da ondan seitn wetzt des licht die stroihn und hot mein schottn liab befreit.

                  Mei schottn heat a fieses echo aus diesa vahosstn schwoazn front

                  Mei schottn hoacht auf diesm gleis noch stimmen und belauscht den monn im mond

                  Mei schottn schleicht duach dichtn nebl ins labyrinth ohne an ausgong

                  Mei schottn foigt auf diesm gleis den stimmen zu an offnen neionfong.

                        Do auf diesm gleis gibts ka end, ka zü, ka endstation, net amoi a wond

                        Denn nua auf diesm gleis foit ma in die unendlichkeit, sogoa üban rond

                        Denn auf diesm gleis gibts ka bremsn, kan hoit, kan rammbock, net amoi an stein

                        Denn auf diesm gleis foit ma in die tiafe ewigkeit, in den sonnenschein.

Dieses licht is ma scho vüz hell, sei wäame vastroiht geboagnheit und sichat die lebmsquell

Nua im schottn fühl i mi woih, do bin i getoant und unsichtboa, is mei eigna ruhepoi

Dieses licht is ma scho vüz grell, die weissn stroihn blendn mi und mochn mi blind gonz offiziell

Nua da schottn is jetzt mei reich, seine schwoaz-weissn foabm dämpfn die weite sicht ois ausgleich.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 23./24./25./26. november 2015.pk,

Überarbeitet am 31. jänner 2017.pk. – copyright by philipp kirschner.pk.

******************************************************

danke für euer interesse, eure treue, euren besuch und für eure zeit.
hier wieder die üblichen links:

übersicht band 2
übersicht band 4 und band 3
facebook
twitter
google+
literatpro - meine gedichte

danke für alles
bleibt mir weiterhin gewogen
euer philjazzmetal, der mundartige.