337. | philosophiat.

seid mir alle hier auf diesem blog aufs herzlichste gegrüsst.
wieder ein riesengrosses dankeschön euch allen. ihr seid die besten.

hier die klickliste der woche:
335. | wiedakeah mit 550 klicks
333. | schicksoi mit 462 klicks
336. | gspoitne schizophrenie mit 337 klicks
334. | ois vastehn mit 275 klicks
332. | ozean mit 256 klicks
410. | bezoiht mit 217 klicks
408. | vagabund mit 216 klicks
331. | mut mit 208 klicks.

ich bin wirklich sprachlos. danke nochmals.

um euch die lange wartezeit zu verkürzen, darf ich euch nun den nächsten text vorstellen: er lautet: 337. | philosophiat. hierbei geht es um die lebensreise.

>>>>>>>>>>>>>>>>>>>>>>>><<<<<<<<<<<<<<<<<<<<<<<<

337. | philosophiat.

Wü jetzt unbedingt von hia foat, zu an friedlichn und liebendn oat, ohne streit, hoss und gwoit

Hob jetzt scho meine sochn pockt, und hob zu wiaklich jedn lebwoih gsogt, hob donn die tüa zuaknoit

Schliess mit da vagongenheit ob, wonns sein muass suach i ma mei eignes grob, do es bleibt unentdeckt

Da easte schritt is nun getan, hob kane ideen füa mein zukunftsplan, hob mi a net vasteckt.

Moch mi jetzt endlich auf mein weg, hob mi donn niemois wieda umgedreht, die freie sicht is zü

Frohn mutes foig i da spua, unsichtboa duach stodt, lond, woid und natua, diese flucht is ka spü

Mecht afoch kan menschn meah sehn, muass jednfois mei eigne richtung gehn, find donn mei endstation

So vü schuach hob i scho zasteat, die sunn und die stean hom mi donn beleaht, kenn jede position.

      Des wondan liegt ma im bluat, die frische luft tuat ma so guat, geniess diese unhamliche stün

      Die aussicht is legendäa, die zeit is füa mi sekundäa, in mia soin gedonkn funkn sprühn

      So vü wissn is vaeint, hob die valoanen sön beweint, so vü gschriebm und philosophiat

      Do wia hom nix dazuagleant, hom uns imma weida entfeant, hoffentlich gibts kan drittn wödkriag.

Mecht jetzt unbedingt von hia foat, von diesm vahosst kriegarischn oat, ohne friedn und gfüh

Auf mein ruckn is mei besitz, des übalebm im frein is ka witz, vaschlossn mei ventü

Eainnarungen heb i auf, vagebm träume bei mein lebmslauf, hobs in mia tiaf vagrom

Da zweite schritt is nun voibrocht, hob in mia söba des feia entfocht, hob des gleichgwicht vaschom.

Moch mi jetzt endlich auf mein weg, die zruckbliebnen gedonkn san vaweht, schau afoch net zrück

Sonne und mond gebm ma licht, hob wieda a breites lächln im gsicht, hob endlich wieda glück

Hob die einsomkeit söbst eawöht, hob mein kuas aufm lond no nie vaföht, hoit meine pausn ein

Die soihn hom lecha, san obgwetzt, meine fiass san von blosn wund valetzt, muass diesn schmeaz vatreim.

Loss da wüdnis mein uaschrei hean, ois jäga und sommla muass i oft stean, damit i übaleb

Ka strom hüft bei da odyssee, meine instinkte hom nua no feanweh, ziagt on wie a magnet

Da dichte nebl is vasteck, da regn befreit mi wieda vom dreck, da schnee is weisse tuch

Hob diese stün scho so vamisst, bin a recht positiva realist, i hob nua an vasuch.

      Des wondan hot mi befreit, olle soagn a klanigkeit, inhalia nua reinste eneagie

      Die ondre seitn wiad kloa, ka schäafe meah liegt in da gfoah, vaspüa jetzt übahaupt ka phobie

      So vü wissn gheat bewocht, hob long übas steabm nochdocht, so vü gschriebm und philosophiat

      Do wia hom nix dazuagleant, hom uns imma weida entfeant, hoffentlich gibts kan drittn wödkriag.

            Auf meina reisn beginn i mei studium sogleich noch mein foatgong

            Hob mi mit da uamaterie stoak befosst, bin mit iah im einklong

            Hob mit da natua üba die entstehung da eadn philosophiat

            Sie soi uns vazeihn, hob mi entschuidigt, hoffentlich hots uns jetzt aboliat.

Muass jetzt unbedingt von hia foat, zum vaträumtn paradiesischn oat, ohne neid und konflikt

Trog die gonzn sochn bei mia, die grenznlose weite is mei revia, hob die woahheit eablickt

Die vün joah bis zua gebuat, hob mi endlich glöst vom eisanen guat, san mit da zeit vablosst

Den drittn schritt hob i jetzt gschofft, meine reseavn strotzn no voa kroft, bin no long net eingrost.

Moch mi jetzt endlich auf mein weg, woat geduidig voa da bruckn auf an steg, dieses boot kummt bestimmt

Bin topfa, mutig und fuachtlos, kenn meine grenzn, eazeugn echos, meine sinn san getrimmt

In da einöde leb i auf, die inspirationen kommen in lauf, die seitn san voigschriem

Leda-umwicklt san die fiass, hob ka guads gfüh wegn des elixias, do es is legitim.

Zeig da wüdnis mein lebmskompf, duach müdigkeit bekomm i donn an krompf, do i hobs übabrückt

Leb wieda wie in da steinzeit, goa ka technischa foatschritt weit und breit, nua da vastond genügt

Jeds wetta wiad freindlich begrüsst, jede joahreszeit hot man gaumen vasüsst, da kreislauf beginnt von voan

Fühl die schweigende harmonie, hea diese natüaliche melodie, bin dafüa auseakoan.

      Des wondan heilt an vom stress, is zwoa a longsoma prozess, do danoch schwebt ma duach zeit und raum

      Im wossa mei spieglbüd, mei kreativität eablüht, untascheid no wiaklichkeit vom traum

      So vü wissn offnboat, tiaf ind vagongenheit gstoat, so vü gschriebm und philosophiat

      Do wia hom nix dazuagleant, hom uns imma weida entfeant, hoffentlich gibts kan drittn wödkriag.

            Auf meina expedition zu meim eignen ich, zum eignen bewusstsein

            Hob i donn eakonnt, ois is obgspeichat in da eadn, in jedem stein

            Hob mit da natua üba die entstehung vom wödoi philosophiat

            Sie muass uns vazeihn, hob mi entschuidigt, hoffentlich hot sis jetzt akzeptiat.

                  Streng meine poa gehianzön on, damit i üba probleme meditian konn

                  Wieda intensiv philosophiat, hob jeds detail zalegt und eingehend reflektiat

                  Ziag jede möglichkeit in betrocht, von jeda peaspektive hob i ma gedonkn gmocht

                  Wieda nochhoitig philosophiat, die panisch fanatischn ideen glei liquidiat.

Muass jetzt unbedingt von hia foat, von diesm vafluachtn giftign oat, ohne liebe und heaz

Hob mein gonzn besitz umgschnoit, hob diese entscheidung niemois bereut, denn mit mia gehts aufwäats

Des togebuach hob i vabronnt, da wind trogt den rauch übas gonze lond, flüstat die lebmsgschicht

Da viate schritt is jetzt ausgfüaht, hob ma wieda söba a scheens gschenk gschnüat, do i hob schweigepflicht.

Moch mi jetzt endlich auf mein weg, geniess des sötn grechte privileg, stana zafoin zu staub

Vaschwundn san die stoipafoin, konn mi on diesa peafektion eafreun, hob da natua vatraut

Freiwillige isolation, belebt jede oat von halluzination, und visionäres sein

Die fiass san obghäatet und nockt, den puisschlog da eadn hob i rausglockt, tauch tiaf in träumarein.

Beweis da wüdnis mein entschluss, schick da natua jedn moagn an gruss, heazlich und eahlich gmeint

Bin jetzt scho eins mit da natua, kenn die geheimnisse iahra struktua, mit iah vü glocht und gweint

Katastrophn homma aufzeigt, bin a klans sondkoan, hob mi tiaf vaneigt, ausgeliefat schutzlos

Lausch jedm natüalichn laut, imitia gräusche mit mund, hond und haut, moch kan reglvastoss.

      Des wondan kräftigt mein geist, is mit da natua eng zommgschweisst, auf iahn wiaklichkeitssinn is valoss

      Jede londschoft hot an reiz, inhalia gonz tiaf des diesseits, leb die gonze zeit in muttas schoss

      So vü wissn unbekonnt, so vü rätsl om horizont, so vü gschriebm und philosophiat

      Do wia hom nix dazuagleant, hom uns imma weida entfeant, hoffentlich gibts kan drittn wödkriag.

            Auf meina longen entdeckungswondarung hob i mi mit oim vasöhnt

            Hob den höhln meine molarein vamocht und sie mit foabm vaschönt

            Mit da natua üba die existenz jenseits des wödois philosophiat

            Sie muass uns vazeihn, hob mi entschuidigt, hoffentlich hots uns jetzt repariat.

                  Gib mei bestes mit mein bissl vastond, weaf die vün probleme spielend leicht on die wond

                  Wieda intensiv philosophiat, hob des klanste teilchen vom atomkean präsentiat

                  Und jede eventualität, wiad glei übaprüft und mit ontwoatn übasät

                  Wieda nochhoitig philosophiat, die blindwütig besessnen ideen glei ausradiat.

                        Brauch ka höhares wesn, des mia mein eignen weg stua voaschreibt

                        Bin mit da natua im reinen, mei neugia is seah weit vazweigt

                        Hob wieda eansthoft philosophiat, so vü frogn bleim vaspeat

                        Hob mein vastond gänzlich in reifn sprüchn mit weisheit ausgleat

                        Drum brauch i kan oimächtign gott, hot jo sowieso ka zeit

                        Mei paradies hob i scho längst gfundn in diesa einsomkeit.

Wü jetzt unbedingt von hia foat, zu an friedlichn und liebendn oat, ohne streit, hoss und gwoit

Hob jetzt scho meine sochn pockt, und hob zu wiaklich jedn lebwoih gsogt, hob donn die tüa zuaknoit

Schliess mit da vagongenheit ob, wonns sein muass suach i ma mei eignes grob, do es bleibt unentdeckt

Da letzte schritt is nun getan, hob kane ideen füa mein zukunftsplan, hob mi a net vasteckt.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 14./15./16./17. november 2015.pk.

Überarbeitet am 29. jänner 2017.pk. – copyright by philipp kirschner.pk.

******************************************************

danke für euer interesse, eure treue und für eure zeit.
hier wieder die üblichen links:

übersicht band 2
übersicht band 4 und band 3
facebook
twitter
google+
literatpro - meine gedichte

danke für alles
bleibt mir weiterhin gewogen
euer philjazzmetal, der mundartige.