345. | kuavn.

salvete, ihr lieben braven guten leute. danke, dass ihr den weg auf meinem blog gefunden habt. wahrscheinlich habt ihr einige kurven hinter euch gebracht, um endlich das ziel erreicht zu haben.
das trifft sich gut, denn der nächste text lautet: 345. | kuavn. also ran an die buchstaben.

>>>>>>>>>>>>>>>>>>>>>>><<<<<<<<<<<<<<<<<<<<<

345. | kuavn.

So vü leare tog wieda sinnlos vabrocht, so vü volle nächt wieda schloflos duachgwocht

Afoch ka anzigs zü bis zum horizont, afoch mein kronkn keapa net meah geschont

Die schübe raubm ma meine eneagien, die vian zastean meine sicharungskopien

Mei vastond spüt varuckt und moit ma an kreis, jede anzelne foab gibt ma an hinweis.

So vü leare tog wieda ins wossa gfoin, so vü volle nächt wieda schloflos vahoin

Mei leisa schmeaznsschrei klingt schrill in meim oah, denn da alarm kumt vom defektn sensoa

Innalich koch und brenn i voa hoss und wut, des geschwüa hot si eingnistet wie a brut

Da feind in mia hot jetzt sei heimat entdeckt, fühlt si unhamlich woih, hot wieda bluad gleckt.

      Denn die zügerodn is scho in sicht, noch da letztn kuavn siag i scho des weisse licht

      Und die züflagge wiad scho wüd geschwenkt, hob in da letztn kuavn mein kloan sieg vaschenkt

      Die zülinie leichtet scho bluadigrot, die letzte kuavn endet auf dem moaschn schafott

      Do des zübond wuade scho längst zafetzt, mit da letztn kuavn hob i mi söbst übaschätzt.

So vü leare tog hom si in luft aufglöst, so vü volle nächt hom si schloflos entblösst

Meine gedonkn tänzln von a bis zett, mei stüamisches gfühl fegt donn ois wieda weg

Auf weichn woikn foig i dem koidn wind, flüstat undeutlich, hob d‘woahheit net vadient

Mei phantasie moit ma a vakeahte wöd, jede anzelne foab hot si wieda obgschöt.

So vü leare tog san auf amoi vaschoin, muass füa so vü volle nächt schloflos bezoihn

Kum net zua ruah, ka stüstond in mia vaeint, des positive hob i imma vaneint

Innalich brodlt und kocht mei wut und hoss, die wucharung gibt ma boid den gnodnstoss

Da feind in mia hot jetzt sein hofn eareicht, da ausgwoafne onka hot im sond gelaicht.

Meine letztn tränen san scho längst austrocknet und vasiegt, net amoi des wossa bringt gnua feichtigkeit

Mei vakrompfta keapa hot si mit si söbst bekriegt, net amoi die weisse fahne is bereit

Meine geboitn händ schlogn woihlos auf a wond, net amoi die stana zeign an respekt

Meine fiass trogn mi freiwillig ins niemondslond, net amoi diesa weg is no unbefleckt.

      Die zügerodn hob i im blickföd, wäa fost noch da letztn kuavn on da wond zaschöt

      Und die züflagge winkt ma freindlich zua, in da letztn kuavn kum i auf die foische spua

      Die zülinie hob i boid passiat, die letzte kuavn hot mi mit da biegung vawiat

      Do des zübond wuade scho längst duachtrennt, mit da letztn kuavn hob i mi söbst übadehnt.

            Genau diese letzte kuavn hot mei lebm aus den fugn ghobm und um hundatochzg grad vadreht

            Genau diese letzte kuavn hot mei lebm vüz weit vaschobm und vom realen züoat foatgweht

            Genau diese letzte kuavn hot mei lebm gänzlich duachanond brocht und in an wüdn stuam eintaucht

            Genau diese letzte kuavn hot mei lebm füa die föhla bestroft und mit jeda fasa missbraucht.

So vü leare tog untam teppich gekeaht, so vü volle nächt wieda schloflos enteaht

Des vagongne hot si scho vüz weit entfeant, hot die quintessenz leida scho längst entkeant

Im frein foi berausch i mi von deim büd, die äussaste grenzn vaschwimmt und vaglüht

Mei giarige eifasucht bemoit ma sö, jede anzelne foab blättat ob auf befö.

So vü leare tog hintalossn ka spua, so vü volle nächt schloflos ohne gravua

Die vaheiltn wundn brechn wieda auf, wie a schlummenda vuikan beim eastn hauch

Innalich steigt mei hoss und wut üban rond, des gewächs hot ka anzigs opfa vaschont

Da feind in mia hots logafeia entfocht, die flommen lodan hoch net nua in da nocht.

Meine voaahnungen san scho längst wiaklichkeit woan, a da schmettaling hot sein fliagl valoan

Mei schmeazübafluteta keapa is seah gestresst, sogoa die panik is vom ongstschweiss duachnässt

Meine bluadign händ hom si scho vüz oft beschmutzt, sogoa die weisse taubm hob i zrechtgstutzt

Meine fiass gehn in friedlicha obsicht queafödein, sogoa die wüdnis woaht iahn heilignschein.

      Denn die zügerodn liegt scho voa mia, die letzte kuavn no gschofft mit aggressiva gia

      Und die züflagge schlogt scho wön im wind, in da letztn kuavn woan die augn scho fost blind

      Die zülinie stroiht mit elegonz, die letzte kuavn bittet mi um mein letztn tonz

      Do des zübond wuade scho längst zateilt, mit da letztn kuavn hob i mi söbst übaeilt.

            Genau diese letzte kuavn hot mei lebm grundlegend vaändat und spieglvakeaht ausgespuckt

            Genau diese letzte kuavn hot mei lebm ausgraubt und geplündat und den tod eiskoid bevoazugt

            Genau diese letzte kuavn hot mei lebm duachanondgwiablt und hintarucks beinhoat übafoin

            Genau diese letzte kuavn hot mei lebm füa die föhla bestroft und wiad die aschn weit vastreun.

                  Jede flucht endet imma in da kuavn mit an totalschodn ohne rettungsaktion

                  Jeda ausbruch endet imma in da kuavn, gonz vahearend so ohne konzentration

                  Jeda onfong endet imma in da kuavn, in jeda kompliziatn situation

                  Jeda letzte schritt endet in da kuavn, mit da endgültigkeit auf a exekution.

So vü leare tog ohne gfüh auf da woog, so vü volle nächt schloflos füan sündnbock

Da gegongne weg scho längst in nebl taucht, die bestimmte onzoih on schritt is vabraucht

Es gibt ka zruck und a ka wiedagebuat, die offnen frogn hom ontwoatn onknuat

Mei lebmsweak hot mei eigne vision gmoit, jede anzelne foab reagiat mit gwoit.

So vü leare tog san vaschüttet und vagrom, so vü volle nächt wieda schloflos vaschom

Mei gleichgwicht stüazt in a endlos tiafes loch, mei schützende obweah is scho ziemlich schwoch

Innalich entfocht mei hoss und wut an kriag, diesa klane knotn mutiat zum gebiag

Da feind in mia schlogt die glockn pünklich on, sei echo wechslt ständig sein foischn ton.

Meine schmeazn findn des ideale vasteck, diese sonfte stün beruhigt jedn fleck

Mei geschwächta keapa trogt a vü zu schweare lost, hob mein kreislauf scho vüz oft vawoahlost

Meine dünnen händ zittan und bem die gonze zeit, mei sö is scho füa die reisn bereit

Meine fiass san vom vün maschian scho ausgelaugt, da tumoa hot ma oi mei kroft ausgsaugt.

      Denn die zügerodn is mei endspü, noch da letztn kuavn is endlich ois friedlich stü

      Und die züflagge hot mi wach liebkost, in da letztn kuavn schmeck i scho moda und rost

      Die zülinie hob i übaqueat, die letzte kuavn hot ma meine freiheit eingspeat

      Do des zübond wuade scho längst entzweit, mit da letztn kuavn hob i mi söba befreit.

            Genau diese letzte kuavn hot mei lebm auf an schlog ausradiat und vom bodn hinweggefegt

            Genau diese letzte kuavn hot mei lebm ins jenseits transfoamiat und mia mei endzü aufealegt

            Genau diese letzte kuavn hot meim lebm die woahheit offnboat und mit lügn no übahäuft

            Genau diese letzte kuavn hot mei lebm füa die föhla bestroft und aus dem paradies vascheucht.

                  Jede flucht endet imma in da kuavn mit an totalschodn ohne rettungsaktion

                  Jeda ausbruch endet imma in da kuavn, gonz vahearend so ohne konzentration

                  Jeda onfong endet imma in da kuavn, in jeda kompliziatn situation

                  Jeda letzte schritt endet in da kuavn, mit da endgültigkeit auf a exekution.

                        Die letzte kuavn hot ma iah weisheit auf mei haut tätowiat

                        Die letzte kuavn hot ma meine eainnarungen souffliat

                        Die letzte kuavn hot mein letztn funkn lebmswün blockiat

                        Die letzte kuavn hot mein keapa endgültig eliminat.

So vü leare tog wieda sinnlos vabrocht, so vü volle nächt wieda schloflos duachgwocht

Afoch ka anzigs zü bis zum horizont, afoch mein kronkn keapa net meah geschont

Die schübe raubm ma meine eneagien, die vian zastean meine sicharungskopien

Mei vastond spüt varuckt und moit ma an kreis, jede anzelne foab gibt ma den beweis.

~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 22./23./26./28./29. dezember 2015.pk.

Überarbeitet am 08. februar 2017.pk. – copyright by philipp kirschner.pk.

***************************************************

nochmals ein herzliches dankeschön für euer interesse, eure lange treue, euren oftmaligen besuch und für eure zeit, die ihr alle ins lesen dieser mundartigen texte steckt. ich weiss, es ist nicht immer leicht.
aber übung macht doch den meister.

und hier wieder die üblichen links:

übersicht band 2
übersicht band 4 und band 3
facebook
twitter
google+
literatpro - meine gedichte band 2

danke für alles. und ich habe noch eine grosse bitte.
bleibt mundartig gesund und bleibt mir weiterhin gewogen.
euer philjazzmetal, der mundartige.