267. | schutzengl

meine lieben treuen leserinnen und leser der mundartigen dichtung.
nach langer langer zeit darf ich euch den nächsten text präsentieren.

>>>>>>>>>>>>>>>>>>>>>>><<<<<<<<<<<<<<<<<<<<<<<

267. | Schutzengl.

A eiskoida schaua jogt ma von mein hois obwäats, üban krummen ruckn bis zu meine fiass

Schwea lostn die vün longen joahn auf mein sönschmeaz, denn mei lebm woa seah schoaf gwüazt bis edelsiass

Meine vakrompftn händ zittan scho die gonze zeit, meine beine hom mi a scho bessa gstützt

Und wonn i jetzt so zruckschau auf mei vagongenheit, hot mi mei schutzengl imma guad beschützt.

A eiskoida windstoss foaht duach mein klan frein raum, und fegt duachs fensta wieda in die natua

Flüstat geheimnisvolle sprüche vom oidn baum, bei den wuazln vagrobm ruht a noblschnua

Vaschliess meine müdn augn und träum mi weit weg, on zeitn, wo die eainnarung vablosst

Und wonn i zruckschau zu diesm wundascheenen fleck, hot mei schutzengl auf mi wieda aufposst.

A eiskoida nebl legt si üba mein vastond, des löchrige wissn hot si scho entfeant

Mei oids heaz pumpt nua no seah schwoch an die dünne wond, hot a scho fost des stete schlogn valeant

Mei gonza keapa vadient längst den ewign schlof, do iagend a pflicht woat no auf an obschluss

Und wonn i so zruckschau auf mei lebmstiaf und -hoch, gibt mia mei schutzengl an guadnmoagnkuss.

      Wohea du auch kumst, wo imma du auch bist, mein schutzengl hob i bis jetzt no nie vamisst

      Wos imma du mochst, wos imma du auch tust, mei eigna schutzengl hot mi nie beeinflusst

      Warum du existiast, wöchn zweck du eafüst, mei schutzengl hot mi scho wieda wochgeküsst

      Wöcha tiafe sinn dahinta steckn mog, mei schutzengl lebt in mia bis zu meim steabetog.

A eiskoide stimm spricht zu mia im schlof, in meim traum, woahheitn und lügn hoitn si die woog

Von hoch om eakennt ma an riesign breitn zaun, hob mit da wöd auf lebmszeit an vatrog

Leb mit da natua im einklong wie voa longa zeit, bedonk mi täglich bei unsra mutta ean

Und wonn i so zruckschau auf mei obgeschiednheit, konn i mi üba mein schutzengl net beschwean.

A eiskoide woikn schiebt si voa die woame sunn, depressionen hobm mi pletzlich übafoin

Mei sicht vaschwommen, muass mi jetzt wiaklich vü ausruhn, hoit mi fest on diesm letztn hoffnungshoim

Die luft vabriat sötsom, vaströmt grüche intensiv, mei ohnmocht hot glei wieda a pause gmocht

Und wonn i so zruckschau auf mei übalebmsschiff, hot mia mei schutzengl des segln beibrocht.

A eiskoida schottn übanimmt donn mein vastond, schüttlt, rüaht und mischt meine gedonknwöd

Auf meim gsundungsweg woan bäume, stana und a wond, hob mi da grossn hearausfoadarung gstöt

Die komplikationen hom mei kroft ziemlich vabraucht, die letztn reseavn no mobilisiat

Und wonn i jetzt so zruckschau, woa des glück net varaucht, und mei schutzengl hot ma donn gratuliat.

      Wo imma du auch bist, wohea du auch kumst, mei schutzengl bezeichnet si ois reinste kunst

      Wos imma du auch tust, wos imma ea mocht, mei eigna schutzengl hot imma mit mia glocht

      Wöchn zweck du eafüst, warum ea existiat, mei schutzengl hot mit mia des lebm zelebriat

      Wöcha tiafe sinn dahinta steckn mog, mei schutzengl lebt in mia bis zu meim steabetog.

            Mei schutzengl schwebt üba mia, mei schutzengl lebt auf in mia

            Mei schutzengl hoit mei oide lebmswoog no im gleichgewicht

            Mei schutzengl gibt ma vü kroft, mei schutzengl liebt die freindschoft

            Mei schutzengl öffnet mia meine siebm sinn mit seim heilendn licht.

A eiskoids wossa rinnt zäatlich sonft üba mei haut, woscht die wundn rein, kühlt die schmeazendn noam

Die giftigen gedonkn schrein scho noch an heilkraut, von dem wüazign rauch siag i olle foam

So vü schritt valoan, die hohn stufn hom mi quöt, die vün klan bluadign krotza hom mi gschwächt

Und wonn i jetzt so zruckschau auf mei eignes schochföd, hot mei schutzengl die figua wieda gerächt.

A eiskoide wön übaroit jetzt mei phantasie, die wiaklichkeit eakennt boid kan unterschied meah

Treib vom wüdn gschrei zua harmonischn symphonie, jeda ton trifft genau sei zü mit seim spea

Spia die musik in afoch jeda anzelnen zön, diesa rhythmus kocht mei bluad bis zu seim end

Und wonn i jetzt so zruckschau zu meina gebuatsquön, is mei schutzengl in jedm element.

A eiskoide flut woscht des vaseichte lebm weit foat, bezoiht die offnen rechnungen auf amoi

Die tonnenschwean schuidn zabrechns eahnwoat, begeht donn gedonknvaloan an diebstoih

Hämisches grinsn wiad hintarucks zum wüdn stuam, des vastäakte echo zabricht jeds gestein

Und wonn i jetzt so zruckschau zu meim hohn leuchttuam, stroiht mei schutzengl in an heilignschein.

      Wohea du auch kumst, wo imma ea auch is, mei schutzengl bringt mi jetzt in mei paradies

      Wos imma du mochst, wos imma ea auch tut, mei eigna schutzengl beweist an grossn mut

      Warum du existiast, wöchn zweck ea eafüllt, mei schutzengl hot ma imma d‘woahheit enthüllt

      Wöcha tiafe sinn dahinta steckn mog, mei schutzengl lebt in mia bis zu meim steabetog.

            Mei schutzengl fliegt üba mia, mei schutzengl liegt nebm mia

            Mei schutzengl übawocht die woogschoin scho seit meina gebuat

            Mei schutzengl schenkt eneagie, mei schutzengl lenkt scho mei manie

            Mei schutzengl zeigt ma mei letztes zü auf meina oidn lebmsbuag.

                  Ea is mei schutzengl und mei freind, mei alter ego, mei bruada, mei klon

                  Ea is mei schutzengl, san vaeint, ea is mei vota, mei zwilling, mei sohn

                  Ea is mei schutzengl und mei schüd, mei kämpfanatua, mei klana dämon

                  Ea is mei schutzengl, mei spieglbüd, ea is mei lebm, mei vatrauenspeason.

A eiskoida komet beunruhigt mein müdn geist, des nahe end steht scho voa da gschlossnen tüa

So vü rostige schlössa hom den fluchtweg einkreist, dahinta heascht eisan die reinste willküa

Infeanalisches geschrei dröhnt duach mei vaseichts hian, schweissnoss voa ongst, nimmt mein keapa in besitz

Und wonn i jetzt so zruckschau zu dem weisn gestian, vaschiasst mei schutzengl vü donna und blitz.

A eiskoids licht eastroiht wundaschee om fiamament, hypnotisiat stoan meine augn hinauf

A friedlich lächlndes gsicht scheint und glüht transparent, im hintagrund lauat dichta schwoaza rauch

Des lebm is a vüz kuaza füm ohne zwischenzeit, jetzt is des toa offn, fühl mi fedaleicht

Und wonn i so zruckschau zu meina atemfreiheit, hot mi mei schutzengl mit seim fliagl gstreift.

A eiskoida hauch schwebt aus meim schwochn stün mund, des ollaletzte woat hot kana meah gheat

Da letzta schlog da lebmsuah beschliesst diesn bund, diesa vatrog hot si jetzt von söbst zasteat

A selige stün liebkost mein letztn neavngong, entschweb endlich in die ondre dimension

Und wonn i so zruckschau zu meim steiln lebmshong, umhüllt mi mei schutzengl mit seim kokon.

      Wo imma du auch bist, wohea ea auch kommt, mei schutzengl woat auf mi scho om horizont

      Wos imma du auch tust, wos imma ea mocht, mei schutzengl hot ma meine sinn vavüfocht

      Wöchn zweck du eafüst, warum ea existiat, mei schutzengl hot mei longs lebm ausbalanciat

      Wöcha tiafe sinn dahinta steckn mog, mei schutzengl lebt in mia bis zu meim steabetog.

            Mei schutzengl steht jetzt voa mia, mei schutzengl geht nebm mia

            Mei schutzengl übaprüft des gleichgwicht, kontrolliat die woogschoin

            Mei schutzengl befreit des glück, mei schutzengl valeiht nua a stück

            Mei schutzengl hüft beim letztn schritt und heilt die ongst voa dem tiafn foin.

                  Ea is mei schutzengl, mei kumpan, mei freind, mei gefäahte, mei skorpion

                  Ea is mei schutzengl, mei uaahn, ea is mei kamerad, mei chamäleon

                  Ea is mei schutzengl, mei geleit, mei eskoate, mei edla schutzpatron

                  Ea is mei schutzengl, mei freiheit, ea is mei lebm, mei jogenda orion.

                        Schutzengl hoit do jetzt mei hond, und füah mi ins jenseitige lond

                        Schutzengl breit die fliagl aus, und bring mi jetzt endlich in mei haus

                        Schutzengl loss mi afoch los, und gib ma endlich den gnodnstoss

                        Schutzengl dia gebüat grossa donk, bleib nua sitzn auf da grobesbonk.

A eiskoida schaua jogt da von dein hois obwäats, üban krummen ruckn bis zu deine fiass

Schwea lostn die vün longen joahn auf dein sönschmeaz, denn dei lebm woa seah schoaf gwüazt bis edelsiass

Deine vakrompftn händ zittan scho die gonze zeit, deine beine hom di a scho bessa gstützt

Und wonn du jetzt so zruckschaust auf dei vagongenheit, hot di dei schutzengl imma guad beschützt.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 05./06./07./08. dezember 2014.pk.

Überarbeitet am 04. jänner 2017.pk – copyright by philipp kirschner.pk.

******************************************************

nochmals ein herzliches dankeschön für euer interesse, für eure lange treue, euren mehrmaligen besuch und für eure investierte zeit, die ihr alle ins lesen und übersetzen dieser mundartigen texte steckt. vielen lieben dank dafür.

und hier wieder die üblichen links:

übersicht band 2

übersicht band 4 und band 3

facebook

twitter

literatpro - meine gedichte band 2

danke für alles. und ich habe noch eine grosse bitte.

bleibt mundartig gesund und bleibt mir weiterhin gewogen.

euer philjazzmetal, dialectiloquax, der mundartige.