danke dass ihr den weg hierher gefunden habt.
hier ist auch schon der nächste mundartige text.
264. | dei zweite haut.
>>>>>>>>>>>>>>>>>>>>>>>><<<<<<<<<<<<<<<<<<<<<<<
264. | dei zweite haut.
Foit jetzt endlich moi deine
händ, wosch da oba voahea des bluad und den schmutz no ob
Knie di jetzt endlich voa die
wänd, befrei den bodn von staub und stein, moch ois tipptopp
Geissl dein ruckn bis bluad lockt,
schrei dei wut, dein zoan in die wöd, hot si zvü aufgstaut
Leg di auf dein bauch endlich
nockt, loss dei schamgefühl foin und entblöss dei innre haut.
Moch jetzt endlich den eastn
schritt, mit blosse fiass spiast intensiv jedn untagrund
Ziag bilanz mit deim lebmsobschnitt,
vasteh jetzt diesn kompliziat vafosstn befund
Schreib dei gschicht in a dickes
buch, konzentria di beim lesn, jede seitn duachkämmt
Leg üba ois a waches tuch, vagrob
deine sündn im vasteck, triebe gezähmt.
Dei fö hoit di wohlig woam, dei fö mocht
di unsichtboa, dei fö is dei zweite haut
Dei dichta pöz is vü weat, dei pöz glänzt,
is unvaseaht, dei pöz is dei zweite haut
Dei wolle is flauschig weich, dei wolle
mocht di seah reich, dei wolle is dei
zweite haut
Dei hoa konns licht absoabian, dei hoa konn
ois imitian, dei hoa is dei zweite haut.
Streichl jetzt endlich übas
gsicht, die vün schläg mit da faust voahea hom iah wiakung zeigt
Duachschneid die sehnen bei
blitzlicht, des dröhnende donnagroin hot si gonz tiaf vaneigt
Schlof jetzt tiaf und fest im moa
ein, begrüss die gehängtn opfa joahtausende oid
Infiltria jetzt des bewusstsein,
des chaos da gedonkn vabringt vü zeit im woid.
Spazia auf nägl und glosscheam, jeda
anzelne neav wiad gsund massiat und onboaht
Geh duachs feia zum frein steam, die
lodande flomm valongt von dia no a grusswoat
Fliag mit den woikn um die wett, da
regn löst des soiz auf und woscht di wieda rein
Ziag die figuan aufm schochbrett,
kontrolliast jetzt des wödgeschehn mit an kieslstein.
Schmeiss uns jetzt aus dem
paradies, von dem exil gibts ka entkommen, ka wiedakeah
Zeig uns den weg zu den genies,
die biegn wieda ois zurecht ohne gegnweah
Easpoa uns die reine woahheit,
die frogn hom die valognen ontwoatn längst gwusst
Reparia jetzt die wiaklichkeit,
in unsra scheinwöd valian ma unsre lebmslust.
Do dei fö is a schutzschüd, auf deim fö eastroiht
a büd, dei fö is dei zweite haut
Dei pöz is unduachdringlich, dei pöz is
unbezwinglich, dei pöz is dei zweite haut
Dei wolle is flexibl, dei wolle
kompatibl, dei wolle is dei zweite haut
Denn dei hoa is wossadicht, und dei hoa
hot a wochsschicht, dei hoa is dei zweite haut.
Dei
zweite haut gibt da genügend kroft, dei
zweite haut gwinnt imma meah on mocht
Dei
zweite haut hot no gnua lebmssoft, dei
zweite haut ziagt boid wieda in die schlocht
Dei
zweite haut steht mit dia in kontakt, dei
zweite haut küat si zum schöpfungsakt
Dei
zweite haut übalebt an impakt, dei
zweite haut hot die zukunft voaheagesagt.
Massia endlich mit leidnschoft,
die wüagemale om hois foin net meah so ins gwicht
Sezia bis da keapa easchlofft,
dei neugiade beim beichtn besteht auf schweigepflicht
Öffne endlich dein frein geist, wühl
di in fremde gedonkn, saug jeds detail auf
Hoff, doss dei vastond net
entgleist, dei hossexplosion eskaliat in an amoklauf.
Befrei di von oi deina schuid, do
die beweise lossn si net so afoch stöhn
Bewoah endlich moi dei geduid, deine
vabrechn lossn si scho goa net meah zöhn
Flücht jetzt endlich in dei exil,
da weg füa an neuonfong findet no long ka end
Öffne dei sichaheitsventil, ealebst
dei hoats lustealebnis in jedm moment.
Leb endlich in da wiaklichkeit,
dei traumwöd visualisiat ois in a fiktion
Bist dia söbst dei dreifoitigkeit,
spoitest dei ich in jede eadenkliche peason
Vabreit jetzt endlich a gerücht, dei
enoames kopfgöd host nua dia söbst onvatraut
Host glei deine lebm übaprüft,
des chamäleon in dia drin is dei zweite haut.
Denn dei fö steht glei bei fuss, dei fö
kumt sofoat zum schuss, dei fö is dei
zweite haut
Dei pöz hot vü qualität, dei pöz a
spezialität, dei pöz is dei zweite haut
Dei wolle reinste natua, dei wolle von
stoaka statua, dei wolle is dei zweite haut
Und dei hoa is genial, dei hoa is
phänomenal, dei hoa is dei zweite haut.
Dei
zweite haut gibt da gnua eneagie, dei
zweite haut zwingt jedn in die knie
Dei
zweite haut is a anomalie, dei
zweite haut is die reinste alchemie
Dei
zweite haut hot an söbstheilprozess, dei
zweite haut treibts wüd bis zum exzess
Dei
zweite haut übalebt jedn krieg, dei
zweite haut feiat an kolossaln sieg.
Lebst in deim eignen univeasum, dei
zweite haut hot kan kella, ka fensta, ka tia
Lebst in deim uaeignen heiligtum, dei
zweite haut vateidigt iah ongstommtes revia
Phantasiast real in deina wöd, dei
zweite haut vabiegt raum und zeit und a des
licht
Realisiast dieses himmlszöt, dei
zweite haut hoit darüba des jüngste gericht.
Quö deine geisln bis aufs bluad,
deine foitamethodn schliessn auf phantasie
Vaspü net oi zu schnö dei gluad, des
animalische monsta eazeugt hystearie
Vawisch dei grenzn, deine spuan,
füa dei existenz drahst di um hundatochzig grad
Entfoch endlich an wüdn stuam, die
vün onkläga plädian auf schwean hochverrat.
Nimm da do freiwillig des lebm,
vaschwend net zvü gedonkn auf deina odyssee
Spiast tiaf in dia a sötsoms bebm,
dei kronka entzug valongt noch reinem weissn schnee
Foist ständig in des söbe loch, des
netz scho längst varottet, die londung ziemlich hoat
Suachst die gonze zeit noch an
stoff, füa dein lebmswondl brauchst a eignes losungswoat.
Foit jetzt endlich moi deine
händ, wosch da oba voahea des bluad und den schmutz no ob
Knie di jetzt endlich voa die
wänd, befrei den bodn von staub und stein, is dei gnodnbrot
Geissl dein ruckn bis bluad
lockt, schrei dei wut, dein zoan in die wöd, hot si vzü aufgstaut
Leg di auf dein bauch endlich
nockt, loss dei schamgefühl foin und entblöss dei zweite haut.
Denn dei fö reicht bis ins grob, dei fö zeugt
lebm und tod, dei fö is dei zweite haut
Dei pöz is a unikat, dei pöz is wie a soidat,
dei pöz is dei zweite haut
Dei wolle woxt und gedeiht, dei wolle zu
oim bereit, dei wolle is dei zweite haut
Dei hoa stroiht in jeda foab, dei hoa is
a lebmsoat, dei hoa is dei zweite haut.
Dei
zweite haut produziat gnua potenz, dei
zweite haut vameaht intelligenz
Dei
zweite haut hot an schnön reflex, dei
zweite haut is a speziella kodex
Dei
zweite haut is dynamisch exogen, dei
zweite haut konstruiat kriegsarmeen
Dei
zweite haut übalebt an holocaust, dei
zweite haut herrscht unumschränkt mit eisana
faust.
Lebst in deim uaeignen fiamament, dei
zweite haut hot ka luke, ka guckloch, ka toa
Lebst in deim eignen experiment, dei
zweite haut is da geboarene aggressoa
Improvisiast peaveas in deim lond, dei
zweite haut krümmt relativ dieses schwoaze
loch
Peaveatiast dei reich zu feinen sond, dei
zweite haut apokalyptisches woikndoch.
Dei
zweite haut hot da iah botschoft offnboat, die
haut liebt und lebt
Dei
zweite haut hot da wiaklich goa nix daspoat,
die haut gibt und gräbt
Dei
zweite haut hot da iah grosse weisheit
zeigt, die haut zieht und webt
Dei
zweite haut hot si dei koide sö obzweigt,
die haut stiabt und lebt.
Foit jetzt endlich moi deine händ,
wosch da oba voahea des bluad und den schmutz no ob
Knie di jetzt endlich voa die
wänd, befrei den bodn von staub und stein, schaufl dei grob
Geissl dein ruckn bis bluad
lockt, schrei dei wut, dein zoan in die wöd, hot si zvü aufgstaut
Leg di auf dein bauch endlich
nockt, loss dei schamgefühl foin und entblöss dei zweite haut.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Geschrieben
am 26./27./28. november 2014.pk.
Überarbeitet
am 03. jänner 2017.pk. – copyright by philipp kirschner.pk.
******************************************************
und hier wieder die üblichen links:
danke für alles. und ich habe noch eine grosse bitte.
bleibt mundartig gesund und bleibt mir weiterhin gewogen.
euer philjazzmetal, dialectiloquax, der mundartige.
Keine Kommentare:
Kommentar veröffentlichen