300. | gestan.

300. | Gestan.
1)
Heit is ma ois völlig egal, heit tangiat mi net die klanste nochricht, mei gleichgültigkeit is eiskoid brutal
Heit is meim ego ois egal, heit intressiat mi übahaupt ka gschicht, mei passivität hot goa ka moral
Heit mocht füa mi des ois kan sinn, heit nimm i übahaupt auf kan rücksicht, mei gefühlskötn hot ma net vaziehn
Heit valiat jede tat sein sinn, heit heascht die dunklheit üba des licht, mei faulheit hot si an oadn valiehn.
2)
Vielleicht spia i moagn an biss, vielleicht is moagn ois spieglvakeaht, moch donn oba trotzdem kan kompromiss
Vielleicht entsteht moagn a riss, vielleicht hot des moagn scho zvü entbeaht, flücht glei in a vaschlossnes geheimnis
Vielleicht siag i moagn dwoahheit, vielleicht hob i mi scho dagegn gweaht, hob mi davon oba no net befreit
Vielleicht san die wüafln bereit, vielleicht is moagn die zoih unvaseaht, easchlog mi söba mit blinda dummheit.
ch 1a)
      Heit oda moagn moch i an schritt, des gestan bleibt seah weit zruck, hot ständig a hohes defizit
      Heit oda moagn schreib i a buach, des gestan steht unta druck, is guad zuadeckt mit an wachn tuach
      Heit oda moagn moi i a büd, des gestan is auf entzug, hot übahaupt ka rolle meah gspüt
      Heit oda moagn sing i a liad, des gestan stiazt ob beim flug, hot gegn die raumzeit rebelliat.
3)
Heit mocht des ois kan untaschied, heit kippt mei gleichgwicht in a tiafe schlucht, mei freia foi is peafekt und solid
Heit übasteig i mei limit, heit bin voa mia söba auf da flucht, mei panische ongst eastoat beim suizid
Heit loch i üba diese wöd, heit sprech i gonz offn üba mei sucht, mei topfakeit eahebt mi zu an höd
Heit steh i mittn im schlochtföd, heit vasteck i mi in ana sondbucht, mei feigheit hot mi scho wieda blossgstöt.
4)
Vielleicht find i moagn mei zü, vielleicht berüaht mi moagn a sonnenschein, wäamt mei koide haut in diesm schachspü
Vielleicht bin i moagn gonz stü, vielleicht denk i moagn wie diesa stein, duachwondre jede schicht ohne zeitgfüh
Vielleicht leb i moagn im jetzt, vielleicht kenn i moagn mei eignes sein, diesa weg is vüz kompliziat vanetzt
Vielleicht san die wüafln valetzt, vielleicht is moagn die zoih wieda rein, hob die schwingungen ziemlich untaschätzt.
5)
Oba gestan woa ois peafekt, gestan hot mi des lebm innig küsst, niemond redt üban schmettalingseffekt
Und gestan hot mi nix befleckt, gestan hot dei heaz mia mei sö vasüsst, mei gonza keapa woa ziemlich earegt
Und gestan woas pletzlich bedeckt, denn gestan wocklte des lebmsgrüst, da dichte nebl hot si wieda bewegt
Gestan wuade da tod eaweckt, gestan hob i füa mein leichtsinn gebüsst, wuade in jede einzlheit zalegt.
ch 1b)
      Heit oda moagn foig i dem pfad, des gestan hot si vaschäaft, woan nua a poa lächaliche grad
      Heit oda moagn les i die zeit, des gestan woa seah geneavt, via dimensionen hom si befreit
      Heit oda moagn streichl is licht, des gestan im schottnreich, ändat ständig sein keapa, sei gsicht
      Heit oda moagn spia i den wind, des gestan fischt im trübm teich, hot si a woahre ontwoat vadient.
ch 2a)
            Gestan, heit und moagn, von ana longen stund zua ondan konn chaos entstehn
            Gestan, heit und moagn, steta tropfn höhlt den hoatn stein oba a des lem
            Gestan, heit und moagn, die blitz zuckn übas fiamament mit an donnagroin
            Gestan, heit und moagn, des hechste gebiag is wieda zu feinem sond zafoin.
6)
Heit wiad mi goa nix intressian, heit stopf i olle gedonkn ins loch, mei miada blick wiad nua stua grodaus stian
Heit wiad mi rein goa nix onriahn, heit stoss in logischn vastond vom doch, mei foischheit konn si net meah imitian
Heit schleif i mei eainnarung, heit eatränk i mein weadegong im boch, mei kindheit hot scho an vüz tiafn sprung
Heit zaplotzt mei vasicharung, heit öffnet si mei letztes geheimfoch, mei weisheit valiat scho jede hoffnung.
7)
Vielleicht foig i da foischn spua, vielleicht eakenn i moagn die lautschrift, begreif endlich die übalebmsstruktua
Vielleicht bin i moagn a schnua, vielleicht san die knotn moagn mei gift, bin nua a entbeahliche spüfigua
Vielleicht spia i moagn a kroft, vielleicht hob i mi moagn meah vatieft, in die oide vaschlüsslte botschoft
Vielleicht ghean die wüafln bestroft, vielleicht schreib i moagn die zoih mit an stift, die eakenntnis daraus bleibt rätslhoft.
8)
Do gestan woa ois ideal, denn gestan woa die liebe grenznlos, ka finstanis stroiht im tiafstn kanal
Oba gestan woa ois legal, gestan woan meine heazschläg torpedos, meine gefühle woan irrational
Pletzlich sank gestan die moral, gestan eawochte i auf an amboss, da grosse homma glühte infernal
Gestan woa da tod des schicksal, gestan woan die föhla da todesstoss, entwicklte sich zum gresstn skandal.
ch 1c)

      Heit oda moagn schau i donn zruck, des gestan ziagt si eng zomm, spia scho wies kocht, mei hossendes blut
      Heit oda moagn stich i in see, des gestan vasinkt im schlomm, drausst lauat unsichtboa die armee
      Heit oda moagn geh i zugrund, des gestan hot füan kuazn moment, vagessn den imposantn fund
      Heit oda moagn riach i die luft, des gestan is scho dement, schloft tiaf und fest in da frischn gruft.
ch 2b)
            Gestan, heit und moagn, von ana minutn zua ondan konns chaos entstehn
            Gestan, heit und moagn, des fallende vawökte blott eanäaht des klanste lem
            Gestan, heit und moagn, asche und lava deckn mit weicha hitzn ois zua
            Gestan, heit und moagn, unbändig brutale kräfte entweichn da natua.
ch 3a)
                  Des gestan kämpft mit heit und moagn, ums nockte übalebm in an endlosn kreis
                  Des heit bekämpft gestan und moagn, mit an stoakn eadbebm afoch um jedn preis
                  Des moagn dämpft des gestan und heit, mit seim oigemeinwissn auf an foischn gleis
                  Nua die zeit heilt die vün wundn, hot des geheimnis entrissn, do es gibt kan beweis.
9)
Heit konn ma ois gstoihn bleibm, heit is mei besta freind da alkohol, mein mut zeig i mit drogn, wüd und hoat
Heit wea is bis zua spitzn treibm, heit bin i da entgegngsetzte pol, mei vafehlung hätt i ma gean easpoat
Heit wü i nix meah redn, schreibm, heit hot mei pein des anzge monopol, mei kronkheit hot scho stoak im startloch gschoat
Heit mecht i mei haut obreibm, heit trog i mei eignes sichtboas symbol, meine frogn bekommen ka ontwoat.
10)
Vielleicht bin i moagn weit weg, vielleicht brauch i moagn ka eneagie, füah meine reseavn zum woiknsteg
Vielleicht hob i moagn kan zweck, vielleicht geh i moagn zua therapie, vateidig mei sötenes privileg
Vielleicht is moagn zeitstüstond, vielleicht hob i moagn donn amnesie, jeda eainnrungsfüm brennt auf da wond
Vielleicht reis i in a feans lond, vielleicht lieg i moagn in agonie, da friedliche raum liegt om äussastn rond
Vielleicht san d‘wüafln unbekonnt, vielleicht hom die zoihn die anomalie, san afoch weida groit, gonz wutentbronnt.
11)
Do gestan woas lebm no guad, gestan woad heazlichkeit om rechtn fleck, harmonisch und gmiatlich fliesst no des bluad
Gestan woa in mia no a gluad, und gestan sah i no an sinn und zweck, hoff inständig auf a wiedagebuat
Gestan hot da onspoan geknuat, denn gestan öffnete si des vasteck, befind mi scho längst aufm letztn endspuat
Gestan hot da tod laut geschnuat, gestan valoan die figuan aufm brett, vasank in da braunen reissendn fluad.
ch 1d)
      Heit oda moagn wead is bereun, des gestan eakläat an krieg, muass soiz in die tiafn wundn streun
      Heit oda moagn loch i donn laut, des gestan kennt goa kan sieg, hot kana menschnsö meah vatraut
      Heit oda moagn kumt donn des end, des gestan a mosaik, aus jedm anzelnen element
      Heit oda moagn schmeck i den tod, des gestan reine logik, aus an glaubm und iagend an gott.
ch 2c)
            Gestan, heit und moagn, von ana sekundn zua ondan konn chaos enstehn
            Gestan, heit und moagn, des wäamende licht braucht die eade, unsre wöd, des lem
            Gestan, heit und moagn, wossamassn übaschwemmen gerüaht des trockne lond
            Gestan, heit und moagn, unhamlich brutale kräfte erreichn jedn rond.
ch 3a)
                  Des gestan kämpft mit heit und moagn, ums nockte übalebm in an endlosn kreis
                  Des heit bekämpft gestan und moagn, mit an stoakn eadbebm afoch um jedn preis
                  Des moagn dämpft des gestan und heit, mit seim oigemeinwissn auf an foischn gleis
                  Nua die zeit heilt die vün wundn, hot des geheimnis entrissn, do es gibt kan beweis.
ch 4a)
                        Des gestan zateilt die uah, des gestan leistet an schwua
                        Des gestan lüftet die zeit, des gestan stüt die freiheit
                        Des gestan suacht nochm sein, des gestan bewoaht den schein
                        Des gestan wiad jetzt vagrom, des gestan bleibt autonom.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 12./15./16./17./18./19./20./21./22. juni 2015.pk.
Überarbeitet am 14. jänner 2017.pk. – copyright by philipp kirschner.pk.
 

**************************************************************************

bleibt mir weiterhin gewogen.

euer philjazzmetal, der mundartige.