331. | mut.

meine lieben braven, treuen mundartigen leserinnen und leser. seid alle hier aufs herzlichste willkommen und gegrüsst. der erfolg der einzelnen texte geht bereits in die hunderte. der text 410. bezoiht mit 207 klicks und der text 408. vagabund mit 206 klicks, gefolgt von 409. des licht und die dunklheit mit 191 klicks. eine sensation. ein riesengrosses dankeschön.

hier wieder die übersicht über band 4 und band 3 sowie über band 2. einfach anklicken. habe bereits zwei texte vom zweiten band auf literatpro (139. ka lond in sicht und 165. fenstabrett) veröffentlicht. einfach daraufklicken und schon werdet ihr weitergeleitet.

so, die nächsten texte, die ich veröffentlichen werde, sind die nummern 331. bis 340.
hier ist auch schon 331. mut. wünsche euch ein spannendes leseabenteuer.

>>>>>>>>>>>>>>>>>>>>><<<<<<<<<<<<<<<<<<<<

331. | mut.

I nimm jetzt endlich wieda plotz, zateil die zeiga da uah in minutn und nua a stund

So vü voauateile in mia hom des kompliment eastoan lossn und geht donn zugrund

Mei stoarra blick rast in mei hian und geniesst die aussicht auf endorphine und opium

Diesn trip wead i niemois vagessn, bin no in da onfongsphase von meim studium.

I nimm jetzt endlich wieda plotz, gwinn oda valia des spü von lebm und tod ohne sinn

Revidia mei obweahhoitung, is da anzige ausweg aus diesa gföschtn disziplin

Mei valongen is volla struktua, a strom aus eainnarungen trifft mein kloan vastond

Ois is ealaubt ohne rücksicht auf an valust, diesa trip bringt mi bis zum äussastn rond.

      Noglts mi ruhig auf a oids hoizkreiz, schäm mi net füa mei feige sucht

      Ealieg ständig diesm hoatn reiz, des vabotene is die frucht

      Ziag dei messa schwea üba mei haut, beweis da jetzt mein grossn mut

      Auf da reise jedn blind vatraut, berausch mi sogoa om eignen blut.

I nimm jetzt endlich wieda plotz, setz jedn anzelnen stein in a vagessnes mosaik

Eateil ma an dispens vom stüstond, es gibt afoch kan engposs in chemie oda physik

Tausende halluzinationen strömen aus diesa natua mit volla wucht auf mi ein

Diesa trip hot si zu an legendäan füm etabliat ohne bewusstsein.

I nimm jetzt endlich wieda plotz, denn die nächste runde hot si scho geheimnisvoi voagstöt

Mei unschuid giat scho noch da nächstn stufn, suach vazweiflt die tüa zu diesa neuen traumwöd

Mit gschlossnen augn fliag i duach die raumzeit duachs schwoaze loch bis in die viate dimension

Des zü is no imma net in sicht und beweist, diesa trip hot afoch goa ka endstation.

Siag die foabm so intensiv, spia den otem da natua, mei phantasie so kreativ, foig da unsichtboan spua

Hea des leise flüstan vom wind, spia den heazschlog da natua, mei vision voaheabestimmt, völlig übasponnt mei schnua

Riach die düfte so intensiv, spia die wundn da natua, meine wochtraim so impulsiv, spü mit ana schochfigua

Fühl die scho längst vastoabnen sön, spia iahre ongst, iahn schmeaz, muass die wiaklichkeit vastön, foi imma schnölla obwäats.

      Jogts ma nodln duach mei fleisch und bluad, wea mei feige sucht nie bereun

      In mia schwöt afoch die hasse gluad, des vabotene is a foin

      Geissl und peitsch mi do bewusstlos, beweis da jetzt mein gonzn mut

      Auf da reise schlof i auf deim schoss, eareg mi scho on da rodn flut.

            Wü do wos ealem, meine grenzn auslotn, jedn meina anzelnen schritt an kloan sinn gem

            Wü ma ois onsehn, den hechstn rond bezwingen, oi meine höhn und tiafn leanen zu vastehn

            Wü jetzt mein weg gehn, amoi quea duachs labyrinth, wea den eingong zum endgültign ausgong umdrehn

            Wü da ois gestehn, sog da die gonze woahheit, mei nei geboarena mut wiad jedn schmeaz vawehn.

I nimm jetzt endlich wieda plotz, schneid ma söbst jeds klanste passlteil in die richtige foam

Do wie imma föht om schluss wieda moi a stück, befindn si leida aussahoib da noam

Schwimm und tauch tiaf in büdan umhea, in oin richtungen is ewig long ka end in sicht

Diesa trip woa dreidimensional, in da viatn foi i sowieso ausm gleichgewicht.

I nimm jetzt endlich wieda plotz, meine wüafln san scho gfoin, ma heat den aufproi auf beton

Die gesomtzoih is unintressant, wos zöht san die foabm da augn vom eignen dämon

Himml und hölle san so real wie des paradies in ana schlocht om strond im gebiag

Übahoi auf da müchstrossn mein feind, und hob auf diesm trip ois genau fotografiat.

Siag die zukunft im schottnlicht, spia die wön diesa zeit, mei mund hot jetzt a schweigepflicht, san no net dafüa bereit

Hea stimmen von seah weit entfeant, spia gefühle diesa zeit, mei vastond hot dazua gleant, stö mi da vagongenheit

Riach den gstonk diesa gegnwoat, spia die wundn diesa zeit, mei obneigung is so stoak, spü mit unsra ewigkeit

Fühl die scho längst vastoabnen sön, spia iahre ongst, iahn schmeaz, muass die wiaklichkeit vastön, foi imma schnölla obwäats.

      Schneid ma do ruhig a stück fleisch hearaus, mei feige sucht trogt goa ka schuid

      Bin scho eingspeat in a koids grobhaus, des vabotne hot ka geduid

      Liebkos mi do beim foitan und quön, beweis da jetzt mein foaschn mut

      Auf da reise gibts so vü gedröhn, eahitz mi scho om fingahut.

            Wü no vü eafoahn, wonda aufm schoafn grat, muass jedn anzlnen schritt voam obstuaz bewoahn

            Wü jetzt no aushoan, jede spitzn eaklimmen, denn oi meine höhn und tiafn san scho auseakoan

            Wü ma nix easpoan, jeda umweg is eawünscht, und da letzte ein- und ausgong san scho längst zugfroan

            Wü jetzt no nochboahn, die woahheit gheat jetzt gepflückt, duach den schmeaz wuade mei mut wieda gonz neu geboan

                  Füa diese exkuasion braucht ma jede menge mut, is a gfäahlicha ausflug

                  Füa diese expedition braucht ma vü mumm und schneid, bin dazua imma bereit

                  Füa diese foaschungsfoaht braucht ma an woahn hödngeist, bin leida scho oft entgleist

                  Denn füa diese entdeckungsreise braucht ma vü mut, bin geeicht füa diesn flug.

I nimm jetzt endlich wieda plotz, zaleg die wön in anzlne streifn, noch mustan soatiat

Schreib ois fein säubalich akribisch auf, loss nix aus, olle beweise san gonz detailliat

Meine weit göffnetn augn blickn in a paralleluniveasum glei nebman

Diesa trip hot mi tiaf berüaht, muass meine eainnarungen vagessn, zareiss diesn plan.

I nimm jetzt endlich wieda plotz, dieses spü von lebm und tod beheasch i scho wie im schlof

Natüaliche oda synthetische drogn wean bei mia hoch geschätzt, kenn scho jedn stoff

Loss nix aus denn füa mi is jeds gift die reinste medizin, ständig in hohn atmosphäan

Suach noch da ealeuchtung, nochm sinn, jeda trip konn ma imma meah von dem wissn eakläan.

Siag jede zön gestochn schoaf, spia sogoa iah eneagie, entnimm ma wos je noch bedoaf, vadräng mei grosse phobie

Hea iahre kommunikation, spia wie si donn jede teilt, woat auf a schnölle reaktion, hom si sogoa söbst geheilt

Spia die wundn und noabm, riach jede klanste eignschoft, spü wieda mit den foabm, hob mi wieda söbst hoat bestroft

Fühl die scho längst vastoabnen sön, spia iahre ongst, iahn schmeaz, muass die wiaklichkeit vastön, foi imma schnölla obwäats.

      Ziag fein säubalich mei haut vom leib, mei feige sucht is jetzt mei feind

      Is a onregenda zeitvatreib, bin mitm vabotnen vaeint

      Vakauf die oagane aufm moakt, beweis da jetzt mein übamut

      Auf da reise woa i net besoagt, oba jetzt is ois absolut.

            Wü mi no eafreun, bring gean licht ind finstanis, wea kan von meine anzlnen schritt jemois bereun

            Wü jetzt wos einstreun, die wäame speichat si drin, meine höhn und tiafn wean aufanonda proin

            Wü nix übamoin, vamiss scho die zwischnwöd, denn da ein- und ausgong san scho zua gänze zafoin

            Wü jetzt nix bezoihn, do d’woahheit hot si vadreht, mei neigeboarena mut deaf diesn schmeaz onstroihn.

                  Füa diese exkuasion braucht ma jede menge mut, is a gfäahlicha ausflug

                  Füa diese expedition braucht ma vü mumm und schneid, bin dazua imma bereit

                  Füa diese foaschungsfoaht braucht ma an woahn hödngeist, bin leida scho oft entgleist

                  Denn füa diese entdeckungsreise braucht ma vü mut, bin geeicht füa diesn flug.

                        Denn i fühl mi no so jung, do äussalich bin i scho a uaoida greis

                        Bereit füan nächstn sprung, mei söbstmöadarischa mut hot afoch sein preis

                        Do i fühl mi no so jung, do äussalich bin i scho a senila greis

                        Bereit füan letztn sprung, mitm goidenen schuss gwinn i den eastn preis.

I nimm jetzt endlich wieda plotz, zateil die zeiga da uah in minutn und nua a stund

So vü voauateile in mia hom des kompliment eastoan lossn und geht donn zugrund

Mei stoarra blick rast in mei hian und geniesst die aussicht auf endorphine und opium

Diesn trip wead i niemois vagessn, bin no in da onfongsphase von meim studium.

~~~~~~~~~~~~~~~~~~~~~~~~~~~~~~~~~

Geschrieben am 17./18./19. oktober 2015.pk.
Überarbeitet am 26. jänner 2017.pk. – copyright by philipp kirschner.pk.

**********************************

vielen dank für euren besuch. 
bleibt mir weiterhin gewogen.
euer philjazzmetal, der mundartige.