352. | Spiegl.

liebe leserinnen und leser. liebe textmaniac-gemeinde. ich darf euch nun den nächsten text präsentieren:

>>>>>>>>>>>>>>>>>>>>>>>>>><<<<<<<<<<<<<<<<<<<<<<<<<<

352. | spiegl.

Do jetzt is ois ondas, wia zwa san köta woan, scho voa a poa togn, hom ma iagendwos valoan

Konns afoch net eakläan, wia zwa san uns scho fremd, bin scho völlig vawiat, hom unsan fodn duachtrennt

Net amoi a liabs woat, a ka augnkontakt, ka sonfte berüahrung, bin scho traurig und vazagt

Gehst ma scho ausm weg, mochst afoch die tüa zua, diese sölische pein, braucht dringend a korrektua.

Ois hot si vaändat, hom uns so weit entfeant, scho seit a poa wochn, hom ma goa nix dazua gleant

Konns oba net beschreim, des gfüh is sondaboa, drah mi jo scho im kreis, fühl mi wie in an laboa

Ka gutn moagn kuss, hot mi zäatlich aufgweckt, nua des weckageläut, hot mi donn dröhnend aufgschreckt

Ka gemeinsomkeit meah, bist füa mi a phantom, ka funkn springt üba, schwimm ohne di gegan strom.

      Des hoch obn is jetzt tiaf untn, und des weit hintn is jetzt gonz nah

      Drum hob i mein plotz no net gfundn, in diesm labyrinth, des is mei karma

      Da spiegl hot mi gfongen und eingspeat, da spiegl kettet mi on sei wond

      Beobocht jetzt ois seitnvakeaht, duachs vastaubte trübe glos aus mein vastond.

Ois is so vaschiedn, nix is meah so wies scheint, scho seit a poa wochn, host imma wieda so vü gweint

Konns net gscheid ealäutan, bist ma jetzt unbekonnt, bin scho seah beunruhigt, host mi iagendwie vabonnt

Ka flüstan in da nocht, und ka gespräch om tog, suach noch deina liebe, do ka ontwoat auf mei frog

Deine spuan san vawischt, dei aura bleibt vaschoin, spia net amoi an hauch, die ängste kuman ins roin.

Ois hot si vawondlt, wos hot uns nua entzweit, denn voa a poa monat, host di glei von mia befreit

Konns net konkretisian, afoch schwea zu vastehn, die stö bleibt imma gleich, wü di endlich wiedasehn

Und ka vafüahrungskunst, hot mi wieda eahitzt, die kötn mocht mi krong, hob scho so long net meah gschwitzt

So vü diffarenzn, hom si voa uns aufbaut, des liebeslicht flackat, imma blossa auf mei haut.

Denn nix is meah so wies früha woa, die monat summian si zu an joah, mecht so gean die zeit zruckdrehn

Unsa lebn woa afoch peafekt, woast do imma scho mei lustobjekt, mecht die scheam wieda zommnähn

Donn hot si ois gegn uns vaschwoan, vü zu empfindlich unsre sensoan, do wia zwa hom nix bemeakt

Unsa lebn a zusommenhoit, mit ana reichn oatnvüfoit, do die risse hom si vastäakt.

      Des tiaf untn is jetzt hoch obn, und des gonz nahe is so weit hint

      Drum wuade mei plotz weit vaschobn, des is mei karma in diesm labyrinth

      Da spiegl hot mi in arrest gsetzt, da spiegl fesslt mi on fiass und händ

      Hob mei situation untaschätzt, des vastaubte trübe glos hot si ausdehnt.

            Mecht diesn spiegl zakrotzn und einschlogn, einschmözn und zua gänze zastean

            Mecht jetzt von diesm spiegl flüchtn und entfliehn, und diesm spiegl des füachtn leahn

            Muass unbedingt diesn spiegl übalistn, suach scho vazweiflt noch an fluchtweg

            Muass aus diesm spiegl ausbrechn und entfliehn, sunst bleib i ewig in dem vasteck.

Do jetzt is ois ondas, wia zwa san köta woan, scho seit a poa monat, hob in übablick valoan

Mecht endlich ois enthülln, endlich dwoahheit aufspüan, scho völlig irritiat, muass unsan knotn aufschnüan

Dein sonftmut vagessn, dei zäatlichkeit entfoin, benötig dei wäame, mecht jetzt deine foabn moin

Gehst on mia stua voabei, bin füa di unsichtboa, hob scho tränen im gsicht, schiass ma söbst a eigntoa.

Ois is modifiziat, dei nähe is unecht, denn scho seit a poa joahn, isd zweisomkeit ungerecht

Konn des net benennen, des gfüh is so obsuad, die eainnarung bleibt, dos gedächtnis hot scho knuat

Ka duft dea mi vafüaht, kan höhepunkt eareicht, ka lustvolles gestöhn, hob dei heaz und sö vascheicht

Des glück is vaschwundn, ka wollust hot mea bebt, die sinnlichkeit vagrom, hom uns auseinondaglebt.

Die ändarung is net ongenehm, und die joah summian si zu an lem, des rad da zeit läuft wie gschmiat

Jede begegnung woa reibungslos, woan do so gean auf unsam lustschloss, zua ruine degradiat

Pletzlich hot si a hebl umglegt, woa einschneidend, hot uns seah geprägt, do wia zwa homs net eafosst

Jede begegnung so intensiv, dei intimität so kreativ, die stützn san scho varost.

      Die extremhöhe stiazt endlos tief, und des letzte end wiad zum onfong

      Drum hob i auf mein plotz kan zugriff, denn in diesm labyrinth gibts kan ausgong

      Da spiegl hot mi eawischt und einglocht, da spiegl hot mi kneblt und ongschnoit

      Hob mei aussicht goa net übadocht, des vastaubte trübe glos wiad übamoit.

            Mecht diesn spiegl zahockn und wegreissn, ausradian und zua gänze zareim

            Mecht von diesm spiegl foatlaufn und entfliehn, und diesm spiegl voa hoss onschrein

            Muass jetzt unbedingt diesn spiegl betrügn, damit die wiaklichkeit existiat

            Muass aus diesm spiegl ausreissn und entfliehn, denn sunst bleib i ewig inteaniat.

                  Schau aus diesm spiegl in a vakeahte und vadrahde wöd

                  Schaust ma sogoa direkt in mei gsicht, do dei blick is mit tränen übasät

                  Schau aus diesm spiegl in a traurige und bedrückte wöd

                  Schaust ma direkt in meine augn, do deine san mit tränen übasät.

Und ois is so vaföscht, nix is meah so wies scheint, scho seit a poa lebn, host imma wieda so vü gweint

Konns net kloa foamulian, ois is so obnoamal, kenn mi afoch net aus, bin füa di net meah real

Des feua ealoschn, gibt do ka heazlichkeit, dei leidnschoft vaebbt, schlog die liebe mit blindheit

Vamiss so dei nähe, dei wäame is so koid, schrei scho so laut noch dia, hob mi om spiegl festkroit.

Ois is so valogn, reihum a widaspruch, seit so vün lebn, kumts jetzt zwischn uns zum bruch

Konns net kloa begründn, is nua reina instinkt, hobs scho long vamutet, ea alla hot ma zuagwinkt

Ka streichln, liebkosn, nua dunkle ignoaranz, gib da so vü zeichn, füa unsan ollaletztn tanz

Des schicksoi hoit mi fest, die foin hot jetzt zuaschnoppt, mei liebe hots ma gstoin, woan do scho fost wie valobt.

Die umfoamung is mei rettungsboot, und des lebn summiat si zum tod, da sond im wossa eastoat

Hom uns do gegnseitig gefoamt, hob di geküsst, gedrückt und umoamt, woast ständig mei zufluchtsoat

Auf amoi hot die glockn nimma gläut, die kistn nua mit eadn bestreut, do wia zwa homs net kapiat

Unsre liebe woa gmeisslt in stein, guad beschützt vom woamen sonnenschein, do die stroihn san erodiat.

      Die extreme tiefe fliagt endlos hoch, und da onfong wiad zum letztn end

      Drum is mei plotz in an tiafn loch, da ausgong wuade vom labyrinth getrennt

      Da spiegl hot mi eingsaugt und pockt, da spiegl noglt mi auf a kreiz

      Hob mei eigne zukunft zschnö vajogt, des vastaubte trübe glos eingrahmt in hoiz.

            Mecht diesn spiegl niedametzln und sprengen, ausrottn und zua gänze vadeam

            Mecht von diesm spiegl desatian und entfliehn, mecht afoch net in diesm spiegl steam

            Muass unbedingt diesn spiegl gezüt täuschn, do niemond hüft ma aus diesm grob

            Muass aus diesm spiegl entweichn und entfliehn, bleib sunst ewig im kaleidoskop.

                  Schau aus diesm spiegl in a vakeahte und vadrahde wöd

                  Schaust ma sogoa direkt in mei gsicht, do dei blick is mit tränen übasät

                  Schau aus diesm spiegl in a traurige und bedrückte wöd

                  Schaust ma direkt in meine augn, do deine san mit tränen übasät.

                        Des konn do net sein, i glaubs afoch net, bin do no goa net vastoam

                        Nua a besa traum, woch sicha glei auf, bin a neue lebnsfoam

                        Konn di hean und sehn, do nua mia is koid, deine tränen foin hearob

                        Mei letzte station, is diesa spiegl, schlof endlich tiaf und fest in meim grob.

Denn jetzt is ois ondas, i bin jetzt köta woan, scho voa a poa togn, hob i iagendwos valoan

Konns afoch net eakläan, bin ma scho söba fremd, bin scho völlig vawiat, hob scho mein fodn duachtrennt

Net amoi a liabs woat, a ka augnkontakt, ka sonfte berüahrung, bin scho traurig und vazagt

Geh da jetzt ausm weg, wü jetzt endlich mei ruah, diese sölische pein, lockt mei lem auf a foische spua.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 01./02./03./04. Februar 2016.pk 

copyright by philipp kirschner.pk

******************************************************

nochmals ein herzliches dankeschön für euer interesse, für eure lange treue, euren mehrmaligen besuch und für eure investierte zeit, die ihr alle ins lesen und übersetzen dieser mundartigen texte steckt. vielen lieben dank dafür.

und hier wieder die üblichen links:

übersicht band 2

übersicht band 4 und band 3

facebook

twitter

google+

literatpro - meine gedichte band 2

danke für alles. und ich habe noch eine grosse bitte.

bleibt mundartig gesund und bleibt mir weiterhin gewogen.

euer philjazzmetal, dialectiloquax, der mundartige.

353. | hohe wön.

seid wieder alle aufs herzlichste gegrüsst, ihr lieben, treuen und braven textmaniacs. im neuen jahr darf ich euch weiterhin mit meinen texten quälen. und hier ist auch schon der nächste:

>>>>>>>>>>>>>>>>>>>>>>>><<<<<<<<<<<<<<<<<<<<<<<

353. | hohe wön.

Hob wieda moi meine uaeignen schwierigkeitn entsoagt, und mi mit den grossn unglöstn problemen obquöt

Hob die floschn da besn gedonkn wieda moi entkoakt, und die vabognen weichn da unsichren zukunft gstöt

Hob die herausfoadarungen mit kompfeswün seah begrüsst, und die lächaliche provokation zäatlich liebkost

Hob jedn sinnlosn konflikt umoamt, gedrückt und geküsst, und jede feindschoft mit an stüamischn beifoi umtost.

Hob wieda moi mei eigne eainnarung seah tiaf vagrom, und mei kindheit ind letzte ritzn vom vastond vasteckt

Hob die suche noch meinen ötan imma wieda vaschom, und mei pflegefamilie mit an tuach wach zuadeckt

Hob in jedm kindaheim die äussaste seitn mitgschleppt, und mia mei eignes phantastisches univeasum baut

Hob auf da strossn, unta da bruckn, im bau übalebt, und in mein bisherign dasein niemondn vatraut.

      Bin a einzlgänga, a sondaling, a eremit, bin a vagabund, a virus, a parasit

      Geh da menschheit ausm weg, leb in da nocht, schlof om tog, mond und stean gebn ma ontwoatn auf mei frog

      Bin a künstla, a eafinda mit söbsteahoitungstrieb, bin a aussnseita, a egozentrika, a freak

      Lauf da freiheit hintahea, hob mei sucht scho fost im griff, diese hohe wön übaflutn mei rettungsschiff.

Hob wieda amoi mein eignen sadistischn hoss entzweit, und mein bestialischn wunschtraum in die tat umgsetzt

Hob die grausame realität von den föhlan befreit, und die valognen hoibwoahheitn leida untaschätzt

Hob auf die kloaheit diesa aussogn no nie an weat glegt, und die brutale existenz mit an lächln eafreut

Hob die vaföschte sichaheit zu an kollaps hinbewegt, und die zwietrocht übaroi gonz fein säubalich vastreut.

Hob wieda moi die dünnen risse zu schluchtn transfoamiat, und die unschuidign in mei tödliche foin glockt

Hob die klan diffarenzn zu woahra grösse aufsummiat, und die harmonie mit fanatischm eifa zahockt

Hob die entsponnte atmosphäre wieda zum kochn brocht, und die friedliche stimmung mit kriegarischm neid eahitzt

Hob diese lüstanen begiadn mit extase obgschlocht, und die geschwängatn woikn mit akribie aufgschlitzt.

Füa mi gibts kane barriean, kane hüdn, kane grenzn, ka wond, schau in jede richtung und üban rond

Konn niemois wieda umkeahn, drum losst mi mei freia wün net in stich, sunst brauch i wieda an neuen onstrich

Denn füa mi gibts kan rückschlog, ka stagnation, kan lealauf, kan stüstond, geh in jede richtung duachs gonze lond

Brauch a kan echtn vatrog, vüz vü wöata beschmutzn des papia, suach ma liaba mei eignes beutetia.

      Bin a einzlgänga, a oaginal, a höllnhund, bin a rebell, a einsiedla, a vagabund

      Geh da menschheit ausm weg, schlof om tog, leb in da nocht, mond und stean hoitn üba mia a longe wocht

      Bin a künstla, a produzent von söbstschutz jeda oat, bin ausgstiegn, a queadenka mit eahnwoat

      Renn da freiheit weit voaraus, hob mei sucht scho fost im griff, diese hohe wön treffn auf des fösnriff.

            Nua a klana sta schlogt scho hohe wön, nua a klana fliagl eaweckt an stuam

            Nua a flüstan losst den alarm onschwön, nua a sonfta kontakt zasteat an tuam

            Nua a zoata hauch entfocht hohe wön, a zoata fliagl losst die eadn bem

            A kuaza augnblick konn ois vastön, nua a kuaza stich nimmt glei a longs lem.

Hob wieda moi des toa meina eskapadn weit aufgmocht, den theatralischn ziakus da politik vahöhnt

Hob üba die dummheit dea genialität laut aufglocht, und die ausflüchte mit woahn geheimnissn vaschönt

Hob die ungerechtigkeit auf unsra wöd glei beim schopf pockt, und die umvateilung dea buntn scheine vaonlosst

Hob dem homo sapiens a tödliche kronkheit einprockt, und die besessnen gläubign gonz freiwillig ausglost.

Hob wieda moi den kreislauf da wiatschoft eaheblich gestöat, und olle nationen zum vaeintn kriag motiviat

Hob donn olle feinde beim gemeinsomen picknick vahöat, und die friednsvahondlungen koidblütig sabotiat

Hob atome wie wüd gspoitn ohne rücksicht auf valust, und da woffnproduktion mein gonzn besitz geschenkt

Hob die foigendn negativn foign leida net gwusst, und die konsequenzn afoch mit meina sucht eatränkt.

Füa mi gibts ka hindanis, ka untiefe, kan schronkn, kan engpass, schau in jede richtung mit augnmass

Moch niemois an kompromiss, drum eagibt mei freia wün jetzt an sinn, sunst brauch i donn dringend an neubeginn

Denn füa mi gibts kan nuipunkt, ka niedalog, ka unglück, kan nochlass, geh in jede richtung ohne kompass

Hob den vatrog in bluad tunkt, die vün wöata mochn nua varuckt, mei beute hot mit kana wimpa zuckt.

      Bin a einzlgänga, a queadenka, a desatöa, bin a revoluzza, a rebell, a domptöa

      Geh da menschheit ausm weg, leb in dunklheit, träum im licht, mond und stean eaöffnen mia iah weide aussicht

      Bin a künstla, a philosoph mit hohn lebnsdrong, bin a individualist mit kan ausgong

      Jog da freiheit hintahea, hob mei sucht scho fost im griff, denn diese hohe wön hom an seah unebnen schliff.

            Nua a klana sta schlogt scho hohe wön, nua a klana kean eaweckt an vuikan

            Nua a gedonke konn den vastond stön, nua a vage idee zasteat den plan

            Nua a foischa knopf kreiat hohe wön, a winzigs staubkoan losst die wöd eabem

            Nua a kuaza stich losst des gift onschwön, nua a kuaze sucht nimmt glei a longs lem.

                  Unsre zukunftspeaspektivn san späalich, sinkn bereits in den negativbereich

                  Nua die hohn wön meinens mit uns eahlich, nua die hohn wön mochn uns eantereif

                  Unsa betrochtungswinkl zu kompliziat, jeda stondpunkt vaändat die kloare sicht

                  Nua die hohn wön hom si no nie geiat, nua die hohn wön haun mei sucht ausm gleichgwicht.

Hob wieda die sölischn psychosn mit feua ongheizt, und die kronkhoft hystearischn wahnvoastellungen gfümt

Hob die schmeazhoftn quölarein mit foitarungen gereizt, und die blindwütign aussetza des vastondes grühmt

Hob die extrem moabidn peaveasitätn untastützt, und die entartet schöpfarische marta aufgeputscht

Hob die fein vazweigtn bleichn neavnstränge guad beschützt, und bin auf da bluadvaschmiatn strossn ins nix aus-grutscht.

Hob wieda die obgrundtiafstn instinkte hearaufbeschwoan, und des konkret abstrakte denkn bis ins klanste kopiat

Hob die innastn uaängste mit horror wiedageboan, und des obsolute graun in jede zön injiziat

Hob die zwonghofte faszination von hoata gwoit vameaht, und die animalischn triebe zum eablühn brocht

Hob meine letztn kroftreseavn füa mei sucht scho aufzeaht, und die eneagien dea hohn wön mia zu nutze gmocht.

Füa mi gibts kan stochldraht, kane zäune und bremsn, ka boiweak, schau in jede richtung zu jedm beag

Hob niemois ongst voam grat, drum fliagt mei freia wün duach raum und zeit, sunst brauch i wieda a neuen wettstreit

Denn füa mi gibts ka zurück, ka umkeah, kan wendepunkt, kan umbruch, geh in jede richtung mit an vasuch

Benutz den vatrog ois schüd, so vü wöata hom iah wiakung valoan, hob ma mei beute scho längst auseakoan.

      Bin a einzlgänga, a separatist, und a feind, bin a nihilist, a rebell, hob ois vaneint

      Geh da menschheit ausm weg, träum im licht, leb in dunklheit, mond und stean zeign ma iah entfeante ewigkeit

      Bin a künstla, a pionia mit übalebmswün, bin a studiata, a freigeist mit sonnenbrün

      Schleich da freiheit weit voaraus, hob mei sucht scho fost im griff, diese hohe wön schreibn an bittren obschiedsbrief.

            Nua a klana sta schlogt scho hohe wön, a klana samen explodiat zum sein

            A foische bewegung konn sta aushöhn, nua a schottn vanichtet glei den schein

            Nua a unkloas woat entfocht hohe wön, a karga keimling losst die ean eabem

            Nua a wimpanschlog konn des zü vaföhn, nua a dünna schnitt nimmt glei a longs lem.

                  Unsre zukunftspeaspektivn san späalich, sinkn bereits in den negativbereich

                  Nua die hohn wön meinens mit uns eahlich, nua die hohn wön mochn uns eantereif

                  Unsa betrochtungswinkl zu kompliziat, jeda stondpunkt vaändat die kloare sicht

                  Nua die hohn wön hom si no nie geiat, nua die hohn wön haun mei sucht ausm gleichgwicht.

                        Die hohn wön übaroin uns mit innigkeit, und streichln uns volla liebe und lust

                        Die hohn wön schenkn uns endlich iah freiheit, und wiegn uns in schlof on iahra brust

                        Die hohn wön bedeckn uns mit iahra stün, und gebn uns wieda gnua söbstvatraun

                        Die hohn wön spendn uns iahn frein wün, und vagrobn unsre sucht untam baum.

Hob wieda moi meine uaeignen schwierigkeitn entsoagt, und mi mit den grossn unglöstn problemen obquöt

Hob die floschn da besn gedonkn wieda moi entkoakt, und die vabognen weichn da unsichren zukunft gstöt

Hob die herausfoadarungen mit kompfeswün seah begrüsst, und die lächaliche provokation zäatlich liebkost

Hob jedn sinnlosn konflikt umoamt, gedrückt und geküsst, und jede feindschoft mit an stüamischn beifoi umtost.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Geschrieben am 07./08./09. Februar 2016.pk – copyright by philipp kirschner.pk

******************************************************

nochmals ein herzliches dankeschön für euer interesse, für eure lange treue, euren mehrmaligen besuch und für eure investierte zeit, die ihr alle ins lesen und übersetzen dieser mundartigen texte steckt. vielen lieben dank dafür.

und hier wieder die üblichen links:

übersicht band 2

übersicht band 4 und band 3

facebook

twitter

google+

literatpro - meine gedichte band 2

danke für alles. und ich habe noch eine grosse bitte.

bleibt mundartig gesund und bleibt mir weiterhin gewogen.

euer philjazzmetal, dialectiloquax, der mundartige.